រាជធានីភ្នំពេញ ៖ ស្ត្រីម្នាក់បានធ្វើដំណើរទៅលោតទឹកសម្លាប់ខ្លួនពីលើស្ពានជ្រោយចង្វារ បន្ទាប់ពីប្តីក្រោយរករឿងទាស់ទែងគ្នាចោទថា មានទំនាក់ទំនងស្នេហាជាមួយអតីតប្តីមុន ។ ទោះបីជាយ៉ាងណានៅពេលដែលនាងតោងបង្កាន់ដៃស្ពានប្រុងលោតត្រូវបានប្រជាពលរដ្ឋ រួមទាំងសមត្ថកិច្ចដែលប្រចាំការនាំគ្នាឃាត់ទាន់ ។ ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៩ព្រឹក ថ្ងៃទី០៨ ខែមករា ឆ្នាំ២០១៩ នៅចំណុចស្ពានជ្រោយចង្វារថ្មី ក្នុងសង្កាត់ជ្រោយចង្វារ ខណ្ឌជ្រោយចង្វារ ។
ស្ត្រីដែលគិតខ្លីបានប្រាប់អោយដឹងថា នាងឈ្មោះ ថ.រ.ន អាយុ៣០ឆ្នាំ ស្នាក់នៅផ្ទះជួល សង្កាត់ជ្រោយចង្វារ ខណ្ឌជ្រោយចង្វារ មានកូនតូចៗចំនួន២នាក់ ។
តាមសាក្សីបានអោយដឹងថា នៅមុនពេលកើតហេតុគេឃើញស្ត្រីរូបនោះបានធ្វើដំណើរដោយថ្មើរជើងក្នុងទិសដៅពីកើតទៅលិចឡើងទៅលើស្ពានជ្រោយ នៅពេលជិតដល់កណ្តាលស្ពានគេឃើញស្ត្រីរូបនោះឈប់យំ រួចក៏បានតោងបង្កាន់ដៃស្ពានប្រុងលោតទឹកសម្លាប់ខ្លួនតែនាងហាក់ដូចជាពុំដាច់ចិត្ត ដោយឃើញដូចនេះប្រជាពលរដ្ឋដែលធ្វើដំណើរក៏បានរាយការប្រាប់ ប្រជាជាការពារ និងសមត្ថកិច្ចដែលប្រចាំការនៅគល់ស្ពានក៏បាននាំគ្នាមកឃាត់សួរនាំ ។
នៅចំពោះមុខសមត្ថកិច្ចស្ត្រីរូបនោះបានអោយដឹងថា នាងមានបំណងគិតខ្លីមកលោតទឹកសម្លាប់ខ្លួនដោយសារតែតូចចិត្តខ្លួនឯងដែលប្តីក្រោយរបស់នាងមិនទុកចិត្ត ហើយចេះតែចោទថា នាងលួចមានទំនាក់ទំនងស្នេហាឡើងវិញជាមួយអតីតប្តីរបស់នាងទោះបីនាងប្រាប់យ៉ាងណាក៏ប្តីមិនជឿដែរ ។
ស្ត្រីរូបនោះបានបន្តទៀតថា កន្លងមកនាងធ្លាប់មានប្តីហើយបានលែងលះគ្នាមកស្រលាញ់បុរសម្នាក់ជាប្តីក្រោយ ការរស់នៅជាមួយគ្នានោះត្រូវប្តីក្រោយចេះតែរករឿង និងចោទថា នាងលួចមានទំនាក់ទំនងគ្នាជាមួយប្តីមុនធ្វើអោយនាងទ្រាំលែងបានធ្វើដំណើរមកលោតទឹកសម្លាប់ខ្លួនតែម្តង ។
ទោះជាយ៉ាងណាស្ត្រីរូបនោះពុំបានអោយដឹងច្រើនពីរឿងរ៉ាវស្នេហា និងជីវិតគ្រួសារដែលពោរពេញទៅដោយភាពចម្រូវចម្រាស់នោះទេ បន្ទាប់ពីនាំនាងសាកសួរនៅស្នាក់ការប៉ុស្តិ៍នគរបាលក៏បានទាក់ទងហៅក្រុមគ្រួសារនាំយកទៅលំនៅឋានវិញ ៕
ចែករំលែកព័តមាននេះ