រាជធានីភ្នំពេញ ៖ បើទោះបីជាបានប្រឡូកការងារជាពិធីការិនី និងសម្តែងរឿងខ្លីជាបន្តបន្ទាប់ ប៉ុន្តែតារាសម្តែងណា សាឌី ហាក់មិនសូវមានឱកាសបង្ហាញវត្តមានក្នុងខ្សែភាពយន្តនោះឡើយ ។ យ៉ាងណាក៏ដោយចូលឆ្នាំថ្មីភ្លាមតារាសម្តែងមុខមានមន្តស្នេហ៍រូបនេះបានប្រកាសពីគម្រោងថតខ្សែភាពយន្តផងដែរ។
កញ្ញាណា សាឌី ត្រូវបានគេមើលឃើញថា នាងតែងតែលេចវត្តមានជាបន្តបន្ទាប់នៅក្នុងកម្មវិធីសិល្បៈ ផ្សេងៗ ក្នុងនោះនាងក៏ជាពិធីការិនីនៅស្ថានីយទូរទស្សន៍បាយន្តផងដែរ។ បើទោះបីជាប្រឡូកក្នុងសិល្បៈបានយ៉ាងក្រាស់ក្រែលបែបនេះក៏ដោយ ប៉ុន្តែណា សាឌី ត្រូវបានគេកត់សម្គាល់ឃើញថា នាងកម្របង្ហាញវត្តសម្តែងនៅក្នុងខ្សែភាពយន្តណាស់ ក្រៅពីការសម្តែងរឿងខ្លី និងការសម្តែងក្នុងកម្មវិធី«ដូច្នឹង»ផងរបស់ទូរទស្សន៍ថោន ។
ការមិនសូវបានចូលរួមសម្តែងក្នុងខ្សែភាពយន្តនេះ ណា សាឌី ធ្លាប់លើកឡើងថា ដោយសារតែនាងគ្មានពេលគ្រប់គ្រាន់ ព្រោះជាប់រវល់សិក្សា ។ ទោះជាយ៉ាងណាក្តីនៅក្នុងឱកាសឆ្នាំថ្មីចូលមកដល់នេះនាង បានប្រកាសពីគម្រោងនឹងត្រៀមខ្លួនទទួលយកការថតខ្សែភាពយន្តនេះឡើងវិញ ។ បើទោះបីជាបានប្រកាសទទួលយកការសម្តែងនេះក៏ដោយ ប៉ុន្តែតារារូបនេះមិនទាន់បានបញ្ជាក់ពីខ្សែភាពយន្តណាមួយដែលនាងនឹងចូលសម្តែងនោះឡើយ។
ណា សាឌី ត្រូវបានគេចាត់ទុកជាពិធី ការិនី ដែលមានឈ្មោះបោះសំឡេង នៅទូរទស្សន៍ បាយ័ន ។ ក្រៅពីពិធីការិនី នាងក៏ក្តោប បានការថតស្ប៉តពាណិជ្ជកម្មជាច្រើន ប៉ុន្តែ យ៉ាងណាក្តីមួយ រយៈមុនស្រីស្អាតរូបនេះ មិន ទទួលយកការសម្តែងរឿង ឬចម្រៀងឡើយ ទើបតែ ថ្មីៗនេះ គេបានឃើញ ណា សាឌី លេចមុននៅក្នុងការសម្តែងរឿង ខ្លី ៗ បែប កំប្លែង នៅទូរទស្សន៍ថោន ។ ទស្សនិកជននឹងចាំមើលតើណា សាឌី សម្តែងភាពយន្តរឿងអី ៕
ចែករំលែកព័តមាននេះ