រាជធានីភ្នំពេញ ៖ យោងតាមរបាយការណ៍ប្រចាំឆ្នាំ២០១៨របស់ក្រសួងរៀបចំដែនដី នគរូបនីយកម្ម និងសំណង់ បង្ហាញថា ក្នុងឆ្នាំ២០១៨កន្លងមកនេះ គម្រោងសាងសង់លំនៅឋានចំនួន២.៤២០គម្រោង មានផ្ទៃក្រឡាសរុបជាង៤,៦លានម៉ែត្រការ៉េ និងមានទុនវិនិយោគប្រមាណ១.៨៣៥លានដុល្លារ បើធៀបនឹងឆ្នាំ២០១៧ មានចំនួន២.២៩១គម្រោង មានផ្ទៃក្រឡាជាង៥,៥លានម៉ែត្រការ៉េ និងមានទុនវិនិយោគប្រមាណ២.២៣០លានដុល្លារ ពោលគឺថយចុះប្រមាណ១៧,៧១% ។
ការធ្លាក់ចុះនេះ បើតាមអ្នកជំនាញក្នុងវិស័យអចនលទ្រព្យយល់ថា ដោយសារតែឆ្នាំ២០១៨កន្លងទៅនេះ ជាឆ្នាំបោះឆ្នោត ដែលធ្វើឲ្យអ្នកវិនិយោគ ឬអ្នកសាងសង់ហាក់នៅស្ទាក់ស្ទើរ ដោយរង់ចាំមើលលទ្ធផលក្រោយពេលបោះឆ្នោតសិន បើទោះបីជាពួកគាត់ដឹងថាមិនមានអ្វីកើនឡើងក៏ដោយ ។
លោក វ៉ា វីរៈ នាយកក្រុមហ៊ុន Century 21 Fortuna Investment មានប្រសាសន៍ នៅថ្ងៃទី១១ មករា ម្សិលមិញថា ៖« កាលពីឆ្នាំ២០១៨ សកម្មភាពនៃការសាងសង់សំណង់លំនៅឋានមានការកាត់បន្ថយបន្តិចបន្តួច ដោយសារអ្នកវិនិយោគទាំងក្នុងនិងក្រៅប្រទេស មានភាពស្ទាក់ស្ទើរឬរង់ចាំមើលឱកាស បើទោះបីពួកគេដឹងថា គ្មានបញ្ហាអ្វីនឹងកើនឡើងតាមរយៈការបោះឆ្នោតថ្នាក់ជាតិក៏ដោយ ។
ដោយឡែកសម្រាប់ប្រជាពលរដ្ឋសាងសង់ផ្ទះសម្រាប់រស់នៅធម្មតា ក៏ពួកគាត់នៅរង់ចាំមើលលទ្ធផលដូចគ្នា »។
លោកបញ្ជាក់ថា ការសាងសង់លំនៅឋាននៅតាមបណ្តាខណ្ឌនីមួយៗនៅមានសកម្មភាពដដែល ពិសេសខណ្ឌស្ថិតនៅកណ្តាលក្រុងនិងជាយក្រុង ដូចជា ទួលគោក, សែនសុខ, ជ្រោយចង្វា, ច្បារអំពៅ និងមានជ័យមានជាដើម ។ សម្រាប់ខណ្ឌផ្សេងទៀតក៏មានការរីកចម្រើនឡើងដែរដូចជានៅខណ្ឌពោធិ៍សែនជ័យ និងខណ្ឌព្រែកព្នៅ ។
នាយកក្រុមហ៊ុន Key Real Estate មានលោក សន សៀប បានមានប្រសាសន៍ដែរថា ទុនវិនិយោគក្នុងផ្នែកសំណង់លំនៅឋានថយចុះនេះ វាមិនជាបញ្ហានោះទេនៅពេលសកម្មភាពសាងសង់នៅមានភាពផុសផុល សកម្មភាពទិញលក់មិនមានការធ្លាក់ចុះ តែបើសិនការទិញលក់ធ្លាក់ចុះ ហើយការសាងសង់សំណង់មិនផុសផុល ឬមិនមានគម្រោងផ្សេងទៀតនោះ ទើបវាអាចនឹងមានបញ្ហា ។
លោក សន សៀប បន្ដថា ៖« មកដល់ពេលនេះ ការសាងសង់លំនៅឋាននៅតែមានសកម្មភាពផុសផុល ដែលភាគច្រើននៅតំបន់ជាយក្រុង ដូចជាខណ្ឌសែនសុខ, ខណ្ឌមានជ័យ និងខណ្ឌច្បារអំពៅសំបូរជាងគេ ។ ចំណែកសម្រាប់លំនៅឋានបែបខុនដូមាននៅខណ្ឌដូនពេញ, ទួលគោក និងខណ្ឌចំការមន។ រីឯ លំនៅឋានបែបបុរី មាននៅខណ្ឌសែនសុខ, ខណ្ឌមានជ័យ និងខណ្ឌច្បារអំពៅជាដើម ។
បើតាមក្រុមអ្នកជំនាញក្នុងវិស័យសំណង់ និងអចលនទ្រព្យកម្ពុជា យល់ថា ការសាងសង់សំណង់លំនៅឋាននៅក្នុងឆ្នាំ២០១៩នេះ វានឹងមានលក្ខណៈល្អជាងឆ្នាំ២០១៨ ដោយផ្អែកទៅលើស្ថានភាពនយោបាយ និងសន្ទុះកំណើនសេដ្ឋកិច្ច ។ ដោយឡែកនយោបាយនៅក្នុងតំបន់ និងក្រៅតំបន់មកដល់ឆ្នាំ២០១៩នេះឃើញថា មានភាពប្រសើជាងមុនដែលអាចធ្វើឱ្យវិនិយោគិនមានការវិនិយោគលើវិស័យផ្សេងៗ ជាពិសេសវាអាចផ្តល់ផលទៅដល់វិស័យអចលនទ្រព្យកម្ពុជាដែរ ៕
ចែករំលែកព័តមាននេះ