ខេត្តព្រះសីហនុ ៖ តាមសេចក្តីរាយការណ៍បឋមបានឱ្យដឹងថា បុរសមិនស្គាល់អត្តសញ្ញាណម្នាក់ត្រូវបានរថយន្តធុនធំមួយគ្រឿងបុកស្លាប់ កាលពីវេលាម៉ោងប្រមាណជា៣ឈានចូលថ្ងៃទី១៣ មករា ២០១៩នេះ នៅតាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ១៨៤-១៨៥ ស្ថិតក្នុងភូមិបន្ទាយប្រីយ៍ ឃុំអណ្តូងថ្ម ស្រុកព្រៃនប់ ។
តាមសមត្ថកិច្ចជំនាញនគរបាលស្រុកបានអោយដឹងថា គ្រោះថ្នាក់ចរាចរណ៍នេះបានបង្កឡើងដោយរថយន្តធុនធំមួយគ្រឿងម៉ាកហ៊ីយ៉ាន់ដាយ ពណ៌ក្រហម ពាក់ផ្លាកលេខ ព្រះសីហនុ ៣A-០៩២៤ បើកបរដោយបុរសម្នាក់មិនស្គាល់អត្តសញ្ញាណ ធ្វើដំណើរក្នុងទិសដៅពីភ្នំពេញ ឆ្ពោះមកខេត្តព្រះសីហនុ លុះមកដល់ចំណុចខាងលើបានបុកអ្នកថ្មើរជើងម្នាក់មិនស្គាល់អត្តសញ្ញាណ ភេទប្រុស បណ្តាលឲ្យស្លាប់នៅនឹងកន្លែង ។
បច្ចុប្បន្នសមត្ថកិច្ចកំពុងស្រាវជ្រាវរកអត្តសញ្ញាណ និងក្រុមគ្រួសាររបស់ជនរងគ្រោះ ហើយគិតត្រឹមព្រឹកនេះ សពស្ថិតនៅកន្លែងកើតហេតុនៅឡើយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ