នៅពេលដែលសម្តេចតេជោជួបជាមួយអ្នកសារព័ត៌មានរាប់ពាន់នាក់ នៅកោះពេជ្រ នៅល្ងាចថ្ងៃទី១១ ខែមករានេះ លោកកំពុងបំពេញការងារមួយដោយព្យាយាមធ្វើអោយមានលំហូរព័ត៌មានកាន់តែសេរី និងកាន់តែមានប្រយោជន៍ចំពោះប្រជាជនកម្ពុជា ។
ក្នងនាមជាអ្នកសារព័ត៌មានយើងគ្រប់គ្នាសប្បាយចិត្ត និងគាំទ្រដល់គ្រប់កិច្ចប្រឹងប្រែង ដើម្បីធ្វើអោយមានលំហូរសេរីព័ត៌មាន ដែលមានសារសំខាន់បំផុតនៅក្នុងសង្គមប្រជាធិបតេយ្យ ។
រដ្ឋធម្មនុញ្ញប្រទេសកម្ពុជាបានចែងថា កម្ពុជាកាន់លទ្ធិប្រជាធិបតេយ្យ ហើយសេរីភាពសារព័ត៌មាន និងសេរីភាពពាក់ព័ន្ធផ្សេងទៀតត្រូវបានធានា ។ការវិវត្តន៍នយោបាយចាប់តាំងពីឆ្នាំ២០១៧ មកនាំអោយមានការិះគន់អំពីដំណើរថយក្រោយនៃលទ្ធិប្រជាធិបតេយ្យនៅកម្ពុជា ។ ប៉ុន្តែខាងរដ្ឋាភិបាលកម្ពុជានៅតែអះអាងថា កម្ពុជានៅត ធ្វើដំណើរលើផ្លូវប្រជាធិបតេយ្យដ៏រឹងមាំមូយ ។ ការជួបជុំនៅថ្ងៃទី១១ ខែមករា ជាភស្តុតាងនៃការយកចិត្តទុកដាក់របស់សម្តេចតេជោ និងរដ្ឋាភិបាល ដើម្បីពង្រឹងសេរីភាពសារព័ត៌មាននៅកម្ពុជាព្រមទាំងលទ្ធិប្រជាធិបតេយ្យ ។
ប៉ុន្តែទោះបីជាយ៉ាងណាក៏ដោយចុះលំហូរសេរីនៃព័ត៌មានពាក់ព័ន្ធនឹងកត្តាជាច្រើន ។ សម្តេចតេជោបានបង្ហាញអំពីឆន្ទៈនយោបាយរបស់ថ្នាក់ដឹកនាំ នៅក្នុងការលើកស្ទួយសេរីភាពសារព័ត៌មាននៅប្រទេសកម្ពុជា ។ ប៉ុន្តែសេរីភាពសារព័ត៌មានរឹងមាំ ឬទន់ខ្សោយក៏ទាក់ទងផងដែរទៅលើវិជ្ជាជីវៈរបស់អ្នកសារព័ត៌មានទាក់ទងទៅនឹងទំនាក់ទំនងរវាងអ្នកសារព័ត៌មាន និងអ្នកនាំពាក្យ ឬក៏មនុស្សទទួលខុសត្រូវផ្នែកព័ត៌មាននៅក្នុងស្ថាបន័រដ្ឋព្រមទាំងកត្តាផ្សេងៗមួយចំនួនទៀត ។
សេរីភាពសារព័ត៌មាននឹងកាន់តែបើកជើងមេឃរបស់វាកាន់តែទូលំទូលាយ កាលបើអ្នកសារព័ត៌មានមានសមត្ថភាពគួបផ្សំនឹងសេរីភាពដែលគេមាន ។ នៅក្នុងន័យនេះ វាមានសារសំខាន់ខ្លាំងណាស់ ដល់ការចូលរួមចំណែកនៅក្នុងការបណ្តុះបណ្តាលអ្នកសារព័ត៌មានអោយមានចំណេះដឹងខ្ពង់ខ្ពស់ និងមានសីលធម៌ព្រមទាំងមានឆន្ទៈខ្ពស់នៅក្នុងការលើកកម្ពស់បេសកកម្មបម្រើផលប្រយោជន៍របស់មហាជនទូទៅដែលជាបេសកកម្មធំបំផុតរបស់សារព័ត៌មាន ។
ភាពក្លាហានរបស់អ្នកសារព័ត៌មានក៏មានសារសំខាន់ខ្លាំងណាស់ដែរ ។ អ្នកសារព័ត៌មានដែលមានចំណេះដឹងខ្ពង់ខ្ពស់ តែខ្វះភាពក្លាហានប្រៀបដូចជា«ដាវមុតដែលមិនដកចេញពីស្រោម» ។ ក្នុងន័យនេះអ្នកសារព័ត៌មានត្រូវហ៊ាននិយាយពិតនិយាយត្រង់រាល់គ្រប់បញ្ហាទាំងអស់នៅក្នុងសង្គមមិនថា ព័ត៌មានវិជ្ជមាន ឬអវិជ្ជមានឡើយ ។
ការសរសេរអំពីព័ត៌មានវិជ្ជមានពិតប្រាកដនឹងក្លាយជាការលើកទឹកចិត្តដល់រដ្ឋាភិបាល ដើម្បីបន្តការងារសកម្មរបស់ខ្លួនសម្រាប់ប្រជាជន និងប្រទេសជាតិ ។ សំខាន់ដូចគ្នានេះព័ត៌មានអំពីបញ្ហាសង្គមដែលមិនទាន់ដោះ ស្រាយរួចដូចជា បញ្ហាភាពក្រីក្រនៅតំបន់ដាច់ស្រយាល ឬក៏ការលំបាករបស់កម្មករជាដើមនឹងជួយអោយរដ្ឋាភិបាលយល់ដឹងកាន់តែច្បាស់អំពីបញ្ហានៅក្នុងសង្គម ហើយចាត់វិធានការដោះស្រាយបញ្ហាទាំងនោះជូនដល់ប្រជាជនដែលជាម្ចាស់ឆ្នោតនៅក្នុងប្រទេសលទ្ធិប្រជាធិបតេយ្យ ។
ទំនាក់ទំនងរវាងអ្នកសារព័ត៌មាន និងអ្នកនាំពាក្យរបស់ស្ថាប័នរដ្ឋក៏ជាកត្តាចាំបាច់មួយទៀតនៅក្នុងការលើកកម្ពស់សេរីភាពសារព័ត៌មាន និងលទ្ធិប្រជាធិបតេយ្យនៅកម្ពុជា ។ ពេលខ្លះ អ្នកសារព័ត៌មានបានត្អូញត្អែរអំពីការខ្វះកិច្ចសហការល្អពីស្ថាប័នរដ្ឋនៅពេលដែលពួកគេសាកសួរព័ត៌មានបន្ថែម ដើម្បីផ្ទៀងផ្ទាត់ការពិត ឬក៏ធ្វើអោយព័ត៌មានមានតុល្យភាព ។ ក្នុងន័យនេះការពង្រឹងសមត្ថភាពមន្ត្រីអ្នកនាំពាក្យរបស់ស្ថាប័នរដ្ឋ ក៏ជារឿងមួយដែលត្រូវធ្វើ ។
មិនតែប៉ុណ្ណោះ អ្នកនាំពាក្យក៏ចាំបាច់ត្រូវមានសិទ្ធិអំណាចគ្រប់គ្រាន់នៅក្នុងការផ្តល់ព័ត៌មានជូនដល់អ្នកសារព័ត៌មានផងដែរ ។ ដូច្នេះអ្នកនាំពាក្យគួរយល់ដឹងច្បាស់រាល់គ្រប់កិច្ចការរបស់ស្ថាប័នដែលខ្លួនធ្វើការអោយ ។ ទន្ទឹមនោះពួកគេគួរមានសិទ្ធិអាចទំនាក់ទំនងផ្ទាល់គ្រប់ពេលវេលាជាមួយនឹងមេដឹកនាំស្ថាប័ន ដើម្បីអាចឆ្លងយោបល់អំពីព័ត៌មានដែលគួរផ្តល់អោយដល់អ្នកសារព័ត៌មាន ។ក្នុងន័យនេះអ្នកសារព័ត៌មាន និងអ្នកនាំពាក្យ គឺប្រៀបដូចជាផ្នែកទាំងសងខាង«កាកប្រជាធិបតេយ្យ» ដែលមិនអាច អត់ខាងណាបានឡើយ ។ នៅពេលដែទាំងអ្នកសារព័ត៌មាន និងអ្នកនាំពាក្យបានយល់ដឹងច្បាស់អំពីទំនាក់ទំនងរបស់ពួកគេ និងបំពេញការងារតាមការទទួលខុសត្រូវរៀងៗខ្លួនបាននោះសេរីភាពសារព័ត៌មាននៅកម្ពុជានឹងកាន់តែលើកកម្ពស់បន្ថែមទៀត ។
ជាចុងក្រោយការចេញច្បាប់ស្តីពីសិទ្ធិទទួលព័ត៌មានដែលគេរង់ចាំជាយូរណាស់មកហើយនោះក៏ជាកត្តាចាំបាច់មួួយទៀត ដើម្បីធ្វើអោយសេរីភាពសារព័ត៌មាននៅកម្ពស់កាន់តែរីកលូតលាស់ខ្លាំងឡើង ។ នៅពេលដែលកត្តានយោបាយ កត្តាមនុស្ស និងកត្តាច្បាប់ត្រូវបានធានាសម្រាប់សេរីភាព សារព័ត៌មាននោះប្រទេសកម្ពុជានឹងកាន់តែមានមុខមាត់ខ្ពស់ក្នុងនាមជាប្រទេសប្រជាធិបតេយ្យដែលផ្តល់ការធានាយ៉ាងពេញលេញដល់សេរីភាពសារព័ត៌មាន ។
សូមអោយការជួបគ្នារវាងមេដឹកនាំកម្ពុជា និងអ្នកសារព័ត៌មានក្លាយទៅជាកម្លាំងចលករដែលមិនចេះនឿយហត់ ដើម្បីបុព្វហេតុសេរីភាពសារព័ត៌មាន និងប្រជាធិបតេយ្យនៅក្នុងប្រទេសកម្ពុជា ៕
ចែករំលែកព័តមាននេះ