រាជធានីភ្នំពេញ ៖ ជនជាតិចិនម្នាក់ជាប្រធានគណនេយ្យរបស់ក្រុមហ៊ុនលាយបេតុង បានត្រូវអ្នកបើកបររថយន្តយកពិលឆក់វាយដណ្តើមយកលុយអស់ជិត១០មុឺនដុល្លារ ខណៈធ្វើដំណើរមកពីដកប្រាក់នៅធនាគារ ។ ក្រោយវាយប្លន់យកប្រាក់បានហើយ ជននោះក៏ប្លុងរថយន្តចោលរួចរត់គេចខ្លួនបាត់ កាលពីវេលាម៉ោង១០និង១៥នាទីព្រឹកថ្ងៃទី៩ ខែមករា…
រាជធានីភ្នំពេញ ៖ ជនជាតិចិនម្នាក់ជាប្រធានគណនេយ្យរបស់ក្រុមហ៊ុនលាយបេតុង បានត្រូវអ្នកបើកបររថយន្តយកពិលឆក់វាយដណ្តើមយកលុយអស់ជិត១០មុឺនដុល្លារ ខណៈធ្វើដំណើរមកពីដកប្រាក់នៅធនាគារ ។ ក្រោយវាយប្លន់យកប្រាក់បានហើយ ជននោះក៏ប្លុងរថយន្តចោលរួចរត់គេចខ្លួនបាត់ កាលពីវេលាម៉ោង១០និង១៥នាទីព្រឹកថ្ងៃទី៩ ខែមករា នៅតាមផ្លូវលំ ភូមិសំរោង សង្កាត់ឃ្មួញ ខណ្ឌសែនសុខ ។
ជនរងគ្រោះឈ្មោះ លុង លីន ភេទប្រុស អាយុ៥៦ឆ្នាំ ជាប្រធានគណនេយ្យនៅក្រុមហ៊ុន លាយបេតុង CHINA XIN CHENG CON CRETE CAMBODIA CO.LTD ។ ចំណែកជនសង្ស័យជាអ្នក បើក បររថយន្តឲ្យជនជាតិចិនរូបនេះ ត្រូវបានខាងក្រុមហ៊ុនប្រាប់ថា ឈ្មោះ អ៊ុង សុគន្ធ ភេទប្រុស អាយុ៤៣ឆ្នាំ មានទីលំនៅផ្ទះលេខ៥៦១E១ ផ្លូវលេខ១១៨ ភូមិ៩ សង្កាត់ផ្សារដេប៉ូ៣ ខណ្ឌទួលគោក បានប្លន់យកលុយ
ចំនួន៩៩.៦៧៩ដុល្លាររួចគេចខ្លួនបាត់ស្រមោល ។
តាមការប្រាប់ពីអត្តសញ្ញាណជនសង្ស័យ គឺជននោះទើបចូលបម្រើការងារនៅក្រុមហ៊ុនខាងលើ កាលពីថ្ងៃទី២ ខែវិច្ឆិកា ឆ្នាំ២០១៨ កន្លងមក គឺទើបតែបានជាង២ខែប៉ុណ្ណោះ ជាអ្នកបើកបររថយន្តឲ្យថៅកែ ។តាមប្រភពព័ត៌មានបន្តទៀតថា មុនកើតហេតុ នាវេលាម៉ោង៨ និង៣០នាទីព្រឹកថ្ងៃទី៩ ខែមករា ជនសង្ស័យបានដឹកជនជាតិចិន ដែលជាប្រធានគណនេយ្យទៅបើកលុយនៅធនាគារចិនមួយកន្លែង ក្បែរស្ថានីយរថភ្លើងក្នុងខណ្ឌដូនពេញ ដោយបើកលុយចំនួន៩៩.៦៧៩ដុល្លារ។ ពួកគេជិះរថយន្តព្រូសមួយគ្រឿង ពណ៌ឈាមជ្រូក ពាក់ផ្លាកលេខ ភ្នំពេញ ២AW-២១៧៦៣ លុះដកបានហើយក៏វិលត្រឡប់មកក្រុមហ៊ុនវិញ ។
ខណៈមកដល់ចំណុចស្ងាត់ ស្រាប់តែជនសង្ស័យឈប់រថយន្ត ហើយដណ្តើមយកកាបូបដាក់លុយ រួចក៏មានការប្រវាយប្រតប់គ្នា ដោយជននោះបានយកពិលឆក់ ធ្វើសកម្មភាពឆក់ និងវាយជនរងគ្រោះដណ្តើមយកលុយបានហើយ ក៏ចុះរត់គេចខ្លួនបាត់ទៅ ។ ការប្រវាយប្រតប់គ្នានោះ បានធ្វើឲ្យប្រធានគណនេយ្យរូបនេះរងគ្រោះរបួសខ្នង ដៃ និងជើង ។
ក្រោយកើតហេតុ ជនរងគ្រោះបានទៅប្តឹងនគរបាលប៉ុស្តិ៍ឃ្មួញឲ្យជួយអន្តរាគមន៍ និងធ្វើការស្រាវជ្រាវរកជនសង្ស័យ ដើម្បីចាប់ខ្លួនយកមកផ្តន្ទាទោស ៕
ចែករំលែកព័តមាននេះ