ខេត្តឧត្តរមានជ័យ ៖ ប៉ូលិសស្រុកបន្ទាយអម្ពឹលបានធ្វើការឃាត់ខ្លួនបុរសម្នាក់ដែលប្រព្រឹត្តពីបទចែកចាយនូវសារធាតុញៀន កាលពីវេលាម៉ោង៨ព្រឹក ថ្ងៃទី១២ មករា ២០១៩ ។ ហេតុការនេះបានកើតឡើងនៅនឹងផ្ទះជនសង្ស័យ ក្នុងភូមិទំនប់ចាស់ ឃុំបេង ស្រុកបន្ទាយអម្ពឹល ខេត្តឧត្តរមានជ័យ ។
ជនសង្ស័យដែលប៉ូលិសធ្វើការឃាត់ខ្លួនឈ្មោះ កោន មុត ភេទប្រុស អាយុ៤៤ឆ្នាំ រស់នៅភូមិទំនប់ចាស់ ឃុំបេង ស្រុកបន្ទាយអម្ពឹល សមត្ថកិច្ចធ្វើការឆែកឆេរដកហូតវត្ថុតាង រួមមានថ្នាំញៀនមេតំហ្វេតាមីន WY ចំនួន២៧៩គ្រាប់កន្លះ ថ្នាំញៀនម៉ាទឹកកក ICE ចំនួន៤កញ្ចប់ធំ និង១កញ្ចប់តូច ចិញ្ជៀនលោហធាតុពណ៌លឿង ចំនួន២វង់ ខ្សែដៃលោហធាតុពណ៌លឿងចំនួន១ខ្សែទូរស័ព្ទដៃ២គ្រឿង ។
ប៉ូលិសស្រុកបន្ទាយអម្ពឹលបានឱ្យដឹងថា មុនពេលឈានដល់ការឃាត់ខ្លួនបុរសរូបនេះប៉ូលិសបានធ្វើការស៊ើបអង្កេតជាយូរថ្ងៃមកហើយ ក្រោយពីបានឃាត់ខ្លួនសមត្ថកិច្ចបានធ្វើការឆែកឆេរកឃើញវត្ថុតាងនឹងនាំខ្លួនមកអធិការស្រុកបន្ទាយអម្ពឹលធ្វើការសាកសួរ ។ យោងតាមចម្លើយជនសង្ស័យនឹងយោងទៅលើវត្ថុតាងប៉ូលិសបានកសាងសំណុំរឿងជនសង្ស័យរួមទាំងវត្ថុតាងទៅតុលាការសាលាដំបូងខេត្តឧត្តរមានជ័យចាត់ការទៅតាមនីតិវិធីច្បាប់ ៕
ចែករំលែកព័តមាននេះ