រាជធានីភ្នំពេញ ៖ ធនាគារជាតិនៃកម្ពុជា(NBC) បានបញ្ឈប់ប្រតិបត្តិករឥណទានជនបទចំនួន៤បន្ថែមទៀតនៅដើមឆ្នាំ២០១៩នេះ ដោយសារតែគ្រឹះស្ថានទាំងនោះមិនបានអនុវត្តពេញលេញទៅតាមការកំណត់របស់ធនាគារជាតិ ។
យោងតាមសេចក្តីជូនដំណឹងរបស់ធនាគារជាតិដែលចេញផ្សារកាលពីថ្ងៃទី ៩ មករា បានបញ្ជាក់ថា ធនាគារជាតិនៃកម្ពុជា សម្រេចដកហូតវិញ្ញាបនបត្របញ្ជាក់ការចុះបញ្ជីរបស់គ្រឹះស្ថានឥណទានជនបទ(ប្រតិបត្តិករឥណទានជនបទ)ចំនួន៤គឺ គ្រឹះស្ថានឥណទាន និវត្តន៍ ហ្វាយនែន ម.ក, សកល ហិរញ្ញវត្ថុ ម.ក, អង្គការរូបិយបណ្ណខ្មែរ(ខេ.អឹម), និងគ្រឹះស្ថាន ស៊ីស៊ី ហ្វាយនែន ម.ក ។
ទាក់ទងនឹងការដកអាជ្ញាប័ណ្ណនេះ នាយកប្រតិបត្តិសមាគមមីក្រូហិរញ្ញវត្ថុកម្ពុជា លោក យុន សុវណ្ណា បានប្រាប់សារព័ត៌មានកោះសន្ដិភាព កាលពីថ្ងៃទី១០ មករា កន្លងមកថា ធនាគារជាតិ បន្ទាប់ពីបានផ្តល់ការអនុញ្ញាតប្រតិបត្តិការដល់គ្រឹះស្ថានឥណទានជនបទមួយចំនួនមក ឃើញថានៅប៉ុន្មានឆ្នាំចុងក្រោយនេះមានការបញ្ឈប់ឬដកអាជ្ញាប័ណ្ណត្រឡប់ទៅវិញជាបន្ដបន្ទាប់ ហើយការដកនេះមានហេតុផលចម្បងៗដែលធនាគារជាតិក៏ធ្លាប់បានបញ្ជាក់ដែរដូចជា បញ្ហាផ្នែកបច្ចេកទេសដោយគ្រឹះស្ថានទាំងនោះមិនបានអនុវត្តពេញលេញទៅតាមអ្វីដែលធនាគារជាតិកំណត់ជាដើម ។ ក្រៅពីនេះ អាចមកពីគ្រឹះស្ថានបានកែប្រែនូវគំរូអាជីវកម្ម ឬបញ្ឈប់ប្រតិបត្តិការរបស់ខ្លួនតែម្តង។ ដូចនេះធនាគារជាតិត្រូវតែដកហូតមកវិញ ។
លោកគិតថា ៖« ការដកអាជ្ញាប័ណ្ណនេះ វាមានរឿងវិជ្ជមានច្រើនជាងរឿងអវិជ្ជមាន ។ ក្នុងករណីណាមួយដែលពួកគាត់ងាកចេញពីការគ្រប់គ្រង និងកាតព្វកិច្ចផ្លូវច្បាប់ពាក់ព័ន្ធការផ្តល់សេវាឥណទាន ទៅផ្តល់សេវាឥណទានក្រៅកាតព្វកិច្ចនៃច្បាប់ វានឹងអាចប៉ះពាល់ដល់វិស័យមួយនេះ »។ លោកនាយកប្រតិបត្តិសមាគម បានលើកឡើងថា ៖« មកដល់ពេលនេះ យើងពុំទាន់មានទិន្ន័យ ឬរបាយការណ៍ជាក់លាក់ណាមួយនោះទេ ទាក់ទងនឹងការចូលរួមរបស់គ្រឹះស្ថានឥណទានជនបទនេះ ដោយសារគ្រឹះស្ថាននេះពីដើមឡើយមិនតម្រូវកាតព្វកិច្ចរាយការណ៍ »។
ធនាគារជាតិនៃកម្ពុជា កាលពីថ្ងៃទី ៥ ខែកញ្ញា ឆ្នាំ២០១៨ ក៏បានសម្រេចដកហូតវិញ្ញបនបត្របញ្ជាក់ការចុះបញ្ជីរបស់គ្រឹះស្ថានឥណទានជនបទ(ប្រតិបត្តិករឥណទានជនបទ)ចំនួន២ និងអនុញ្ញាតឱ្យគ្រឹះស្ថានឥណទានជនបទចំនួន២៤ បញ្ឈប់ប្រតិបត្តិការជាគ្រឹះស្ថានឥណទានជនបទតាមការស្នើសុំរបស់គ្រឹះស្ថានផងដែរ ក្នុងនោះមានដូចជា គ្រឹះស្ថាន អេស ជីហ្វានែន, ឥណទានវីសា ភីអិលស៊ី, សមាគមផ្តមគំនិតពាណិជ្ជកម្ម, អង្គការឥណទានលុបបំបាត់ភាពក្រីក្រ, សមាគមអភិវឌ្ឍន៍ភូមិ, អង្គការលោកគ្រូ, ស៊ីអេចអេហ្វឌី ហ្វាយនែន, ឥណទានមរតក ភីអិលស៊ី, ចំរើនភោគផល ហ្វាយនែន, ផប ម.ក, ធនាគារហិរញ្ញវត្ថុប្រជាជន ម.ក, ព្រាបសហ្វាយនែន ម.ក, ស៊ី.ស៊ី.អូ ហ្វាយនែន ម.ក, ស្រូវទុំ ហ្វាយនែន ម.ក, សម្បត្តិឥណទាន អភិវឌ្ឍន៍ សេដ្ឋកិច្ចគ្រួសារ,ហ្វឺសកូ ម.ក, អូ ស៊ីហ្វាយនែន, គ្រួសារ ខ្មែរ ហ្វាយនែន, សុភមង្គលសេដ្ឋកិច្ចគ្រួសារ ម.ក, ទិត្យវឌ្ឍនា ហ្វាយនែន ម.ក, វាសនា ហិរញ្ញវត្ថុ ម.ក, ណាយស៍ ហ្វាយនែន ម.ក, ធី អេច អេ អេហ្វ ម.ក, និងអេស.អិល.អិម.អេច ម.ក ។
គិតត្រឹមឆមាសទី១ ឆ្នាំ២០១៨ គ្រឹះស្ថានឥណទានជនបទមានចំនួន៣០២ ដែលបានប្រតិបត្តិការផ្ដល់សេវាឥណទាននៅទូទាំងប្រទេសកម្ពុជា ។ នេះបើតាមរបាយការណ៍របស់ធនាគារជាតិនៃកម្ពុជា ៕
ចែករំលែកព័តមាននេះ