ទីក្រុងបាងកក ៖ មជ្ឈមណ្ឌលផ្តល់ព័ត៌មានពីអចលនទ្រព្យ (REIC) បាននិយាយថា ក្រុមហ៊ុនអចលនទ្រព្យគួរតែប្រុងប្រយ័ត្ននឹងការផ្គត់ផ្គង់ថ្មីៗដែលបានចេញលក់នៅតំបន់Greater Bangkokក្នុងឆ្នាំ២០១៩ ព្រោះតែអត្រាទិញធ្លាក់ចុះ ។ នេះបើតាមការចេញផ្សាយពីសារព័ត៌មានបាងកក ប៉ុស្ដិ៍ កាលពីថ្ងៃទី៣ មករា កន្លងមក ។
លោក Vichai Viratkapan ប្រធានគ្រប់គ្រងស្តីទីនៃមជ្ឈមណ្ឌលREIC បាននិយាយថា ក្នុងឆមាសទី២ឆ្នាំ២០១៩នេះ នឹងមានការធ្លាក់ចុះនៃអត្រាទិញយ៉ាងខ្លាំង បន្ទាប់ពីវិធានការទប់ស្កាត់ការផ្តល់ប្រាក់កម្ចីថ្មីរបស់ធនាគារជាតិថៃចាប់មានប្រសិទ្ធភាពនៅថ្ងៃទី១ ខែមេសា ខាងមុខ ។ REIC ព្យាករណ៍ថា អត្រាទិញផ្ទះក្នុង តំបន់Greater Bangkok នឹងធ្លាក់ចុះមកស្មើ៤,៨% និង៤,២% ក្នុងឆមាសទី១និងទី២នាឆ្នាំ២០១៩។ ក្នុងរយៈពេល៥ឆ្នាំមកនេះ អត្រាទិញផ្ទះប្រចាំខែជាមធ្យមស្មើ៤,៦%។
អត្រាទិញឬជួលខុនដូប្រចាំខែ នឹងធ្លាក់ចុះពី៦%នៅឆមាសទី២នាឆ្នាំ២០១៨ មកស្មើ៥,៩% និង៥,១% ក្នុងឆមាសទី១ និងឆមាសទី២នាឆ្នាំ២០១៩ ។ អត្រាទិញឬជួលផ្ទះទាបៗវិញ នឹងធ្លាក់ចុះពី៣,៨%នៅឆមាសទី២នាឆ្នាំ២០១៨ មកស្មើ ៣,៣%នៅឆមាសទី២នាឆ្នាំ២០១៩ ។
ការធ្លាក់ចុះនៃអត្រាទិញឬជួលនេះនឹងបង្កើនការផ្គត់ផ្គង់ផ្ទះដែលមានលើទីផ្សារមកសរុបស្មើ ១៣៩.៥០០យូនីតក្នុងឆមាសទី២នាឆ្នាំ ២០១៩ ច្រើនជាងឆមាសទី២នាឆ្នាំ២០១៨ ដែលមាន១៣៣.៣២៦យូនីត ។
លោក Vichai បាននិយាយថា ៖« ក្រុមហ៊ុនអចលនទ្រព្យគួរជៀសវាងចេញលក់បន្ថែមក្នុងតំបន់ដែលមានផ្ទះលក់មិនទាន់ចេញច្រើន និងគួរឆែកអត្រាលក់ផ្ទះក្នុងតំបន់នីមួយៗសិនមុននឹងធ្វើការវិនិយោគ »៕
ចែករំលែកព័តមាននេះ