ខេត្តព្រៃវែង ៖ បើទោះបីជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានប្រកាសរំលាយឡូត៍នេសាទនៅទូទាំងប្រទេស ដើម្បីបើកអោយប្រជាពលរដ្ឋអាចចូលទៅធ្វើការនេសាទជាលក្ខណៈគ្រួសារបានយ៉ាងក្តី ប៉ុន្តែរយៈពេលជាង៥ឆ្នាំមកនេះគេសង្កេតឃើញថា ទីតាំងអតីតឡូត៍នេសាទទាំងនោះនៅតែត្រូវបានគ្រប់គ្រងដោយឈ្មួញធំៗដដែល ដោយគ្រាន់តែដូររូបភាពពីថៅកែឡូនេសាទ មកជាសហគមន៍នេសាទវិញ ក្រោមការជួយសម្របសម្រួលពីមន្ត្រីជំនាញ និងអាជ្ញាធរ ។
ជាក់ស្តែងដូចជា ទីតាំងអតីតឡូត៍នេសាទលេខ៥ ដែលស្ថិតនៅចំណុចព្រំប្រទល់នៃស្រុកពោធ៌រៀង និងស្រុកពាមរក៌ មន្ទីរកសិកម្មខេត្ត និងអាជ្ញាធខេត្ត បានចេញលិខិតអនុញ្ញាតិអោយសហគមន៍ ឃុំពោធ៌រៀងដាក់របាំង និងនេសាទត្រីជាលក្ខណៈគ្រួសារ ដោយប្រើឧបករណ៍មង អួន សំណាញ់ជាដើម ប៉ុន្តែធាតុពិតសហគមន៍នេះមិនបានដឹងរឿងអ្វីទាំងអស់ អ្នកធ្វើពិតប្រាកដ គឺឈ្មួញម្នាក់ឈ្មោះ ធី ជាជនជាតិវៀតណាម មានទីលំនៅក្នុងភូមិបាទី ឃុំពាមរក៌ ស្រុកពាមរក៌ ហើយរូបភាពនៃការនេសាទក៏ខុសច្បាប់ដែរ គឺគេធ្វើរបាំងព្រួលបិទស្ទើរជិតទន្លេ ហើយដាក់យ៉ស្បៃមុងត្រងចាប់ត្រីយកតែម្តង ក្នុង១ថ្ងៃៗរាប់តោនត្រី ។
ដោយឡែកអតីតឡូនេសាទលេខ១៨ លេខ១៩ និងឡូលេខ២០ ដែលស្ថិតនៅក្នុងស្រុកពាមជរ និងស្រុកព្រះស្តេចវិញក៏មិនខុសគ្នាពីឡូលេខ៥ដែរ គឺត្រូវបានគ្រប់គ្រងដោយឈ្មួញជាអតីតថៅកែឡូត៍ដដែល ដោយគ្រាន់តែដូររូបភាពមកប្រើឈ្មោះ ជាសហគមន៍វិញប៉ុណ្ណោះ ដើម្បីកុំអោយខុសបទបញ្ជារបស់សម្តេចតេជោ ដែលបានប្រកាសរំលាយឡូត៍នេសាទហើយនោះ ។
ប្រភពព័ត៌មានពីមន្ត្រីមួយចំនួននៅក្នុងខេត្តព្រៃវែងបានបង្ហើបអោយដឹងថា មូលហេតុដែលមន្ត្រីជំនាញ និងអាជ្ញាធរ នៅតែបិទភ្នែកម្ខាងបើកភ្នែកម្ខាង អោយក្រុមឈ្មួញប្រើឈ្មោះសហគមន៍ដាក់ដាយ ដាក់យ៉ ប្រមូលចាប់ត្រីក្នុង១ថ្ងៃៗរាប់តោនពីទីតាំងអតីតឡូត៍នេសាទទាំងនោះ គឺដោយសារតែវាជាប្រភពនៃប្រាក់ចំណូលដ៏ធំរបស់រដ្ឋបាលស្រុក និងខេត្តសម្រាប់យកទៅប្រើប្រាស់លើការងារអភិវឌ្ឍន៍នៅក្នុងមូលដ្ឋាន ជាក់ស្តែងសម្រាប់រដូវនេសាទឆ្នាំនេះរដ្ឋបាលស្រុកពាមជរ ប្រមូលប្រាក់ពីក្រុមឈ្មួញបានជាង៣ម៉ឺនដុល្លារ ប៉ុន្តែប្រាក់ទាំងនោះត្រូវបានគេចែកគ្នាដាក់ហោប៉ៅអស់ មិនបានយកទៅអភិវឌ្ឍន៍អ្វីទេ ។
ជុំវិញរឿងរ៉ាវខាងលើនេះលោក អូន ស៊ីណាត នាយខណ្ឌរដ្ឋបាលជលផលព្រៃវែង បានទទួលស្គាល់ថា ថ្នាក់ដឹកនាំខេត្តពិតជាបានចេញលិខិតអនុញ្ញាតិ អោយសហគមន៍នេសាទទាំងនោះដាក់របាំងព្រួលចាប់ត្រីមែន តែតម្រូវអោយយកប្រាក់ដែលបានពីការចាប់ត្រីយកទៅធ្វើការអភិវឌ្ឍន៍នៅក្នុងមូលដ្ឋាន ជាក់ស្តែងដូចជាឡូនេសាទលេខ៥ លេខ៧ និងលេខ១០ ត្រូវយកទៅស្តាព្រែកពាមស្តី និងព្រែកល្បាប់ជាង១km ហើយនៅតាមឡូផ្សេងៗទៀតក៏ប្រើរូបមន្តនេះដែរ ៕
ចែករំលែកព័តមាននេះ