រាជធានីភ្នំពេញ ៖ អ្នកនាំពាក្យព្រឹទ្ធសភាលោក ម៉ម ប៊ុននាងបានអះអាងថា ការធ្វើវិសោធនកម្មសេចក្តីស្នើវិសោធនកម្មច្បាប់ស្តីពីការគ្រប់គ្រងរដ្ឋបាលរាជធានីខេត្ត ក្រុង ស្រុង ខណ្ឌ និងសេចក្តីស្នើច្បាប់ស្តីពីវិសោធនកម្មច្បាប់ការបោះឆ្នោតជ្រើសរើសក្រុមប្រឹក្សារាជធានីក្រុម ប្រឹក្សាក្រុង ក្រុមប្រឹក្សាស្រុកក្រុមប្រឹក្សាខណ្ឌក៏ជាការបើកឱកាសដល់យុវជនដែលមាន សម ត្ថភាព ហើយមានបំណងអភិវឌ្ឍន៍ភូមិឃុំរបស់ខ្លួនផងដែរ ។
ការអះអាងរបស់អ្នកនាំពាក្យព្រឹទ្ធសភានេះ ខណៈដែលគណៈកម្មាធិការអចិន្ត្រៃយ៍បានកំណត់យកថ្ងៃទី១១ មករា ដើម្បីបើកសម័យប្រជុំព្រឹទ្ធសភា នីតិកាលទី៤ ដើម្បីពិភាក្សាលើកសេចក្តីព្រាងច្បាប់ទាំងពីរខាងលើនេះ ក្រោមអធិបតីភាពសម្តេចសេនាវិបុលភក្តីសាយ ឈុំ ប្រធានព្រឹទ្ធសភា ។
លោក ម៉ម ប៊ុននាង បានបញ្ជាក់ឲ្យដឹងក្រោយកិច្ចប្រជុំអចិន្ត្រៃយ៍ព្រឹទ្ធសភា នាព្រឹកថ្ងៃទី១០ មករា យ៉ាងដូច្នេះថា «ច្បាប់នេះមានសារៈសំខាន់ដោយសារមានការរីកចម្រើនលើកគ្រប់វិស័យនៅតាមមូលដ្ឋាន ហើយជាងនេះក៏ជាការផ្លាស់ប្តូររវាងផ្នែកធនធានមនុស្សពីថ្នាក់លើកទៅថ្នាក់ក្រោម ដើម្បីជួយកសាង និងអភិវឌ្ឍន៍«…» ។
អ្នកនាំពាក្យព្រឹទ្ធសភាបានបន្តថា ការធ្វើវិសោធនកម្មច្បាប់ទាំងពីរនេះក៏បាន ដើម្បីធ្វើយ៉ាងណាឲ្យច្បាប់ទាំងពីរនេះមានសុគតភាព និងច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា និងច្បាប់បោះឆ្នោតជ្រើសតាំងអ្នកតំណាងរាស្ត្រ ។ ជាងនេះក៏ ដើម្បីឲ្យសុគតភាពនឹងច្បាប់ស្តីពីការរៀបចំ និងការប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោតផងដែរ ។
លោកបញ្ជាក់ថា យ៉ាងដូច្នេះថា «អីញ្ចឹងច្បាប់ទាំងនេះយើងចេញយូរហើយ និងច្រើនមកហើយអីញ្ចឹងធ្វើនេះ (វិសោធនកម្ម) លើមាត្រា និងប្រការណាខ្លះ ដើម្បីឲ្យស្របគ្នា និងគណៈ កម្មាធិការជាតិរៀបចំការបោះឆ្នោតផងដែរ» ។ ជាមួយគ្នានោះដែរ លោក ម៉ម ប៊ុននាង ក៏បានអះអាងសេចក្តីវិសោនកម្មច្បាប់ទាំងពីរនេះក៏មានសំខាន់ផងដែរ គឺការបង្កើនអាសនៈនៅក្រុមប្រឹក្សារាជធានីខេត្តក្រុងស្រុកខណ្ឌផងដែរ ។
ជាងនេះក៏សំដៅពីការផ្តាស់ប្តូរធនធានមនុស្សមួយចំនួនពីថ្នាក់ជាតិទៅថ្នាក់ក្រោមជាតិ ដើម្បីធ្វើការងារនៅមូលដ្ឋានឲ្យប្រសិទ្ធិភាព ។ អ្នកនាំពាក្យព្រឹទ្ធសភាក៏បានលើកឡើងថា ទាំងម្ចាស់ហត្ថលេខី លើសេចក្តីស្នើវិសោធនកម្មច្បាប់នេះក៏ដូចជា រាជរដ្ឋាភិបាលមានចក្ខុវិស័យទៅលើយុវជន និងយុវនារីនៅតាមមូលដ្ឋានដែលមានបំណងចូលរួមកសាង និងអភិវឌ្ឍន៍ជាតិផងដែរ ។
លោកថា «ដូច្នេះហើយឈាមថ្មីនេះសំខាន់ណាស់ យើងឃើញហើយថា នៅតាមមូលដ្ឋាន ខេត្តក្រុងមានរីកចម្រើនអីញ្ចឹង ហើយពេលមានការរីកចម្រើនទៅធនធានមនុស្សមានការខ្វះខាតលើបញ្ហាលើការធ្វើផែនការកសាង និងការអភិវឌ្ឍមូលដ្ឋាន ។ ដូច្នេះយើងត្រូវការធនធានមនុស្សក្នុងការចូលរួមធ្វើការអភិវឌ្ឍទាំងហេដ្ឋរចនាសម្ព័ន្ធទាំងភូ ឃុំ និងអ្វីៗទាំងអស់» ។
លោកបានគូសបញ្ជាក់ថា «អីញ្ចឹង ដើម្បីស្របនឹង«…»គឺយើងត្រូវការធ្វើវិសោធនកម្ម ហើយដើម្បីឲ្យគាត់ (យុវជន) មានឱកាសចូលរួមបម្រើ និងការកសាងអភិវឌ្ឍន៍នៅមូលដ្ឋាន ។ នេះជាចក្ខុវិស័យរបស់ប្រមុខរាជរដ្ឋាភិបាលដែលគិតគូរដល់យុវជន ពិសេសឈាមថ្មីដែលមាន សញ្ញាប័ត្រខ្ពង់ខ្ពស់ ដើម្បីចូលអភិវឌ្ឍន៍សង្គមទើបយើងធ្វើវិសោធនកម្មច្បាប់នឹង» ។
សូមរឮកថា កាលពីថ្ងៃទី៣ មករា រដ្ឋសភាបានអនុម័តសេចក្តីស្នើវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានីក្រុមប្រឹក្សាខេត្តក្រុមប្រឹក្សាក្រុង ក្រុមប្រឹក្សាស្រុក ក្រុម ប្រឹក្សាខណ្ឌ និងសេចក្តីស្នើវិសោធនកម្មច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដោយសម្លេង១០៨ ជាឯកច្ឆន្ទនៃចំនួនសមាជិកសភាទាំងមូល ៕
ចែករំលែកព័តមាននេះ