រាជធានីភ្នំពេញ ៖ បុរសម្នាក់បានចូលទៅសំងំជាប់នៅក្នុងលូជាច្រើនថ្ងៃមកហើយ បង្កឱ្យមានការភ្ញាក់ផ្អើលកើតឡើងកាលពីម៉ោង៨យប់ ថ្ងៃទី៩ ខែមករា ឆ្នាំ២០១៩ ទល់មុខផ្ទះឧកញ៉ាម្នាក់ នៅចំណុចផ្លូវព្រះមុនីរ៉េត សង្កាត់ទំនប់ទឹក ខណ្ឌចំការមន ។
តាមប្រភពពីពលរដ្ឋដែលធ្វើដំណើរតាមផ្លូវបានឱ្យដឹងថា មុនពេលកើតហេតុ ពួកគាត់បានជិះម៉ូតូឆ្លងកាត់ទីនោះ ក៏ស្រាប់តែលឺសំលេងបុរសម្នាក់មិនស្គាល់អត្តសញ្ញាណបានស្រែកហៅពីក្នុងលូ និងលើដៃខ្វៃៗឱ្យជួយ ស្របពេលនោះដែរពួកគាត់ក៏បានឈប់ម៉ូតូរកមើលក្នុងលូ ស្រាប់តែឃើញបុរសម្នាក់នោះសំងំនៅក្នុងលូមិនដឹងតាំងពីពេលណានោះទេ បន្ទាប់ពីឃើញហេតុការណ៍នេះហើយ ប្រជាពលរដ្ឋដែលនៅក្បែរនោះក៏បាននាំគ្នាគាស់គំរបលូ ដើម្បីបើកឱ្យបុរសរូបនោះចេញមកក្រៅ ។
ប្រភពដដែលបន្តថា បន្ទាប់ពីបានចេញពីក្នុងលូមកក្រៅហើយ បុរសរូបនោះហាក់បីដូចនិយាយវង្វេងវង្វាន់ថា រូបគេបានចូលទៅក្នុងលូអស់រយៈពេល១០ថ្ងៃមកហើយ រាល់ថ្ងៃហូបទឹកលូធ្វើជាអាហារ ។
ក្រោយពេលកើតហេតុ បុរសរូបនោះ ត្រូវបានខាងមន្ទីរសង្គមកិច្ចបានមកទទួលយកទៅស្នាក់នៅមួយយប់សិន ។ ចំណែកប្រជាពលរដ្ឋដែលឃើញហេតុការណ៍នាំគ្នាឆ្ងល់ថា មិនដឹងជា បុរសរូបនេះចូលតាមប្រហោងលូពីណាមកទេ ព្រោះក្បាលរ៉ឺហ្គែលូតូចមិនអាចចូលចុះទេ៕
ចែករំលែកព័តមាននេះ