រាជធានីភ្នំពេញ ៖ ស្របពេលមានពាក្យចចាមអារ៉ាមអំពីការសាងសង់រថភ្លើងលើអាកាសពីភ្នំពេញទៅកាន់ពហុកីឡដ្ឋានមរតកសម្ដេចតេជោ អ្នកនាំពាក្យក្រសួងពាក់ព័ន្ធបានថ្លែងថា មិនទាន់មានគម្រោងសិក្សា និងការសាងសង់នៅឡើយទេ ។ លោក ម៉េត មាសភក្តី…
រាជធានីភ្នំពេញ ៖ ស្របពេលមានពាក្យចចាមអារ៉ាមអំពីការសាងសង់រថភ្លើងលើអាកាសពីភ្នំពេញទៅកាន់ពហុកីឡដ្ឋានមរតកសម្ដេចតេជោ អ្នកនាំពាក្យក្រសួងពាក់ព័ន្ធបានថ្លែងថា មិនទាន់មានគម្រោងសិក្សា និងការសាងសង់នៅឡើយទេ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានមានប្រសាសន៍កាលពីថ្ងៃទី១១ មករា កន្លងមកថា សាលារាជធានីភ្នំពេញ មិនទាន់បានសិក្សា ឬស្ថាប័នណាមួយសិក្សាពីគម្រោងសាងសង់ផ្លូវរថភ្លើងអាកាស (Sky Train) ពីកណ្តាលរាជធានីភ្នំពេញ ទៅកាន់ស្តាតមរតកសម្តេចតេជោ ហ៊ុន សែន ស្ថិតក្នុងសង្កាត់ព្រែកតាសេក ខណ្ឌជ្រោយចង្វានៅឡើយទេ ។ លោកបន្តថា ៖« គម្រោងនេះមិនទាន់បានសិក្សានៅឡើយទេ ហើយខ្ញុំក៏មិនដែលទទួលបានព័ត៌មាននេះដែរ »។
អ្នកនាំពាក្យក្រសួងសាធារណការ និងដឹកជញ្ជូន លោក វ៉ាស៊ឹម សូរិយា ក៏បានបដិសេធព័ត៌មានចចាមអារ៉ាមខាងលើផងដែរ ដោយលោកបានមានប្រសាសន៍ថា លោកមិនបានដឹងពីគម្រោងសាងសង់ផ្លូវរថភ្លើងអាកាសតភ្ជាប់រាជធានីភ្នំពេញ ទៅកាន់ស្តាតមរតកសម្តេចតេជោ ហ៊ុន សែននោះទេ ។ លោកបន្តថា ៖« តាមអ្វីដែលខ្ញុំដឹង គឺមិនមានគម្រោងនេះត្រូវបានសិក្សានៅឡើយទេ »។
ទោះបីយ៉ាងនេះក្ដី យោងតាមគេហទំព័រក្នុងស្រុកមួយបានស្រង់សម្ដីលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី២៨ ធ្នូ ឆ្នាំ២០១៨ កន្លងមកគ្រាដែលលោកបានអញ្ជើញចូលរួមជិះកង់កម្សាន្ដមហាជន ដើម្បីអបអរសាទរពិធីសម្ពោធវិមានឈ្នះឈ្នះថា ក្រសួងបានស្នើឲ្យអង្គការJICA សិក្សាពីការសាងសង់ផ្លូវរថភ្លើងលើអាកាស (AGT) ពីរាជធានីភ្នំពេញ ទៅពហុកីឡដ្ឋានជាតិមរតកតេជោ ដែលស្ថិតក្នុងតំបន់អភិវឌ្ឍន៍របស់ក្រុមហ៊ុនលីយ៉ុងផាត់ ខណៈដែលកម្ពុជានឹងធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ ។
គេហទំព័រដដែលនោះបានស្រង់សម្ដីលោក ទេសរដ្ឋមន្ត្រី ដោយលោកបានបន្ថែមថា ក្រសួងក៏បានស្នើឱ្យវិស័យឯកជន សិក្សាគម្រោងដឹកជញ្ជូនអ្នកដំណើរតាមរថភ្លើង ពីព្រលានយន្តហោះទៅស្ថានីយភ្នំពេញ និងទៅដល់ពហុកីឡដ្ឋានជាតិមរតកតេជោផង
ដែរ ។ កន្លងមក ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ JICAបានសិក្សាពីគម្រោងសាងសង់ផ្លូវរថភ្លើងអាកាសចំនួន៣ខ្សែ នៅរាជធានីភ្នំពេញ ដោយត្រូវចំណាយទុនវិនិយោគប្រមាណ៨០០លានដុល្លារអាមេរិក ប៉ុន្តែគម្រោងនេះមិនទាន់បានឆ្លើយតបពីរាជរដ្ឋាភិបាលនៅ
ឡើយ ។
គម្រោងការសាងសង់ផ្លូវរថភ្លើងអាកាស នេះបានសិក្សាទៅលើផ្លូវចំនួន៣ខ្សែ ដោយខ្សែទី១ ចាប់ផ្តើមពីមហាវិថីកម្ពុជាក្រោម, មហាវិថីព្រះមុនីវង្ស, មហាវិថីសហព័ន្ធរុស្ស៊ី និងរង្វង់មូលចោមចៅ។ ខ្សែទី២ ចាប់ផ្តើមពីមហាវិថីព្រះមុនីវង្ស រត់ស្របផ្លូវរថភ្លើង(ចាស់) ចូលអាកាសយានដ្ឋានអន្តរជាតិភ្នំពេញ និងខ្សែទី៣ ចាប់ផ្តើមពីផ្សារធំថ្មី, មហាវិថីហ្សាលដឺហ្គោល, មហាវិថីព្រះមុនីរ៉េត, ផ្លូវវេងស្រេង ឆ្ពោះមករង្វង់មូលចោមចៅ និងបត់មកអាកាសយានដ្ឋានអន្តរជាតិភ្នំពេញវិញ ។
គម្រោងអភិវឌ្ឍន៍ផ្លូវរថភ្លើងលើអាកាសនេះ គឺជាគំនិតផ្ដួចផ្តើមរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងដំណើរទស្សនកិច្ចផ្លូវការរយៈពេល៤ថ្ងៃនៅប្រទេសជប៉ុន កាលពីខែសីហា ឆ្នាំ២០១៧កន្លងមក ។ ក្នុងឱកាសនោះ សម្តេចតេជោបានស្នើរដ្ឋាភិបាលទីក្រុងតូក្យូ ឲ្យជួយគិតគូរផ្ដល់ជំនួយជាហិរញ្ញវត្ថុនិងបច្ចេកទេស ដើម្បីអភិវឌ្ឍន៍លើវិស័យដឹកជញ្ជូន ជាពិសេស រៀបចំឲ្យមានរថភ្លើងស្វ័យប្រវត្តិលើអាកាសបែបនេះ ដើម្បីកាត់បន្ថយនូវការចំណាយរបស់ពលរដ្ឋ ព្រមទាំងកាត់បន្ថយការកកស្ទះចរាចរណ៍ និងគ្រោះថ្នាក់ផ្សេងៗ ។
អ្នកឯកទេសផ្នែកនគរូបនីយកម្ម បានថ្លែងកន្លងមកថា ការសាងសង់រថភ្លើងលើអាកាស ជាជម្រើសល្អមួយនាពេលអនាគត ព្រោះវាជួយសម្រួលការដឹកជញ្ជូន និងការកកស្ទះចរាចរណ៍នៅទីក្រុងភ្នំពេញ ព្រោះរថភ្លើងលើអាកាសនឹងជាជម្រើសថ្មីសម្រាប់ប្រជាពលរដ្ឋធ្វើដំណើរ ខណៈការដឹកជញ្ជូនតាមរថយន្តក្រុងសាធារណៈរបស់សាលាក្រុងភ្នំពេញ ចាប់ផ្តើមមានប្រជាប្រិយភាពបណ្តើរៗហើយ ហើយវាក៏បង្ហាញពីភាពរីកចម្រើនរបស់ប្រទេសជាតិ ដែរ ។
លោកបណ្ឌិត វ៉ាន់ វ៉ាត អ្នកជំនាញរូបនេះបន្ថែមថា ៖« រថភ្លើងអាកាស ក៏នឹងចូលរួមចំណែកលើកកម្ពស់សោភ័ណភាព និងទាក់ទាញការចាប់អារម្មណ៍ពីភ្ញៀវទេសចរផងដែរ ប៉ុន្តែការសិក្សាលើបណ្តាញនេះទាមទារឲ្យមានភាពច្បាស់លាស់ ដើម្បីទទួលបានសោភ័ណភាពផង និងមិនប៉ះពាល់បរិស្ថានផង »៕
ចែករំលែកព័តមាននេះ