សហរដ្ឋអាមេរិក ៖ ពេលកំពុងមានការខ្វែងគំនិតគ្នាខ្លាំងលើរឿងអន្តោប្រវេសន៍នៅសហរដ្ឋអាមេរិក អតីតអភិបាលក្រុងSAN ANTONIO លោកJULIAN CASTRO អតីតរដ្ឋមន្ត្រីមួយរូប របស់លោកបារ៉ាក់អូបាម៉ា ប្រកាសនាថ្ងៃទី១២មករានៅរដ្ឋតិចសាស់ ពីបេក្ខភាពរបស់លោកដើម្បីក្លាយជាប្រធានាធិបតីអាមេរិក។
ជាចៅប្រុសរបស់ជនអន្តោប្រវេសន៍ម៉ិកស៊ិកម្នាក់ លោកJULIAN CASTROអាយុ៤៤ឆ្នាំ ក្លាយជាអ្នកប្រជាធិបតេយ្យវ័យក្មេងជាងគេបំផុតដែលហាក់ចូលប្រឡូកផ្លូវការប្រជែងយកតំណែងប្រធានាធិបតី សម្រាប់ការបោះឆ្នោតឆ្នាំ២០២០ ដែលមានការចូលរួមប្រជែងរបស់អ្នកប្រជាធិបតេយ្យច្រើននាក់ សម្រាប់យកម្នាក់ មកប្រកួតប្រជែងជាមួយលោកដូណាល់ត្រាំ។
ចំណែកសមាជិកាសភាវ័យក្មេងម្នាក់នៃគណបក្សប្រជាធិបតេយ្យកោះហាវ៉ៃ លោកស្រីTULSI GABBARD នឹងប្រកាសជាផ្លូវការនាពេលឆាប់ៗនេះ ពីការឈរឈ្មោះជាបេក្ខនារីប្រធានាធិបតីអាមេរិកឆ្នាំ២០២០។ លោកស្រីជាអតីតយោធាមួយរូប ដែលរងការរិះគន់ ដោយសារតែជួបជាមួយប្រធានាធិបតីស៊ីរី លោកបាចាអាល់អាសាដពេលកំពុងមានសង្គ្រាមស៊ីវិលពេញបន្ទុក។ លោកស្រីTULSI GABBARD ដែលមានអាយុទើប៣៧ឆ្នាំ ប្រកាសកាលពីថ្ងៃទី១១មករាពីបំណងឈរឈ្មោះនេះ។
ហក់ប្រឡូកក្នុងនយោបាយនៅកោះហាវ៉ៃទាំងវ័យក្មេង លោកស្រីជានារីអាមេរិកកាន់សាសនាហិណ្ឌូដំបូងគ ចូលក្នុងសភាអាមេរិកដែលលោកស្រីកាន់តំណែងនោះ ចាប់តាំងពីឆ្នាំ២០១៣មក។ ប្រសិនបើលោកស្រីជាប់ឆ្នោតប្រធានាធិបតី នោះលោកស្រីនឹងក្លាយជាប្រធានាធិបតី វ័យក្មេងជាងគេបំផុតនៃសហរដ្ឋអាមេរិក។ កាលពីយប់ថ្ងៃទី១១មករាទាំងញញឹមយ៉ាងស្រស់ស្រាយ លោកស្រីថ្លែងតាមទូរទស្សន៍CNNថា ខ្ញុំសម្រេចឈរឈ្មោះហើយនឹងប្រកាសជាផ្លូវការនាសប្ដាហ៍ខាងមុខ៕
ចែករំលែកព័តមាននេះ