រាជធានីភ្នំពេញ ៖ ដើម្បីសម្រួលដល់អាជីវករនៅតាមផ្សារនានាក្នុងរាជធានីភ្នំពេញអាជ្ញាធរអគ្គិសនី(EDC) បានកោះអញ្ជើញសេវាករដែលផ្គត់ផ្គង់អគ្គិសនីនៅតាមផ្សារក្នុងរាជធានីភ្នំពេញ និងអាជ្ញាធរមូលដ្ឋាន មកប្រជុំ និងកំណត់តម្លៃជាថ្មីសម្រាប់ឆ្នាំ២០១៩នេះ ដើម្បីឆ្លើយតបទៅតាមគោនយោបាយរបស់រាជរដ្ឋាភិបាលកម្ពុជា ។ សម្រាប់តម្លៃអគ្គិសនីនៅតាមផ្សារដែលគ្រប់គ្រងដោយរដ្ឋក្នុងឆ្នាំ២០១៩នេះ…
រាជធានីភ្នំពេញ ៖ ដើម្បីសម្រួលដល់អាជីវករនៅតាមផ្សារនានាក្នុងរាជធានីភ្នំពេញអាជ្ញាធរអគ្គិសនី(EDC) បានកោះអញ្ជើញសេវាករដែលផ្គត់ផ្គង់អគ្គិសនីនៅតាមផ្សារក្នុងរាជធានីភ្នំពេញ និងអាជ្ញាធរមូលដ្ឋាន មកប្រជុំ និងកំណត់តម្លៃជាថ្មីសម្រាប់ឆ្នាំ២០១៩នេះ ដើម្បីឆ្លើយតបទៅតាមគោនយោបាយរបស់រាជរដ្ឋាភិបាលកម្ពុជា ។
សម្រាប់តម្លៃអគ្គិសនីនៅតាមផ្សារដែលគ្រប់គ្រងដោយរដ្ឋក្នុងឆ្នាំ២០១៩នេះ ពោលគឺចាប់ពីខែមករានេះតទៅ តម្លៃអគ្គិសនី នឹងកំណត់ត្រឹមតែ៧៤០រៀលប៉ុណ្ណោះ ក្នុង១គីឡូវ៉ាត់ម៉ោង ហើយក៏មានការឯកភាពពីសេវាករអគ្គិសនីទាំងអស់ផងដែរ ។
លោក យឹម វិសិដ្ឋ ប្រធានអាជ្ញាធរអគ្គិសនី បានថ្លែងនៅក្រោយកិច្ចប្រជុំកាលពីព្រឹកថ្ងៃទី៣ មករា ម្សិលមិញ នៅអាជ្ញាធរអគ្គិសនី ថា ជំហានដំបូងរបស់អាជ្ញាធរអគ្គិសនី គឺកំណត់តម្លៃអគ្គិសនីនៅតាមផ្សារសាធារណៈរបស់រដ្ឋនៅទូទាំងរាជធានីភ្នំពេញ និងបានតភ្ជាប់អគ្គិសនីពីប្រភពរបស់អគ្គិសនី ហើយនៅជំហានបន្តបន្ទាប់ នឹងអនុវត្តនៅតាមផ្សារឯកជននានានៅរាជធានីភ្នំពេញ និងឈានទៅអនុវត្តនៅផ្សារនានាតាមបណ្ដាខេត្តទូទាំងប្រទេសកម្ពុជាផងដែរ ។
លោកមានប្រសាសន៍ថា ៖« វិធានការតម្លៃអគ្គិសនីនៅតាមផ្សារសម្រាប់ឆ្នាំថ្មីនេះ នឹងចាប់ផ្ដើមអនុវត្តពីដើមខែមករា ឆ្នាំ២០១៩នេះតទៅ មានន័យថា វិក្កយបត្រដែលនឹងចេញនៅចុងខែមករា គឺតម្លៃត្រូវតែថ្មី និងស្របទៅតាមការកំណត់របស់អគ្គិសនីកម្ពុជា ហើយបើសិនជាមានករណីមិនប្រក្រតី ឬតម្លៃលើសពីអ្វីដែលយើងបានកំណត់ យើងនឹងហៅសេវាករ អ្នករកស៊ីខាងអគ្គិសនីមកសួរ និងអាចឈានទៅរកការពិន័យផងដែរ »។
លោកបន្តថា តម្លៃថ្មីដែលអាជ្ញាធរអគ្គិសនី បានកំណត់និងដាក់ឲ្យអនុវត្តនេះ នឹងមិនធ្វើឲ្យប៉ះពាល់ដល់ការខាតបង់របស់សេវាករ អ្នកផ្គត់ផ្គង់អគ្គិសនីបន្តទៅអាជីវករឡើយ ព្រោះអាជ្ញាធរបានគិតគូរលម្អិត និងបានផ្ដល់ប្រយោជន៍ដល់សេវាករនូវប្រាក់ចំណេញមួយដែលអាចទទួលយកបាន ។ ម្យ៉ាងទៀត ការកំណត់តម្លៃថ្មីនេះដែរក៏នឹងធ្វើឲ្យបងប្អូនអាជីវករនៅតាមផ្សារនានាក្នុងរាជធានីភ្នំពេញ ពេញចិត្តនូវអ្វីដែលកាដូឆ្នាំថ្មីពីរាជរដ្ឋាភិបាល ។
លោកបន្តទៀតថា កាលពីឆ្នាំចាស់កន្លងទៅ តម្លៃអគ្គិសនីនៅតាមផ្សារសាធារណៈនានានៅរាជធានីភ្នំពេញ ពុំមានតម្លៃស្តង់ដាណាមួយនោះឡើយ ពោលគឺអាស្រ័យទៅលើសេវាករ ជាអ្នកកំណត់ ដោយក្នុងនោះមានផ្សារខ្លះតម្លៃសមរម្យទាបជាង១.០០០រៀល តែមានផ្សារខ្លះទៀត អាជីវករត្រូវបង់ថ្លៃភ្លើងដល់ទៅជិត២.០០០រៀលឯណោះក្នុង១គីឡូវ៉ាត់ម៉ោង ដែលធ្វើឲ្យអាជីវករមិនពេញចិត្ត និងមានការរអ៊ូរទាំច្រើន ពីបញ្ហានេះ ។ លោកថា ៖« កន្លងមកស្ទើរតែគ្រប់ផ្សារទាំងអស់នៅរាជធានីភ្នំពេញបានអនុវត្តថ្លៃមួយដែលមិនមានគោលការណ៍ច្បាស់លាស់និងកំណត់ពីអាជ្ញាធរនោះទេ ។ តាមការស្រង់មតិរបស់យើងឃើញថា មានផ្សារខ្លះយកថ្លៃខ្ពស់ពេករហូតដល់ជិត២.០០០រៀល ដូច្នេះហើយ ចាប់ពីខែនេះតទៅ នឹងមានតម្លៃតែមួយគឺ ៧៤០រៀលក្នុង១គីឡូវ៉ាត់ម៉ោង » ។
យោងតាមអនុសាសន៍សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងពិធីសម្ពោធស្ថានីយវារីអគ្គិសនី សេសាន២ នៅខេត្តស្ទឹងត្រែង កាលពីពេលថ្មីៗនេះ តម្លៃអគ្គិសនីនៅតាមគេហដ្ឋាននានាទូទាំងប្រទេសដែលតភ្ជាប់អគ្គិសនីពីប្រភពបណ្ដាញជាតិ បើប្រើចាប់ពី១គីឡូវ៉ាត់ម៉ោងដល់១០គីឡូវ៉ាត់ម៉ោង នឹងបញ្ចុះនៅត្រឹម៣៨០រៀល, ចាប់ពី១១គីឡូវ៉ាតម៉ោងដល់៥០គីឡូវ៉ាត់ម៉ោង តម្លៃ៤៨០រៀល, ពី៥១ទៅ២០០គីឡូវ៉ាត់ម៉ោង តម្លៃ៦១០រៀល និងប្រើលើសពី២០០គីឡូវ៉ាត់ម៉ោងឡើងទៅនឹងមានតម្លៃ៧៤០រៀលក្នុង១គីឡូវ៉ាត់ម៉ោង ។ តម្លៃនេះនឹងត្រូវចាប់ផ្ដើមអនុវត្តន៍ចាប់ពីខែមករា ឆ្នាំ ២០១៩នេះតទៅ ។
គួរបញ្ជាក់ថា តាមរបាយការណ៍របស់អាជ្ញាអគ្គិសនីបានបញ្ជាក់ថា បច្ចុប្បន្នកម្ពុជាទទួលបានអគ្គិសនីសម្រាប់ផ្គត់ផ្គង់ពីប្រភពផ្សេងៗដូចជា វារីអគ្គិសនី រោងចក្រកអគ្គិសនីដើរដោយធ្យូងថ្ម រោងចក្រអគ្គិសនីដំណើរការដោយថាមពលពន្លឺព្រះអាទិត្យ (សូឡា), ប្រភពអគ្គិសនីពីរោងចក្រជីវម៉ាស់, ប្រេងខ្មៅ និងប្រភពនាំចូលពីប្រទេសជិតខាងមួយចំនួនតូចផងដែរ ៕
ចែករំលែកព័តមាននេះ