រាជធានីភ្នំពេញ ៖ ក្រុមហ៊ុនចិនដ៏ធំមួយ បានសម្រេចបោះទុនវិនិយោគទឹកប្រាក់រាប់លានដុល្លារអាមេរិក ដើម្បីទីក្រុងរណបលំដាប់អន្តរជាតិមួយនៅក្រុងវិត ខេត្តស្វាយរៀង ។ បើតាមអគ្គនាយកក្រុមហ៊ុន Empire World…
រាជធានីភ្នំពេញ ៖ ក្រុមហ៊ុនចិនដ៏ធំមួយ បានសម្រេចបោះទុនវិនិយោគទឹកប្រាក់រាប់លានដុល្លារអាមេរិក ដើម្បីទីក្រុងរណបលំដាប់អន្តរជាតិមួយនៅក្រុងវិត ខេត្តស្វាយរៀង ។
បើតាមអគ្គនាយកក្រុមហ៊ុន Empire World លោក Aric Loo ដែលជាអ្នកវិនិយោគគម្រោងទីក្រុងរណបនេះ បានឲ្យដឹងនាព្រឹកថ្ងៃទី៩ មករា ម្សិលមិញថា លោកបានសិក្សាពីបណ្តាប្រទេសក្នុងតំបន់អាស៊ាន និងបណ្តាទីក្រុងសំខាន់ៗរបស់កម្ពុជា ទើបចុងក្រោយសម្រេចវិនិយោគគម្រោងទីក្រុងរណបនេះឡើង ដែលជាគម្រោងលំដាប់អន្តរជាតិដ៏ធំមួយលាតសន្ធឹងលើផ្ទៃដីជាង១ពាន់ហិកតា ប៉ុន្តែដំណាក់លកាលទី១ ក្រុមហ៊ុនអភិវឌ្ឍន៍ទីក្រុងនេះលើផ្ទៃដី៥៧ហិកតាសិន ។ លោកបន្តថា ៖« ទីក្រុងរណបនេះមានរួមបញ្ចូលនូវកាស៊ីណូ សណ្ឋាគារកម្រិតផ្កាយ៥ អាផាតម៉ិនប្រណីត បណ្តុំនៃភោជនីយដ្ឋាន និងមជ្ឈមណ្ឌលបច្ចេកវិទ្យា ដើម្បីធ្វើយ៉ាងណាជួយរាជរដ្ឋាភិបាលគ្រប់គ្រងGame Onlineនៅកម្ពុជា »។
លោកបញ្ជាក់ថា ៖« រហូតមកទល់ពេលនេះមានក្រុមហ៊ុនចំនួនជាង៤០ហើយដែលបានសហការជាមួយយើង និងហាងអាហារ និងភេជ្ជៈល្បីៗប្រមាណ១០០បានចុះកុងត្រារួចរាល់ដើម្បីបើកនៅក្នុងគម្រោងនេះ »។ ក្រៅពីទីក្រុងរណបនេះ ក្រុមហ៊ុនរបស់ចិនមួយទៀត ក៏បានបើកដំណើរការសាងសង់ទីក្រុងរណបលើផ្ទៃដី៧ហិកតា នៅក្នុងទីក្រុងបាវិតរួចហើយ ដោយដាក់ឈ្មោះទីក្រុងហេងហេង ។
លោកAric Looបានមានប្រសាសន៍ទៀតថា ក្រុងបាវិតមានលក្ខណៈពិសេសជាច្រើន ដោយស្ថិតនៅក្នុងគម្រោង« ខ្សែក្រវាត់មួយ ផ្លូវមួយ» របស់ចិន និងមានទីតាំងនៅកៀកនឹងក្រុងហូជីមិញ ប្រទេសវៀតណាម ដែលងាយស្រួលក្នុងការដឹកជញ្ជូន និងពង្រីកការតភ្ជាប់លើវិស័យពាណិជ្ជកម្ម ។
តាមព័ត៌មានជាក់លាក់បានឲ្យដឹងថា បច្ចុប្បន្នមានជនជាតិចិន និងអ្នកវិនិយោគចិនប្រមាណ៥០ម៉ឺននាក់ហើយដែលបាននិងកំពុងធ្វើការ និងវិនិយោគនៅទីក្រុងនេះ ដែលនៅឆ្នាំ២០២៥ខាងមុខ ទីក្រុងបាវិតនឹងមានមនុស្សរស់នៅប្រមាណ២០ម៉ឺននាក់ ។ លោកAric Looបានបន្តថា ៖« គោលដៅនៃការអភិវឌ្ឍទីក្រុងរណបនេះ យើងនឹងសហការជាមួយដៃគូវិនិយោគអន្តរជាតិដទៃទៀត ដែលបច្ចុប្បន្នមានក្រុមហ៊ុនកាន់តែច្រើនបានចាប់អារម្មណ៍ ក្រៅពីដៃគូដែលយើងមានប្រមាណ៤០ក្រុមហ៊ុនរួចហើយ »។
រដ្ឋាភិបាលកម្ពុជាបានដាក់ក្រុងបាវិតជាតំបន់អភិវឌ្ឍន៍ឧស្សាហកម្ម ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ជាមួយទីក្រុងពីរផ្សេងទៀត គឺខេត្តព្រះសីហនុ និងក្រុងប៉ោយប៉ែត ។
ក្រុងនៃឧស្សាហកម្ម មានន័យថា រាជរដ្ឋាភិបាលនឹងរៀបចំហេដ្ឋារចនាសម្ព័ន្ឋទាំងផ្នែករឹង និងផ្នែកទន់ ដើម្បីប្រែក្លាយជាមជ្ឈមណ្ឌលឧស្សាហកម្ម ពាណិជ្ជកម្ម និងហិរញ្ញវត្ថុលំដាប់ពិភពលោក ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ថា វាជាសញ្ញាវិជ្ជមានមួយសម្រាប់ក្រុងបាវិត ខេត្តស្វាយរៀង ដោយសារវាជាតំបន់មួយដេលស្ថិតនៅព្រំប្រទល់កម្ពុជា-វៀតណាម និងជាទីក្រុងមួយដែលរដ្ឋាភិបាលជ្រើសរើសម្រាប់អភិវឌ្ឍន៍វិស័យឧស្សាហកម្ម ។
លោកមានប្រសាសន៍ថា ៖« សម្រាប់ប្រទេសរបស់យើងនៅតូចណាស់ ហេតុនេះការវិនិយោគគម្រោងនេះឡើង វាមិនទាន់ស័ក្តិសមនឹងអ្វីដែលយើងចង់បាននៅឡើយ តែវាជាអ្វីដែលបង្កើនការទាក់ទាញការវិនិយោគថែមទៀត »។ លោកបន្តថា ៖« ធម្មតា ការសាងសង់ទីក្រុងរណបមួយ គឺត្រូវការមនុស្សទៅរស់នៅច្រើន តែបើគម្រោងគាត់មានដៃគូវិនិយោគដទៃទៀត និងអាចបង្កើនការទាក់ទាញមនុស្សចូលទៅរស់នៅកាន់តែច្រើន នោះជាសក្តានុពលសំខាន់មួយ »។ លោកបន្តថា ៖« តម្លៃដីនៅក្នុងទីក្រុងនេះនឹងហក់ឡើងលឿននាពេលឆាប់ៗនេះ ដោយសារកំណើនអ្នកវិនិយោគ ព្រោះបច្ចុប្បន្នមានទីក្រុងរណបពីរហើយដែលបាននិងកំពុងសាងសង់តំបន់នេះ »៕
ចែករំលែកព័តមាននេះ