ខេត្តស្ទឹងត្រែង ៖ កម្លាំងនគរបាលប្រឆាំងបទល្មើសសេដ្ឋកិច្ចស្នងការដ្ឋាននគរបាលខេត្តស្ទឹងត្រែង បានបង្ក្រាបរឹបអូសរថយន្ត និងគោយន្តកន្ត្រៃគ្រាដឹកជញ្ជូនឈើចេញពីគោលដៅផ្សេងគ្នា កាលពីយប់ថ្ងៃទី១៤ មករា ២០១៩ នាំមករក្សាទុកនៅស្នងការដ្ឋាននគរបាលខេត្តបន្តនីតិវិធីប្រគល់ទៅរដ្ឋបាលព្រៃឈើ។ លោក…
ខេត្តស្ទឹងត្រែង ៖ កម្លាំងនគរបាលប្រឆាំងបទល្មើសសេដ្ឋកិច្ចស្នងការដ្ឋាននគរបាលខេត្តស្ទឹងត្រែង បានបង្ក្រាបរឹបអូសរថយន្ត និងគោយន្តកន្ត្រៃគ្រាដឹកជញ្ជូនឈើចេញពីគោលដៅផ្សេងគ្នា កាលពីយប់ថ្ងៃទី១៤ មករា ២០១៩ នាំមករក្សាទុកនៅស្នងការដ្ឋាននគរបាលខេត្តបន្តនីតិវិធីប្រគល់ទៅរដ្ឋបាលព្រៃឈើ។
លោក វ៉ា សុផាន់ណា នាយការិយាល័យប្រឆាំងបទល្មើសសេដ្ឋកិច្ចស្នងការដ្ឋានគរបាលបាលខេត្តស្ទឹងត្រែង បានបញ្ជាក់ថា ក្រោយទទួលនូវសេចក្តីរាយការណ៍ពីបណ្តាញភ្នាក់ងារនៅយប់ ម៉ោង២១និង៣៥នាទី ថ្ងៃទី១៤ មករា ២០១៩ កម្លាំងនគរបាលប្រឆាំងបទល្មើសសេដ្ឋកិច្ចបានចុះស្ទាក់ និងបង្ក្រាបរថយន្តមួយគ្រឿង ក្នុងចំណោមពីរគ្រឿងផ្ទុកឈើកកោះប្រភេទលេខ១ចេញពីភូមិអូររី ឃុំអូរី ស្រុកថាឡាបរិវ៉ាត់។ លោកបន្តថា ខណៈកម្លាំងការិយាល័យជំនាញស្ទាក់ចាប់បង្ក្រាបរថយន្តប្រព្រឹត្តបទល្មើសខាងលើប្រភេទសាំយ៉ុងមានចំនួនពីរគ្រឿង តែគេចខ្លួនបាត់មួយគ្រឿង ។
លោកនាយការិយាល័យបានបន្ថែមថា ក្រោយការស្ទាក់ចាប់បង្ក្រាបរថយន្តសាំយ៉ុងខាងលើនៅម៉ោង២២និង១៥នាទីយប់ថ្ងៃដដែល កម្លាំងនគរបាលស្នងការដ្ឋាននគរបាលខេត្តស្ទឹងត្រែង បានឃាត់ចាប់រឹបអូសគោយន្តកន្ត្រៃមួយគ្រឿងទៀត នៅចំណុចភូមិគីឡូម៉ែត្រលេខ៨ សង្កាត់សាមគ្គីក្រុងស្ទឹង ត្រែងដឹកឈើសុក្រំប្រភេទលេខ១ ។ ក្រោយឃាត់រឹបអូសកម្លាំងនគរបាលបាននាំមករក្សានៅបរិវេណស្នងការដ្ឋាននគរបាលខេត្ត។ លុះនៅព្រឹកថ្ងៃទី១៥ មករា កម្លាំងការិយាល័យនគរបាលប្រឆាំងបទល្មើសសេដ្ឋកិច្ច ស្នងការដ្ឋាននគរបាលខេត្តស្ទឹងត្រែង ក្រោមការសម្របសម្រួលពីព្រះរាអាជអាជ្ញាអមសាលាដំបូងខេត្ត បានធ្វើកំណត់ហេតុរួមប្រគល់ទទួលនាំទៅរក្សាទុកនៅខណ្ឌរដ្ឋបាលព្រៃឈើស្ទឹងត្រែង ដែលគេនិយាយថា ជាឈើអត់ច្បាប់ និងទំនងមិនរត់ការ។
មន្ត្រីរដ្ឋបាលព្រៃឈើបានបញ្ជាក់ប្រាប់ឱ្យដឹងនៅព្រឹកថ្ងៃទី១៥ មករានេះថា ឈើដែលកម្លាំងនគរបាលប្រឆាំងបទល្មើសសេដ្ឋកិច្ចបង្ក្រាបខាងលើនោះ មានឈើកកោះ និងឈើសុក្រំជាប្រភេទឈើលេខ១ មិនទាន់ធ្វើការវាស់វែងរួចរាល់នៅឡើយទេ។
គួររំលឹកថា ទាក់ទិនករណីដឹកជញ្ជូនបទល្មើសខាងលើ កាលពីម៉ោង៥ទៀបភ្លឺថ្ងៃទី១៣ មករា រថយន្តមន្ត្រីរដ្ឋបាលព្រៃឈើមួយគ្រឿង រងការខូចខាតកំណាត់ក្រោយដោយសាររថយន្តក្រុមឈ្មួញទំនើងបើកបំបុកយ៉ាងកំរោល ដើម្បីរំដោះរថយន្តបង្កប់បទល្មើសឈើប្រណីតគ្រាមកដល់ចំណុចគល់ស្ពានសេកុង សង្កាត់សាមគ្គី ក្រុងស្ទឹងត្រែង។ ដោយឡែកនៅម៉ោង១៩និង៣០ នាទី ថ្ងៃទី១៣ មករា យុវជនចំនួនពីរនាក់បានស្លាប់ភ្លាមៗនៅលើស្ពានសេកុង សង្កាត់ស្រះឬស្សី ក្រុងស្ទឹងត្រែង ដោយសាររថយន្តដឹកឈើទៅបុកពេញទំហឹងក្នុងគោលដៅច្រាសទិសគ្នា៕
ចែករំលែកព័តមាននេះ