រាជធានីភ្នំពេញ ៖ បន្ទាប់ពីទន្ទឹងរង់ចាំអស់រយៈពេលជាច្រើនខែមក ក្បាលរថភ្លើងថ្មីចំនួន៣គ្រឿងដែល ផលិតនៅប្រទេសម៉ិកស៊ិក បានដល់កំពង់ផែស្វយ័តក្រុងព្រះសីហនុហើយកាលថ្ងៃទី៨ មករា កន្លងមក ហើយពេលនេះ ថ្នាក់ដឹកនាំក្រសួងសាធារណការ កំពុងតែត្រៀមរៀបចំពិធីដាក់ដំណើរការនាពេលខាងមុខ ក្រោមវត្តមានដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ក្នុងពិធីសន្និបាតបូកសរុបការងារឆ្នាំ២០១៨ និងទិសដៅការងារឆ្នាំ២០១៩ កាលពីថ្ងៃទី៩ មករា ម្សិលមិញ នៅទីស្តីការក្រសួង លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា ក្បាលរថភ្លើងថ្មីចំនួន៣គ្រឿងដែលយើងទន្ទឹងរង់ចាំអស់រយៈពេលជាច្រើនខែកន្លងមកនេះ ឥឡូវបានដឹកមកដល់កំពង់ផែស្វយ័តក្រុងព្រះសីហនុយប់មិញហើយ(យប់ថ្ងៃទី៨ មករា) »។ លោកទេសរដ្ឋមន្ត្រីបន្តថា ៖« យើងនឹងសុំការអនុញ្ញាតពីសម្តេចអគ្គមហាសេនាបតីតេជោ ហ៊ុន សែន ដើម្បីអញ្ជើញលោកដាក់ឱ្យប្រើប្រាស់ជាផ្លូវនូវរទះភ្លើង៣គ្រឿងនេះ ដើម្បីធ្វើដំណើរពីភ្នំពេញទៅព្រលានយន្តហោះភ្នំពេញ ឬអាចយករទះភ្លើងនេះទៅរត់ទៅដល់ក្រុងព្រះសីហនុ ឬទៅដល់ក្រុងប៉ោយប៉ែតតែម្តង »។ ក្រសួងសាធារណការ និងដឹកជញ្ជូន កំពុងតែជំរុញការចរចាកិច្ចព្រមព្រៀងសម្បទានរវាងរាជរាជរដ្ឋាភិបាល និងក្រុមហ៊ុនរ៉ូយ៉ាល់ គ្រុប ដើម្បីគ្រប់គ្រងផ្លូវដែកពីភ្នំពេញទៅក្រុងព្រះសីហនុ ឬពីភ្នំពេញទៅប៉ោយប៉ែត ។
លោក ចន ហ្គារី នាយកប្រតិបត្តិក្រុមហ៊ុនរ៉ូយ៉ាល់រេលវេ បានឲ្យដឹងថា រថភ្លើង ស៊េរីទំនើបចំនួន៣គ្រឿងនេះ ក្រុមហ៊ុន Royal Railway Cambodia បានបញ្ជាទិញពីប្រទេសម៉ិកស៊ិក ហើយនឹងត្រូវយកមកប្រើប្រាស់សម្រាប់ដឹកអ្នកដំណើរពីស្ថានីយរថភ្លើងភ្នំពេញឆ្ពោះទៅកាន់អាកាសយានដ្ឋានអន្តរជាតិភ្នំពេញ, ពីស្ថានីយរថភ្លើងភ្នំពេញ ឆ្ពោះទៅកាន់ក្រុងប៉ោយប៉ែត និងពីស្ថានីយភ្នំពេញ ទៅកាន់ក្រុងព្រះ
សីហនុ ។ លោក ចន ហ្គារី បន្តថា រថភ្លើងទំនើបនេះមួយៗមានបណ្តោយប្រវែង១៨ម៉ែត្រ ទទឹង២ម៉ែត្រកន្លះ អាចដឹកភ្ញៀវបាន៧៨នាក់ និងមានល្បឿន៨០ទៅ១០០គីឡូម៉ែត្រក្នុង១ម៉ោង និងជាមធ្យមពី៧០ទៅ៨០គីឡូម៉ែត្រក្នុង១ម៉ោងទៅតាមស្ថានភាពផ្លូវ ។
លោកបានឲ្យដឹងទៀតថា រថភ្លើងទំនើបថ្មីទាំង៣គ្រឿងនេះ មាន ក្បាលម៉ាស៊ីនខាងមុខមួយ និងខាងក្រោយមួយ ជារថភ្លើងដែលបំពាក់ដោយបច្ចេកវិទ្យាចុងក្រោយបំផុត ប្រកបដោយសុវត្ថិភាពខ្ពស់និងទំនើបមានទាំងទ្វារស្វ័យប្រវត្តិ ជណ្តើរ កៅអី ម៉ាស៊ីនត្រជាក់ បន្ទប់ទឹក កន្លែងដាក់អីវ៉ាន់ ប្រព័ន្ធអុីនធើរណេត(Wifi) ទូរទស្សន៍ និងប្រព័ន្ធ ផ្ដល់ព័ត៌មានតាមវីដេអូទៀតផង ។ លោកបញ្ជាក់ថា វត្តមានរថភ្លើងល្បឿនលឿននាពេលនេះ គឺជាមោទនភាពរបស់ព្រះរាជាណាចក្រកម្ពុជាក្នុងសម័យកាលបច្ចុប្បន្ន ក្នុងការចូលរួមជួយសម្រួលការធ្វើដំណើររបស់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិផងដែរ ហើយក៏ជាផ្នែកមួយក្នុងការកាត់បន្ថយការស្ទះចរាចរណ៍ និងមានសុវត្ថិភាពក្នុងការធ្វើដំណើរទៀតផង
មន្ត្រីអ្នកនាំពាក្យក្រសួងសាធារណការ និងដឹកជញ្ជូន មានប្រសាសន៍ថា ការមកដល់នូវក្បាលរថភ្លើងថ្មីទាំង៣គ្រឿងនេះ នឹងចូលរួមធ្វើឱ្យប្រជាពលរដ្ឋមានការសប្បាយចិត្តក្នុងការទទួលយកសេវា ។
លោក វ៉ាស៊ឹម សុរិយា មន្ត្រីរូបនេះមានប្រសាសន៍ថា ៖« ក្នុងនាមក្រសួងយើងចង់ឱ្យមានការប្រើប្រាស់ឱ្យច្រើន ហើយជាទូទៅ អ្វីដែលថ្មីតែងតែមានការទាក់ទាញ »។ លោកបន្តថា ៖« ការដាក់ឱ្យដំណើរការសេវាតាមផ្លូវដែក យើងមានគោលបំណងតែមួយ គឺជួយសម្រួលដល់អ្នកធ្វើដំណើរទាំងអស់ មិនថាពលរដ្ឋឬភ្ញៀវទេសចរនោះទេ ពួកគាត់អាចធ្វើដំណើរបានទាំងអស់គ្នា។ លើសពីនេះវាចូលរួមជួយសម្រួលដល់អ្នកឡើងឬចុះយន្តហោះ នៅពេលចរាចរណ៍មានភាពកកស្ទះ ពិសេសទៅថ្ងៃអនាគត ពេលចរាចរណ៍កើនឡើង »។ បើតាមលោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម បានឲ្យដឹងកាលពីពេលកន្លងមកថា ការធ្វើដំណើរតាមរថភ្លើង ជាការជួយសម្រួលបញ្ហាចរាចរណ៍ ដែលកំពុងកកស្ទះនៅទីក្រុងភ្នំពេញ ហើយវាជួយលើកកម្ពស់សោភ័ណភាពក្នុងទីក្រុងផងដែរ ។
លោកថ្លែងថា ៖« ការវិនិយោគបែបនេះ មិនត្រឹមតែផ្តល់ផលចំណេញដល់បញ្ហាចរាចរណ៍ទេ តែក៏រួមចំណែកកាត់បន្ថយផលប៉ះពាល់បរិស្ថាននិងកាត់បន្ថយអត្រាគ្រោះថ្នាក់ចរាចរណ៍ផងដែរ »។
សូមបញ្ជាក់ថា ការដំណើរតាមរថភ្លើងពីភ្នំពេញទៅប៉ោយប៉ែត ត្រូវចេញដំណើរពីស្ថានីយរថភ្លើងនៅម៉ោង៧ព្រឹក និងទៅដល់ប៉ោយប៉ែតនៅម៉ោង១៨ និង៤៥នាទី ។ ចំណែកការធ្វើដំណើរពីក្រុងប៉ោយប៉ែតមកភ្នំពេញវិញ គឺចាប់ចេញដំណើរនៅម៉ោង៧ព្រឹក និងមកដល់រាជធានីភ្នំពេញនៅម៉ោង១៨និង៤៥នាទីដូចគ្នា។ ទោះបីយ៉ាងណា ការចេញដំណើរជាក់ស្ដែង អាចនឹងមានការប្រែប្រួលតិចតួច ។ នេះបើតាមតារាងម៉ោងរថភ្លើងអ្នកដំណើរនៅតាមស្ថានីយភ្នំពេញ-ប៉ោយប៉ែត ៕
សូមបញ្ជាក់ថា ការដំណើរតាមរថភ្លើងពីភ្នំពេញទៅប៉ោយប៉ែត ត្រូវចេញដំណើរពីស្ថានីយរថភ្លើងនៅម៉ោង៧ព្រឹក និងទៅដល់ប៉ោយប៉ែតនៅម៉ោង១៨ និង៤៥នាទី ។ ចំណែកការធ្វើដំណើរពីក្រុងប៉ោយប៉ែតមកភ្នំពេញវិញ គឺចាប់ចេញដំណើរនៅម៉ោង៧ព្រឹក និងមកដល់រាជធានីភ្នំពេញនៅម៉ោង១៨និង៤៥នាទីដូចគ្នា។ ទោះបីយ៉ាងណា ការចេញដំណើរជាក់ស្ដែង អាចនឹងមានការប្រែប្រួលតិចតួច ។ នេះបើតាមតារាងម៉ោងរថភ្លើងអ្នកដំណើរនៅតាមស្ថានីយភ្នំពេញ-ប៉ោយប៉ែត ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ