រាជធានីភ្នំពេញ ៖ កូនប្រុសម្ចាស់ហាង KTV ម្នាក់ញៀនថ្នាំដល់កម្រឹតបានបង្កការអុកឡុកក្នុងហាងរបស់ខ្លួនឯង បោកកែវ ចាន ឆ្នាំង ធ្វើឱ្យភ្ញៀវក្នុងហាងផ្អើលរត់ជាន់ជើងគ្នាដណ្តើមរកច្រកចេញ ម្តាយទ្រាំលែងបានមានតែប្តឹងប៉ូលិសចាប់ខ្លួនកាលពីម៉ោង៩និង១០នាទីយប់ ថ្ងៃទី១៤ ខែមករា ឆ្នាំ២០១៩ ស្ថិតក្នុងហាង «សែនអាល័យអូន» តាមផ្លូវ២០០៤ ភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ ។
កូនប្រុសម្ចាស់ហាងឈ្មោះ យឹម មុន្នី ហៅធី ភេទប្រុស អាយុ២២ឆ្នាំ មុខរបរជួយលើកភេសជ្ជៈឲ្យភ្ញៀវ ស្នាក់នៅក្នុងហាងខាងលើ ជាមនុស្សញៀនថ្នាំ ចំណែកម្តាយឈ្មោះ ឆាយ រុន អាយុ៥៨ឆ្នាំ មុខរបរថៅកែហាង KTV សែនអាល័យអូន ។
តាមក្រុមគ្រួសារបានឲ្យដឹងថា កន្លងមក បុរសបង្កការអុកឡុកនេះ បញ្ចេញនូវចរឹតបែបនេះ ច្រើនលើកច្រើនសារមកហើយ លុះមកដល់យប់កើតហេតុហេតុស្រាប់តែបង្កការអុកឡុកសារជាថ្មី ដោយបោកកែវ ទូរស័ព្ទ របស់របរ បង្កឲ្យភ្ញាក់ផ្អើល ចំណែកម្តាយដែលជាម្ចាស់ហាងទ្រាំលែង ក៏បានប្តឹងប៉ូលិសចាប់ខ្លួនតែម្តង ។
តាមអ្នកជិតខាងបានឲ្យដឹងថា ភ្ញៀវណាមិនភ័យ បើបញ្ចេញនូវចរឹតកាច បោកកែវ ចាន ឆ្នាំង រឿងអីមិនរត់គេចសិន ដោយសភាពកាន់តែតានតឹង ទើបប៉ូលិសចុះទៅអន្តរាគមន៍ចាប់ឃាត់ខ្លួនតាមបណ្តឹងរបស់ម្តាយ ។
កូនប្រុសម្ចាស់ហាងខាងលើ ក្រោយពីសមត្ថកិច្ចចាប់ខ្លួននាំទៅប៉ុស្តិ៍ ទោះជាបន្ទន់ឥរិយាបថបន្តិចមែន សំពះអង្វរម្តាយកុំឲ្យប្តឹងយ៉ាងណាក្តី តែម្តាយប្រកាន់ជំហរមួយ គឺស្រឡាញ់កូនមានតែជម្រើសមួយ ដើម្បីឲ្យកូនកែប្រែខ្លួនទៅជាមនុស្សល្អ រស់នៅក្នុងសង្គមថ្លៃថ្នូរ ត្រូវបានប្តឹង ឲ្យប៉ូលិសចាប់ខ្លួនអនុវត្តន៍ទៅតាមនីវិធី ក្នុងហេតុផលជាច្រើនលើកច្រើនសារមកហើយ ៕
ចែករំលែកព័តមាននេះ