ខេត្តសៀបរាម ៖ កម្ពុជាបានធ្វើម្ចាស់ផ្ទះកិច្ចប្រជុំក្រុមប្រឹក្សាវប្បធម៌អាស៊ី (ACC) ដោយលើកប្រធានបទសំខាន់ៗចំនួន៤ ដើម្បីពិភាក្សាមុនចេញសេចក្តីថ្លែងកាណ៍រួមនៅទីក្រុងសៀមរាប ។ លោក ឯក ថា…
ខេត្តសៀបរាម ៖ កម្ពុជាបានធ្វើម្ចាស់ផ្ទះកិច្ចប្រជុំក្រុមប្រឹក្សាវប្បធម៌អាស៊ី (ACC) ដោយលើកប្រធានបទសំខាន់ៗចំនួន៤ ដើម្បីពិភាក្សាមុនចេញសេចក្តីថ្លែងកាណ៍រួមនៅទីក្រុងសៀមរាប ។
លោក ឯក ថា អនុប្រធានគណៈកម្មការផ្សព្វផ្សាយ និងសារព័ត៌មាន ACC បានឲ្យដឹងនៅក្នុងសន្និសីទសារព័ត៌មាន នារសៀលថ្ងៃទី១៤ មករា ឆ្នាំ២០១៩ នៅទីលានជល់ដំរី ថា កម្មវិធីប្រកាសជាផ្លូវក្រុមប្រឹក្សាវប្បធម៌អាស៊ីនឹងប្រព្រឹត្តិទៅនៅថ្ងៃទី១៥-១៦ ខែមករា ឆ្នាំ២០១៩ វត្តមានសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
លោកថា ការធ្វើជាម្ចាស់ផ្ទះនៃកិច្ចប្រជុំដំបូងបង្អស់របស់ក្រុមប្រឹក្សាវប្បធម៌អាស៊ីនៅថ្ងៃទី១៥ ខែមករា ឆ្នាំ២០១៩ បន្ទាប់ពីក្រុមប្រឹក្សានេះត្រូវបានបង្កើតកាលពីឆ្នាំមុន ។ កិច្ចប្រជុំនេះនឹងប្រព្រឹត្តិទៅនៅខេត្តសៀមរាបនៅក្នុងសណ្ឋាគារ និងសាលសន្និសីទសុខាជាមួយនឹងវត្តមានរបស់ ភ្ញៀវកិត្តិយសជាតិ និងអន្តរជាតិមកពី២៦ប្រទេសទូទាំងទ្វីបអាស៊ី ។
លោកបន្ថែមថា ACCត្រូវបានបង្កើតឡើងក្នុងឆ្នាំ២០១៨ ដោយអង្គការសន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) ដែលមានតំណាងគណបក្សនយោបាយជាង ៣៥០មកពី៥២ប្រទេសក្នុងតំបន់ ។ ក្រុមប្រឹក្សានេះត្រូវបានទទួលស្គាល់ដោយអង្គការយូណេស្កូ បន្ទាប់ពីកិច្ចព្រមព្រៀងត្រីភាគីរវាងអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO យូណេស្កូ) អង្គការ ICAPP និង ACC ត្រូវបានចុះហត្ថលេខា កាលពីថ្ងៃទី៤ ខែធ្នូ ឆ្នាំ២០១៨ នៅខេត្តសៀមរាប ។
លោកឯកថា បានឲ្យដឹងទៀតថា មុននឹងឈានដល់ប្រកាសជាផ្លូវនៃក្រុមប្រឹក្សាវប្បធម៌អាស៊ីនោះលោក លោក កឹមរ័ត្ន វិសិដ្ឋ រដ្ឋលេខាធិការ ទីស្តីការគណៈរដ្ឋមន្ត្រីនឹងអានព្រះរាជសារស្វាគមន៍របស់ព្រះមហាក្សត្រនៃព្រះរាជាណាចក្រកម្ពុជាពេលចាប់ផ្តើមកិច្ចប្រជុំនៅព្រឹកថ្ងៃទី១៥ ខែមករា ឆ្នាំ២០១៩ ។
លោកជំទាវ ឃួន សុដារី អនុប្រធានទី២ រដ្ឋសភានៃព្រះរាជាណាចក្រកម្ពុជា និងជាប្រធានACC នឹងថ្លែងនូវចំណាប់អារម្មណ៍ស្វាគមន៍បន្តដោយសុន្ទរកថារបស់តំណាង ICAPP និង តំណាងអង្គការយូណេស្កូ។
លោកគូសបញ្ជាក់នៅថ្ងៃទី១៥ មករា វាគ្មិនជាតិ និងអន្តរជាតិនឹងចូលរួមនៅក្នុងកិច្ចពិភាក្សាតុមូលចំនួន៤ លើប្រធានបទសំខាន់ចំនួន៤រួមមានទី១- ការលេចឡើងនូវពិភព លោកមួយទស្សនៈទានចម្រុះ និងអត្តសញ្ញាណអាស៊ី ទី២- ការតភ្ជាប់រវាងវប្បធម៌ និងការអភិវឌ្ឍន៍ប្រកបដោយចីរភាព ទី៣- ការប្រើប្រាស់បច្ចេកវិទ្យាសម្រាប់ការផ្សារភ្ជាប់រវាងអរិយធម៌ និងទី៤- ការកសាងសហគមន៍មួយសម្រាប់ជោគវាសនាតែមួយនៅអាស៊ី ។
សម្តេចនាយករដ្ឋមន្ត្រី ហ៊ុន សែន ប្រធានស្ថាបនិកកិត្តិយសនៃ ACC នឹងថ្លែងចំណាប់ អារម្មណ៍នៅល្ងាចថ្ងៃទី១៥ ខែមករា ដើម្បីប្រកាសក្រុមប្រឹក្សាវប្បធម៌អាស៊ីជាផ្លូវការហើយ បន្ទាប់មកសម្តេចនឹងអញ្ជើញជាអធិបតីក្នុងពិធីលៀង នៅទីលានជល់ដំរីនៃប្រាសាទបាយ័ន ដោយមានវត្តមានភ្ញៀវជាង៨០០នាក់ មកពីស្ថាប័ននីតិប្រតិបត្តិ និងនីតិប្បញ្ញត្តិជាតិ និងអន្តរជាតិ ។
អ្នកចូលរួមនឹងបូកបញ្ចូលទាំងភ្ញៀវដែលកំពុងមានវត្តមានក្នុងកិច្ចប្រជុំប្រចាំឆ្នាំលើកទី២៧ នៃវេទិកាសភាអាស៊ី-ប៉ាស៊ីហ្វិក (APPF-27) ស្តីពី «ការពង្រឹងភាពជាដៃគូសភា ដើម្បីសន្តិភាព សន្តិសុខ និងការអភិវឌ្ឍន៍ប្រកបដោយចីរភាព» ដែលកំពុងប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៨ ខែមករា ឆ្នាំ២០១៩ នៅលើទឹកដីខេត្តសៀមរាបនៃព្រះរាជាណាចក្រកម្ពុជា ។ សិល្បករសិល្បការិនីប្រមាណ២៧០នាក់ មកពី៩ប្រទេស រួមទាំងសិល្បករ សិល្បការិនីកម្ពុជាចំនួន១៦៥នាក់ផង នឹងសម្តែងសិល្បៈចម្រុះជាតិសាសន៍នៅក្នុងពិធីលៀងសាយភោជន៍ ដើម្បីអបអរសាទរពិធីប្រកាសក្រុមប្រឹក្សាវប្បធម៌អាស៊ីនៅកម្ពុជានេះ ៕
ចែករំលែកព័តមាននេះ