ខេត្តកណ្តាល ៖ ក្រុមជនសង្ស័យជាមុខសញ្ញាដើរទំលាក់យោង២នាក់ត្រូវប្រជាពលរដ្ធព័ទ្ធចាប់បាន រួចប្រគល់ឲ្យសមត្ថកិច្ច ពេលជនសង្ស័យទាំង២នាក់នេះបានធ្វើសកម្មភាពធ្វើជារើសបានស្បោងមាសកាឡៃ ហើយបបួលជនរងគ្រោះដូរ កាលពីវេលាម៉ោង៧និង៣០នាទីព្រឹកថ្ងៃទី៧ ខែមករា ឆ្នាំ២០១៩ នៅចំណុចផ្សារសំរោងធំ (ហៅផ្សារជ្រោយដង) ស្ថិតក្នុងភូមិជ្រោយដង ឃុំសំរោងធំ ស្រុកកៀនស្វាយ ខេត្តកណ្តាល។
ជនសង្ស័យទាំង២នាក់ដែលប្រជាពលរដ្ឋឃាត់ខ្លួនប្រគល់ឲ្យសមត្ថកិច្ចនគរបាល ម្នាក់ឈ្មោះដួង សុខន ភេទប្រុស អាយុ៤៦ឆ្នាំ មុខរបររត់ម៉ូតូឌុប ស្នាក់នៅផ្ទះជួល ក្នុងសង្កាត់ទឹកល្អក់ ខណ្ឌសែនសុខ រាជធានីភ្នំពេញ និងម្នាក់ទៀតឈ្មោះប៊ុន ហាន ភេទប្រុស អាយុ៤១ឆ្នាំ មុខរបររត់ម៉ូតូឌុប ស្នាក់នៅផ្ទះជួល ក្នុងរាជធានីភ្នំពេញ ។
ចំណែកជនរងគ្រោះ ឈ្មោះអៀង ស្រីស្រស់ ភេទស្រី អាយុ២៨ឆ្នាំ មុខរបរកម្មកររោងចក្រ មានទីលំនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល។
ប្រភពព័ត៌មានបានឱ្យដឹងថា នៅព្រឹកកើតហេតុ នារីរងគ្រោះបានចេញពីផ្ទះទៅផ្សារសំរោងធំហៅផ្សារជ្រោយដង ដើម្បីទិញម្ហូប ពេលនោះក៏មានក្រុមជនសង្ស័យជាមនុស្សស្រីម្នាក់នៅឈរពីខាងមុខនារីរងគ្រោះ រួចមានមនុស្សប្រុសម្នាក់ទៀតបានមកខ្សឹបប្រាប់មនុស្សស្រីនោះថា «បងឯងមានរើសបានការបូបលុយទេ» ហើយក៍ដើរចេញទៅបាត់ ។
ប្រភពដដែលបានបន្តថា ស្រាប់តែមានមនុស្សប្រុសម្នាក់ទៀតបានមកសួរនារីរងគ្រោះថា «មានរើសបានកាបូបលុយអត់?» ពេលនោះនារីរងគ្រោះឆ្លើយថា «អត់មានរើសបានទេ» ។ មួយសន្ទុះ ក៏មានស្ត្រីម្នាក់ទៀតបានមកខ្សឹបប្រាប់នារីរងគ្រោះថា គាត់រើសបានកាបូបលុយនោះ រួចក៍បបួលនារីរងគ្រោះទៅកន្លែងស្ងាត់ដើម្បីចែកគ្នា។
លុះនៅពេលទៅដល់កន្លែងស្ងាត់ ជនសង្ស័យប្រើល្បិចយកស្បោងមាសកាឡៃដូរជាមួយនារីរងគ្រោះយកមាសពិតប្រាកដ តែនារីរងគ្រោះមិនព្រមដូរទេ ដោយសារនារីរងគ្រោះដឹងល្បិចកលរបស់ក្រុមនេះគឺជាក្រុមជនដើរបោកប្រាស់ ហើយនាងក៏ស្រែកថាចោរៗ បង្កឲ្យមានការភ្ញាក់ផ្អើលដល់ប្រជាពលរដ្ឋជិតខាងមកជួយដេញចាប់ជនសង្ស័យបានចំនួន២នាក់ ។ ស្របពេលនោះកម្លាំងសមត្ថកិច្ចនគរបាលប៉ុស្តិ៍ចុះល្បាតក្នុងមូលដ្ឋាន ក៏ប្រគល់ជនសង្ស័យទៅឲ្យសមត្ថកិច្ចឃាត់ខ្លួនយកទៅសាកសួរនាំតែម្តង។
នៅចំពោះមុខសមត្ថកិច្ច ជនសង្ស័យទាំង២នាក់បានឆ្លើយសារភាពថា ពួកគេពិតជាបានធ្វើសកម្មភាពដូចខាងលើពិតប្រាកដមែន ។ បន្ទាប់ពីធ្វើការសាកសួរ និងស្រាវជ្រាវរយៈពេល១ថ្ងៃរួចមក នៅរសៀលថ្ងៃទី៨ ខែមករា ឆ្នាំ២០១៩ នគរបាលស្រុកកៀនស្វាយបានបញ្ជូនជនសង្ស័យទាំង២នាក់ទៅកាន់ស្នងការដ្ធាននគរបាលខេត្តកណ្តាលចាត់ការបន្តតាមនីតិវិធី៕
ចែករំលែកព័តមាននេះ