បន្ទាយមានជ័យ ៖ រថយន្តតូយូតាព្រូសបានបុកជាមួយរថយន្តតូយូតាកាម៉ារីឆ្លាម បណ្តាលរបួសធ្ងន់ស្រាល៣នាក់ ដែលម្នាក់ជាកូនង៉ាដែលកើតឡើងនៅវេលាម៉ោង៩និង៣០នាទីថ្ងៃទី១២ ខែមករា ឆ្នាំ២០១៩ នៅមុខសាលាវិទ្យាល័យទឹកផ្លា ស្ថិតភូមិសង្កាត់ទឹកផ្លា ក្រុងសិរីសោភ័ណ ។
មន្ត្រីនគរបាលជើងគោកខេត្តបន្ទាយមានជ័យបានប្រាប់ថា នៅពេលគ្រោះថ្នាក់ចរាចរណ៍កើតឡើង គឺមានរថយន្តតូយូតាព្រូសដែលពាក់ស្លាក់លេខភ្នំពេញ 2AV- 5409 បានបើកបរតាមបណ្តោយផ្លូវជាតិលេខ៥ ក្នុងទិសដៅពីកើតទៅលិចក្នុងល្បឿនលឿនបានទៅបុកនឹងរថយន្តម៉ាក់តូយូតាកាម៉ារី ពាក់ស្លាក់លេខភ្នំពេញ 2A- 5733 ដែលម្ចាស់ថយចេញពីក្នុងផ្ទះមកលើផ្លូវជាតិលេខ៥ បណ្តាលរបួសធ្ងន់ស្រាល៣នាក់ មានស្រី២នាក់ និងកូនង៉ាម្នាក់ត្រូវបានសង្គ្រោះបន្ទាន់ ។
មន្ត្រីនគរបាលចរាចរណ៍ជើងគោកបានបញ្ជាក់ថា គ្រោះថ្នាក់ចរាចរណ៍កើតឡើងបណ្តាលកំហុសកើតឡើងទាំងពីរ គឺអ្នកបើកបររថយន្តតូយូតាព្រូស បើកបរក្នុងល្បឿនលឿនគ្មានការប្រុងប្រយ័ត្ន និងរថយន្តតូយូតាកាម៉ារីកំហុសធ្ងន់ ដោយរថយន្តចេញពីផ្ទះឡើងមកផ្លូវជាតិលេខ៥ គ្មានការប្រុងប្រយ័ត្ន និងគ្មានអ្នកមើលក្រោយពេលថយរថយន្តទើបបង្កគ្រោះកើតឡើង បណ្តាលរងគ្រោះ៣នាក់ មិនទាន់បានស្គាល់អត្ថសញ្ញាណនៅឡើយ ។
ក្រោយពេលមន្ត្រីនគរបាលចរាចរណ៍ធ្វើការវាស់វែងហើយបានយករថយន្តសន្ទូចយករថយន្តទាំង២គ្រឿងទៅស្នងការដ្ឋាននគរបាលខេត្តបន្ទាយមានជ័យ ដើម្បីអនុវត្តន៍តាមផ្លូវច្បាប់ ៕
ចែករំលែកព័តមាននេះ