រាជធានីភ្នំពេញ ៖ បុរសម្នាក់បែកថ្នាំបានយកកង់ឡានមកដុតនៅក្បែរបន្ទប់ជួលធ្វើអោយអ្នកជិតខាងភ័យខ្លាចហើយបានរាយការណ៍ទៅអាជ្ញាធរភូមិ ហើយក៏មានប្រជាការពារសង្កាត់មួយរូបចុះមកសួរនាំ និងហាមមិនអោយដុត តែផ្ទុយទៅវិញបុរសនោះបានយកសោវាយប្រជាការពាររលាត់ដៃរលាត់ជើងរងរបួសយ៉ាងដំណំ ។
ក្រោយមកក៏មានការសម្របសម្រួលសងជំងឺចិត្តចំនួន៣០ម៉ឺនរៀលរួចទៅហើយ ដែលឪពុកបុរសបង្កហេតុបានអោយសមត្ថកិច្ចគរបាលយកទៅប៉ុស្តិ៍ធ្វើការអប់រំបែរជាបុរសខាងលើបានវាយទាំងសមត្ថកិច្ចបន្ថែមទៀតត្រូវបានសមត្ថកិច្ចប្រើវិធានការក្តៅៗ ឃាត់បាន៣នាក់យកមកសួរនាំបង្កអោយមានការភ្ញាក់ផ្អើល កាលវេលាម៉ោង៨និង៣០នាទីយប់ ថ្ងៃទី១៤ មករា ២០១៩ នៅចំណុចផ្លូវបេតុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
ជនសង្ស័យទី១- ឈ្មោះ ប្រាក់ ទង ភេទប្រុស អាយុ២៨ឆ្នាំ មុខរបររត់តាក់ស៊ី ស្នាក់នៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ (មានសារធាតុញៀន និងជាជនដៃដល់) ។ ជនសង្ស័យទី២-ឈ្មោះ ប្រាក់ ថង ភេទប្រុស អាយុ២១ឆ្នាំ មុខរបរកម្មកររោងចក្រស្នាក់នៅភូមិ ទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ត្រូវជាមួយប្អូន ។ (គ្មានសារធាតុញៀន ទេមកជួយបងប្រុស) និងជនសង្ស័យទី៣-ឈ្មោះ ឈៀង លី ភេទប្រុស អាយុ៣០ឆ្នាំ មុខរបរ ធ្វើការនៅក្រុមហ៊ុនឯកជន ធ្វើអំពូលភ្លើង ស្នាក់នៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ គ្មានសារធាតុញៀន មកជួយប្អូនថ្លៃ ។
តាមប្រភពព័ត៌មានពីប្រជាការពារភូមិដែលជាជនរងគ្រោះដំបូងបានឱ្យដឹងថា នៅមុនពេលកើតហេតុដោយមានប្រជាពលរដ្ឋបានរាយការណ៍ទៅគាត់ថា បុរសខាងលើបានដុតសំបកកង់ឡាននៅក្បែរផ្ទះរបស់ខ្លួន ពេលភ្លាមៗគាត់បានចូលទៅសួរនាំមិនទាន់បានសួរនាំផងបែរជាជនបង្កខាងលើបានយកសោវាយទៅលើគាត់ បណ្តាលអោយរងរបួសយ៉ាងធ្ងន់ធ្ងររលត់ដៃរលាត់ជើង ហើយម្តាយបានសម្របសម្រួលសងទៅប្រជាការពារភូមិចំនួន៣០ម៉ឺនរៀលរួចទៅហើយ ហើយឪពុកជនបង្កខាងលើបានហៅសមត្ថកិច្ចអោយនាំកូនរបស់គាត់យកទៅណែនាំធ្វើការអប់រំ តែពេលសមត្ថកិច្ចទៅដល់បែរជាជនបង្កខាងលើវាយសមត្ថកិច្ច២ទៅ៣ដៃ បណ្តាលឲ្យបែកមាត់ បន្ទាប់មកសមត្ថកិច្ចនគរបាលប៉ុស្តិ៍ទាក់ទងទៅកម្លាំងនគរបាលអន្តរាគមន៍ខណ្ឌពោធិ៍សែនជ័យសហការឃាត់បុរសខាងលើយកទៅសួរនាំ ទោះបីជារឹងទទឹងជាមួយសមត្ថកិច្ចព្យាយាមតដៃជាមួយសមត្ថកិច្ច ហើយត្រូវបានសមត្ថកិច្ចវាយទ្រមខ្លួន បណ្តាលឲ្យផ្អើលដល់ប្រជាពលរដ្ឋចោមមើលពេញផ្លូវ បន្ទាប់មកសមត្ថកិច្ចឃាត់បាន៣នាក់យកទៅសួរនាំភ្លាមៗផងដែរ ។
បន្ទាប់ពីសមត្ថកិច្ចនគរបាលអន្តរាគមន៍សហការជាមួយសមត្ថកិច្ចនគរបាលប៉ុស្តិ៍ខាងលើយកទៅសួរនាំ និងពិនិត្យមើលសារធាតុញៀន ដោយបុរស២នាក់ដែលមកជួយមិនមានសារធាតុញៀនទេ ជនបង្កដែលជាជនដៃដល់ខាងលើមានសារធាតុញៀនពិតប្រាកដមែន ។
ក្រោយពេលកើតហេតុជនដៃដល់ និង២នាក់ដែលមកជួយខាងលើត្រូវបានសមត្ថកិច្ចនគរបាលប៉ុស្តិ៍បានកសាងសំណុំរឿងបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធី ៕
ចែករំលែកព័តមាននេះ