រាជធានីភ្នំពេញ ៖ គ្រោះថ្នាក់ចរាចរណ៍រវាងម៉ូតូមួយគ្រឿងបុកគ្នាជាមួយម៉ូតូមួយគ្រឿងទៀត បណ្តាលឲ្យរងរបួសធ្ងន់២នាក់ និងស្រាល២នាក់ ត្រូវបានរថយន្តសង្គ្រោះចំនួន២គ្រឿងដឹកយកទៅសង្គ្រោះភ្លាមៗ ដែលហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៧និង១០នាទីយប់ថ្ងៃទី១០ ខែមករា ឆ្នាំ២០៩ នៅតាមបណ្ដោយផ្លូវសហព័ន្ធរុស្ស៊ី ជាប់របងព្រលានយន្តហោះអន្តរជាតិភ្នំពេញ ដែលស្ថិតនៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ។
ភាគីម៉ូតូមួយគ្រឿងស៊ីធីផ្លើស ពណ៌ក្រហម ពាក់ស្លាកលេខ ភ្នំពេញ ១FS-៨៤៩១ បើកបរដោយបុរសម្នាក់មិនស្គាល់អត្តសញ្ញាណ បានរងរបួសធ្ងន់រយះជើងខាងស្ដាំ និងបែកក្បាល។
ចំណែកភាគីម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ ១CY-៧៤៩៤ បើកបរដោយបុរសម្នាក់មានដឹកប្រពន្ធនិងកូនស្រី ។ ស្ត្រីជាប្រពន្ធបានរងរបួសធ្ងន់ ។
តាមប្រភពព័ត៌មានពីកន្លែងកើតហេតុបាននិយាយថា មុនពេលកើតហេតុ គេឃើញបុរសម្នាក់បើកបរម៉ូតូមួយគ្រឿងម៉ាកស៊ីធីផ្លើស ពណ៌ក្រហម ធ្វើដំណើរក្នុងទិសដៅពីត្បូងទៅជើងក្នុងល្បឿនយ៉ាងលឿន លុះបើកមកដល់ចំណុចកើតហេតុ បានបុកចំពីក្រោយឈ្នាន់ខាងឆ្វេងរបស់ម៉ូតូមួយគ្រឿងទៀតម៉ាកហុងដាឌ្រីមដែលជិះគ្នា៣នាក់ បណ្តាលអោយស្ត្រីជាប្រពន្ធធ្លាក់ពីលើម៉ូតូរងរបួសធ្ងន់ ចំណែកអ្នកបើកបរម៉ូតូម៉ាកស៊ីធីផ្លើស ពណ៌ក្រហម រងរបួសរយះជើងខាងស្ដាំ និងបែកក្បាលយ៉ាងធ្ងន់ធ្ងរ។
ប្រភពព័ត៌មានបានបន្តទៀតថា ពេលគ្រោះថ្នាក់ភ្លាមៗ រថយន្តសង្គ្រោះរបស់គ្លីនិកឯកជនមួយគ្រឿងបានមកដឹកយកជនរងគ្រោះដែលជាអ្នកបើកបរម៉ូតូម៉ាកស៊ីធីផ្លើស យកទៅសង្គ្រោះភ្លាមៗផងដែរ ចំណែកឯភាគីម្ខាងទៀតត្រូវបានរថយន្តសង្គ្រោះរបស់អង្គភាព៧១១បានដឹកយកទៅសង្គ្រោះនៅមន្ទីរពេទ្យ ព្រះកុសុមៈ ជាបន្តបន្ទាប់គ្នា។
បន្ទាប់ពីដឹកជនរងគ្រោះទៅសង្គ្រោះនៅមន្ទីរពេទ្យអស់ហើយ កំលាំងនគរបាលប៉ុស្តិ៍ចោមចៅទី៣បានប្រគល់អោយជំនាញចរាចរណ៍ខណ្ឌពោធិ៍សែនជ័យ ដើម្បីធ្វើការវាស់វែង និងយកម៉ូតូទាំង២គ្រឿងខាងលើទៅរក្សាទុកដើម្បីរង់ចាំការដោះស្រាយនៅថ្ងៃក្រោយ ៕
ចែករំលែកព័តមាននេះ