ខេត្តកំពង់ធំ ៖ បុរសម្នាក់បើកបរម៉ូតូយ៉ាងលឿនក៏ទៅបុកពីក្រោយគោយន្តកន្ត្រៃ បណ្តាលឱ្យរងរបួសធ្ងន់ ក្រោយមកក៏បានស្លាប់នៅមន្ទីរពេទ្យ ដែលហេតុការណ៍នេះបានកើតឡើងកាលពីវេលាម៉ោង៨និង១០នាទីយប់ ថ្ងៃទី១២ ខែមករា ឆ្នាំ២០១៩ នៅលើកណាត់ផ្លូវជាតិលេខ៦ ចន្លោះគីឡូម៉ែត្រលេខ ១១៩-១២០ ភូមិត្រពាំងឈូក ឃុំបឹង ស្រុកបារាយណ៍ ខេត្តកំពង់ធំ ។
នគរបាលបានឱ្យដឹងថា ជនរងគ្រោះដែលស្លាប់ឈ្មោះ ធឹន ថូ ភេទប្រុស អាយុ៣២ឆ្នាំ រស់នៅភូមិត្រស់ ឃុំបល្ល័ង្ក ស្រុកបារាយណ៍ ជាអ្នកបើកបរម៉ូតូមួយគ្រឿងម៉ាកហុងដាឌ្រីម ធុនC125 ពណ៌ខ្មៅ ពាក់ផ្លាកលេខ កំពង់ធំ ១K-៣២៨០ បានស្លាប់នៅមន្ទីរពេទ្យបង្អែកបារាយណ៍-សន្ទុក ចំណែកភាគីខាងគោយន្តកន្ត្រៃ
ពណ៌ស្លាទុំ បើកបរដោយបុរសម្នាក់មិនស្គាល់អត្តសញ្ញាណបានរត់គេចខ្លួនបាត់ក្រោយពេលកើតហេតុ ។
នគរបាលបានឱ្យដឹងថា មុនពេលកើតហេតុ គេឃើញបុរសម្នាក់បើកបរម៉ូតូមួយគ្រឿងក្នុងល្បឿនលឿន ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើបានបុកពីក្រោយគោយន្តដែលធ្វើដំណើរស្របទិសគ្នា បណ្តាលឱ្យអ្នកបើកបរម៉ូតូរងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យ តែដោយសារស្ថានរបួសធ្ងន់ធ្ងរពេកក៏បានស្លាប់ក្នុងមន្ទីរពេទ្យ ។ ចំណែកអ្នកបើកបរគោយន្តបានរត់គេចខ្លួនបាត់ ។
សមត្ថកិច្ចបានបញ្ជាក់ថា មូលហេតុដែលបង្កឱ្យមានគ្រោះថ្នាក់ខាងលើគឺដោយសារគោយន្តកន្ត្រៃគ្មានបំភ្លឺពីក្រោយ និងរួមផ្សំនឹងអ្នកបើកបរម៉ូតូបើកបរក្នុងល្បឿនលឿន ហើយស្ថិតក្នុងស្ថានភាពស្រវឹង ។
ក្រោយពេលកើតហេតុ សមត្ថកិច្ចបានចុះមកធ្វើការវាស់វែង និងយកគោយន្តកន្ត្រៃមករក្សាទុកនៅប៉ុស្តិ៍នគរបាលបឹង ចំណែកម៉ូតូត្រូវបានយកមករក្សាទុកនៅអធិការដ្ឋាននគរបាលស្រុកបារាយណ៍ ដើម្បីរង់ចាំធ្វើការដោះស្រាយនៅពេលក្រោយ៕
ចែករំលែកព័តមាននេះ