ខេត្តរតនគិរី ៖ គោយន្តកៃច្នៃមួយគ្រឿងដឹកឈើចែកចាយតាមសិប្បកម្ម និងតាមរថយន្តតូចៗយកទៅលក់បន្តនៅប្រទេសវៀតណាម បានក្រឡាប់ដោយខ្លួនឯង បណ្តាលអោយបុរសម្នាក់ស្លាប់ភ្លាមៗនៅនឹងកន្លែងកើតហេតុ និងរបួសស្រាល៣នាក់ ។ ហេតុការណ៍នេះបានកើតឡើងកាលពីវេលាម៉ោង៧និង១៨នាទីព្រឹកថ្ងៃទី១៥ មករា ២០១៩ នៅចំណុចទល់មុខចំការយាយចិន នៅលើផ្លូវជាតិ៧៨ ស្ថិតនៅភូមិលូត ឃុំទីងចាក់ ស្រុកបកែវ។
បើតាមសមត្ថកិច្ចដែលបានចុះទៅដល់កន្លែងកើតហេតុបានអោយដឹងថា គោយន្តមួយគ្រឿងជិះគ្នា៤នាក់ ក្នុងនោះរួមមាន ១-ឈ្មោះវូ ខូរ ភេទប្រុស អាយុប្រហែល១៨ឆ្នាំ ជាជនជាតិទំពួន ជាអ្នករួមដំណើរ រស់នៅភូមិលុងឃុង ឃុំលុងឃុង ស្រុកបរកែវ បានស្លាប់នៅនឹងកន្លែងកើតហេតុ ២-ឈ្មោះសៀន សេម៉ា ភេទប្រុស អាយុ២១ឆ្មាំ ជាជនជាតិទំពួន ជាអ្នករួមដំណើរ រស់នៅភូមិអុល ឃុំប៉ាតាង ស្រុកលំផាត់ បានរងរបួសស្រាល ៣-ឈ្មោះម៉េង មេសា ភេទប្រុស អាយុ២៤ឆ្នាំ ជាអ្នករួមដំណើរ រស់នៅភូមិអុល ឃុំប៉ាតាង ស្រុកលំផាត់ និង៤-ឈ្មោះរ៉េវ ចានរី ភេទប្រុស អាយុប្រហែល២៥ឆ្នាំ ជាអ្នកបើកបរគោយន្តកែច្នៃ រស់ភូមិដីឡូឃុំជ័យឧត្តម ស្រុកលំផាត់ បានរត់គេចបាត់ ។
បច្ចុប្បន្នគោយន្តកៃច្នៃដឹកឈើត្រូវបានសមត្ថកិច្ចយកមករក្សាទុកនៅអធិការស្រុកបរកែវរង់ចាំដោះស្រាយនៅពេលក្រោយ រីឯសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ