រាជធានីភ្នំពេញ ៖ បុរសជាអ្នកបើកបរម៉ូតូកង់បីឥណ្ឌាម្នាក់បានរងរបួសធ្ងន់ ពេលបើកជ្រុល ចង្កូតចូលទៅចណែកផ្លូវម្ខាងទៀត ហើយបានជ្រុលទៅបុកជាមួយរថយន្តមួយគ្រឿង ដែលកំពុងបើកបរក្នុងទិសដៅបញ្ច្រាសគ្នាពេញទំហឹង បណ្តាលឲ្យម៉ូតូកង់បីនោះរងការខូចខាតក្រពឹតរួញកៀបជាប់អ្នកបើកបររើមិនរួច ធ្វើឱ្យរងរបួសធ្ងន់។ ហេតុការណ៍នេះបានកើតឡើងកាលពីវេលាម៉ោង៥និង៣០នាទីព្រឹកថ្ងៃទី១២…
រាជធានីភ្នំពេញ ៖ បុរសជាអ្នកបើកបរម៉ូតូកង់បីឥណ្ឌាម្នាក់បានរងរបួសធ្ងន់ ពេលបើកជ្រុល ចង្កូតចូលទៅចណែកផ្លូវម្ខាងទៀត ហើយបានជ្រុលទៅបុកជាមួយរថយន្តមួយគ្រឿង ដែលកំពុងបើកបរក្នុងទិសដៅបញ្ច្រាសគ្នាពេញទំហឹង បណ្តាលឲ្យម៉ូតូកង់បីនោះរងការខូចខាតក្រពឹតរួញកៀបជាប់អ្នកបើកបររើមិនរួច ធ្វើឱ្យរងរបួសធ្ងន់។
ហេតុការណ៍នេះបានកើតឡើងកាលពីវេលាម៉ោង៥និង៣០នាទីព្រឹកថ្ងៃទី១២ ខែមករា ឆ្នាំ២០១៩ ស្ថិតនៅលើកំណាត់មហាវិថីសហព័ន្ធរុស្សី ត្រង់ចំណុចមុខអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះឈ្មោះ ឆាយ ថង ភេទប្រុស អាយុ៤៥ឆ្នាំ ស្នាក់នៅក្នុងភូមិព្រៃទា សង្កាត់ចោមចៅ៣ ខណ្ឌពោធិសែនជ័យ ជាអ្នកបើកបរម៉ូតូកង់បីឥណ្ឌាមួយគ្រឿង ពណ៌លឿង ពាក់ស្លាកលេខ ភ្នំពេញ ១HF-០៩៥៣ បានរងរបួសបាក់ជើងឆ្វេង។
ដោយឡែកភាគីខាងរថយន្តមួយគ្រឿងម៉ាកស្តារិច ពណ៌ទឹកប្រាក់ ពាក់ស្លាកលេខ ភ្នំពេញ ២AU-៤០១៧ រងការខូចខាតផ្នែកខាងមុខយ៉ាងដំណំដែរ ហើយរថយន្តនេះបើកបរដោយបុរសម្នាក់មិនស្គាល់អត្តសញ្ញាណ ។
ប្រភពព័ត៌មានបានឲ្យដឹងទៀតថា នៅមុនពេលកើតហេតុ ភាគីទាំង២នេះបានបើកបរក្នុងទិសដៅបញ្ច្រាសទិសគ្នា ដោយម៉ូតូកង់បីឥណ្ឌាបានធ្វើដំណើរពីកើតទៅលិច ក្នុងល្បឿនលឿនហើយបានជែងរថយន្ត១គ្រឿងដែលកំពុងបើកស្របគ្នានៅខាងមុខ និងបានជ្រុលចូលទៅផ្លូវម្ខាងទៀត។
ប្រភពព័ត៌មានបានបន្តថា ស្របពេលនោះក៏មានរថយន្តមួយគ្រឿងម៉ាកស្តារិចបានបើកបរក្នុងទិសដៅបញ្ច្រាសទិសគ្នា និងក្នុងល្បឿនលឿនពីលិចទៅកើតបានមកដល់ ក៏បុកគ្នាយ៉ាងពេញទំហឹងជាមួយរ៉ឺម៉កម៉ូតូកង់បីឥណ្ឌា បណ្តាលឲ្យរ៉ឺមកម៉ូតូកង់បីឥណ្ឌារងការខូចខាតក្រពឹតរួញមុខកៀបជាប់អ្នកបើកបរ និងធ្វើឱ្យរងរបួសបាក់ជើងឆ្វេងតែម្ដង។
ប្រភពខាងលើបានបន្តទៀតថា ពេលនោះក្រុមសង្គ្រោះអង្គភាព៧១១ បានចុះទៅកាន់កន្លែងកើតហេតុ ហើយបានយកឧបករណ៍មកកាត់រ៉ឺម៉កម៉ូតូកង់បីឥណ្ឌានោះ ទើបទាញយកជនរងគ្រោះចេញមកបាន ហើយដឹកបញ្ជូនទៅកាន់មន្ទីរពេទ្យព្រះកុសុមៈដើម្បីសង្គ្រោះបន្ទាន់ភ្លាមៗផងដែរ។
ចំណែកនគរបាលចរាចរខណ្ឌពោធិ៍សែនជ័យបានចុះទៅសម្រួលចរាចរមិនឲ្យមានការកកស្ទះព្រមទាំងវាស់វែងនិងនាំយកយានយន្តទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យរង់ចាំការដោះស្រាយគ្នាតាមផ្លូវច្បាប់៕
ចែករំលែកព័តមាននេះ