ខេត្តពោធិ៍សាត់ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវបានប្រជាពលរដ្ឋប្រទះដេកស្លាប់ស្តូកស្តឹងនៅលើកាណូតស្មាច់មួយគ្រឿងដែលរសាត់តាមទឹកពីក្បាលតោលមកទើរនៅចំណុចព្រែកកន្លុកតាថាក់ បង្កឱ្យមានការភ្ញាក់ផ្អើលកាលពីម៉ោង១១និង១៥នាទី ថ្ងៃទី១២ ខែមករា ឆ្នាំ២០១៩ ស្ថិតក្នុងភូមិព្រែកក្រ ឃុំមេទឹក…
ខេត្តពោធិ៍សាត់ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ត្រូវបានប្រជាពលរដ្ឋប្រទះដេកស្លាប់ស្តូកស្តឹងនៅលើកាណូតស្មាច់មួយគ្រឿងដែលរសាត់តាមទឹកពីក្បាលតោលមកទើរនៅចំណុចព្រែកកន្លុកតាថាក់ បង្កឱ្យមានការភ្ញាក់ផ្អើលកាលពីម៉ោង១១និង១៥នាទី ថ្ងៃទី១២ ខែមករា ឆ្នាំ២០១៩ ស្ថិតក្នុងភូមិព្រែកក្រ ឃុំមេទឹក ស្រុកបាកាង ខេត្តពោធិ៍សាត់។
សេចក្តីរាយការណ៍បន្តថា ជនរងគ្រោះឈ្មោះ អួក សាន អាយុ៥២ឆ្នាំ ភេទប្រុស រស់នៅភូមិក្បាលតោល ឃុំកោះជីវាំង ស្រុកឯកភ្នំ ខេត្តបាត់ដំបង មានស្រុកកំណើតនៅភូមិទី៤ សង្កាត់ចុងឃ្នាស ក្រុងសៀមរាប ខេត្តសៀមរាប ចំណែកប្រពន្ធឈ្មោះ ឡុង រ៉េត។
បើយោងតាមលោកអធិការនគរបាលស្រុកបាកាន បានឱ្យដឹងថា នៅថ្ងៃទី១២ មករា លោកវង្ស រិទ្ធីវ៉ាន់ ជាយោធាភូមិភាគ៥ ឈរជើងនៅភូមិដីរនាត បានទទួលដំណឹងពីពលរដ្ឋនៅភូមិក្បាលតោលប្រាប់ថា មានមនុស្សដេកស្លាប់នៅលើកាណូតស្មាច់រសាត់តាមទឹកពីក្បាលតោលមកទើរនៅចំណុចកន្លុកតាថាក់ ក្នុងភូមិព្រែកក្រ ឃុំមេទឹក ស្រុកបាកាង ខេត្តពោធិ៍សាត់។ ក្រោយមកកម្លាំងអធិការដ្ឋានស្រុកបាកាន បានចុះ ទៅសហការជាមួយលោកនាយប៉ុស្តិ៍កោះជី វាំង ស្រុកឯកភ្នំ ខេត្តបាត់ដំបង ចុះទៅត្រួតពិនិត្យនៅកន្លែងកើតហេតុ ។
សេចក្តីរាយការណ៍បន្តទៀតថា នៅកន្លែងកើតហេតុ គឺជនរងគ្រោះដេកផ្អៀងអង្កុញជើងលើកាណូតស្មាច់ ភ្នែកខាងស្តាំលៀនជាំខ្មៅ ហើយមានស្នាមវាយជាច្រើនដំបង ជនរងគ្រោះគ្មានខោ គឺមានតែអាវគ្របភួយ និងបន្សល់ទុកនាឡិកាដៃមួយគ្រឿងប៉ុណ្ណោះ។ តាមសន្និដ្ឋានជំហានដំបូងថា ករណីខាងលើសង្ស័យជាករណីឃាតកម្មគ្រោងទុកជាមុន ដែលកើតឡើងនៅក្បាលតោល រួចដាក់សពជនរងគ្រោះលើកាណូតស្មាច់រសាត់តាមទឹកមកទើរចំណុចព្រែកកន្លុកតាថាក់ ក្នុងភូមិព្រែកក្រ បង្កឱ្យមានការភ្ញាក់ផ្អើលតែម្តង ។
ក្រោយពេលពិនិត្យរួច នាយប៉ុស្តិ៍កោះជីវាំង បានប្រគល់សពជនរងគ្រោះទៅឱ្យប្រពន្ធជនរងគ្រោះយកទៅធ្វើបុណ្យតាមប្រពៃណី ។
ចែករំលែកព័តមាននេះ