រាជធានីភ្នំពេញ ៖ ដោយសារតែមើលឃើញពីស្ថានភាពជំងឺលោក សាន ម៉ៅ ហាក់មិនមានការធូរស្បើយនោះក្រុមគ្រួសារតារាកំប្លែងរូបនេះបានសម្រេចបញ្ចាំរថយន្ត និងប្លង់ដីដើម្បីយករូបលោកទៅព្យាបាលជំងឺបន្តនៅប្រទេសថៃ ។
ក្រុមគ្រួសារបស់លោកបញ្ជាក់ថា ជំងឺរបស់លោក សាន ម៉ៅ កើតមានច្រើនប្រភេទ និងឈានដល់ដំណាក់កាលធ្ងន់ធ្ងរតែដោយសារតែមិនអាចឈរមើលបានទើបក្រុមគ្រួសារសម្រេចបញ្ចាំរបស់របរដើម្បីនាំយករូបលោកចេញទៅព្យាបាលនៅប្រទេសថៃក្នុងក្តីសង្ឃឹមចុងក្រោយ ។
បើតាមការអះអាងពីកូនស្រីរបស់នាយ សាន ម៉ៅ នឹងត្រូវបានផ្សាយផ្ទាល់តាមរយៈហ្វេសប៊ុកអ្នកនាង ចន ច័ន្ទលក្ខិណា ប្រធានសមាគមសិល្បៈករខ្មែរបានឲ្យដឹងថា រហូតមកដល់ពេលនេះជំងឺលោក សាន ម៉ៅ នៅតែមិនអាចធូរស្រាលនៅឡើយទេ ពោលគឺស្ថិតក្នុងលក្ខណៈធ្ងន់ធ្ងរ ។
នាងបញ្ជាក់ថា ឪពុករបស់ខ្លួនបានជួបប្រទះនូវជំងឺច្រើនមុខដូចជា លើសឈាម ទឹកនោមផ្អែម ជាពិសេសជំងឺសួតដ៏ធ្ងន់ធ្ងរមួយដែលតម្រូវឲ្យដាក់អុកហ្ស៊ីហ្ស៊ែនជាប្រចាំ ។ ប្រការនេះបានធ្វើក្រុមគ្រួសារត្រូវចំណាយថវិកាយ៉ាងច្រើននៅក្នុងការព្យាបាលលោក សាន ម៉ៅ ដែលគិតមកដល់ពេលនេះបានចំណាយប្រហែលខ្ទង់ម៉ឺនដុល្លារហើយ ។
បើតាមកូនស្រីនាយ សាន ម៉ៅ បើទោះបីជាត្រូវចំណាយច្រើន និងការយកចិត្តទុកដាក់ពីក្រុមគ្រូពេទ្យនៅមន្ទីរពេទ្យកាល់ម៉ែត្រក៏ដោយ ប៉ុន្តែជំងឺឪពុកនាងហាក់មិនមានការធូរស្រាលឡើយ ដោយសារគាត់ស្ថិតក្នុងសភាពធ្ងន់ធ្ងរ ។
ទោះជាយ៉ាងណាក្រុមគ្រួសាររបស់នាងក៏បានសម្រេចលើកចុងក្រោយនឹងត្រូវបញ្ជូនលោក សាន ម៉ៅ ទៅបន្តការព្យាបាលនៅស្រុកអ៊ូប៊ុន ប្រទេសថៃ ថែមទៀតក្នុងក្តីសង្ឃឹមចុងក្រោយ បើទោះបីជាស្ថានភាពជំងឺរបស់លោកនាពេលនេះស្ថិតក្នុងស្ថានការមួយគួរឲ្យព្រួយបារម្មណ៍ក៏ដោយ ។
កូនស្រីនាយ សាន ម៉ៅ បានបញ្ជាក់បន្ថែមថា ដោយសារការបញ្ចាំប្លង់ដី និងរថយន្តគឺពេលនេះក្រុមគ្រួសាររបស់នាងមានថវិកាប្រមាណជា១ម៉ឺន៥ពាន់ដុល្លារប៉ុណ្ណោះ ហើយបើក្នុងករណីការព្យាបាលត្រូវចំណាយលើសនេះគឺនាង និងក្រុមគ្រួសារពុំមានលទ្ធភាពឡើយ ។
ស្ថិតក្នុងស្ថានភាពដ៏លំបាកនេះក្នុងនាមក្រុមគ្រួសារនាយ សាន ម៉ៅ និងអ្នកនាង ចន ច័ន្ទលក្ខិណា ប្រធានសមាគមសិល្បៈករខ្មែរបានធ្វើការអំពាវនាវដល់សប្បុរសជនគ្រប់មជ្ឈដ្ឋានមេត្តាជួយដល់តារាកំប្លែងនាយ សាន ម៉ៅ នេះផង ត្បិតតារាកំប្លែងរូបនេះធ្លាប់ធ្វើទស្សនិកជនផ្ទុះសំណើចនៅពេលដែលលោកនៅមិនទាន់ធ្លាក់ខ្លួនឈឺនាពេលនេះ ៕
ចែករំលែកព័តមាននេះ