រាជធានីភ្នំពេញ ៖ កម្មករកម្មាការីនីកាត់ដេរ ប្រេស្ទីច ហ្គាមេន ខូអូធីឌី ដែលមានទីតាំងនៅក្នុងភូមិជីម៉ៅ ឃុំត្បែង ស្រុកកណ្តាលស្ទឹង ខេត្តកណ្តាល ប្រមាណជាង១០០នាក់បានលើកគ្នាមកក្រសួងការងារ និងបណ្តុះបណ្តាលវិជ្ជាជីវ ដើម្បីទាមទារលក្ខខណ្ឌការងារចំនួន១៤ចំណុច បន្ទាប់ពីពួកគេបានធ្វើកូដកម្ម អស់រយៈពេលជាងមួយសប្តាហ៍ហើយ ពុំមានដំណោះស្រាយ ។
ការលើកគ្នានេះដោយកម្មករបានធ្វើដំណើរតាមរថយន្តមកដល់មុខក្រសួងការងារដែលស្ថិតនៅតាមមហាវិថីសហព័ន្ធរុស្ស៊ី ក្នុងសង្កាត់ទឹកល្អក់ទី១ ខណ្ឌទួលគោក ដោយនាំគ្នា លើបដាព្រោងព្រាត ដើម្បីអោយថៅកែរោងចក្រគោរពច្បាប់ស្តីពីការងារនៃព្រះរាជាណាចក្រកម្ពុជានិងជំរុញអោយក្រសួងជួយអន្តរាគមន៍ដោះស្រាយ ។ តាមតំណាងកម្មករបានអោយរោងចក្រកាត់ដេរ ប្រេស្ទីច នេះមានកម្មករ កម្មាការីនីកាត់ដេរប្រមាណ៤០០នាក់បាននាំគ្នា ផ្ទុះការតវ៉ាតាំងពីថ្ងៃទី២៤ ខែធ្នូ ឆ្នាំ២០១៨ បន្ទាប់ពីកែរោងចក្របានបញ្ឈប់តំណាងសហជីព ចលនាកម្មករ ប្រចាំរោងចក្រម្នាក់ឈ្មោះ ហួន សុវ៉ិត ដោយយកលេសថា ចប់កិច្ចសន្យា ។
បន្ទាប់ពីមានការតវ៉ាថៅកែរោងចក្រពុំបានចេញមុខដោះស្រាយឡើយ ។ លុះនៅរសៀលថ្ងៃទី២៦ ខែធ្នូ ខាងតំណាងមន្ទីរការងារ និងបណ្តុះបណ្តាលវិជ្ជាជីវៈខេត្តក៏បានចុះទៅសម្របស្រួល តែខាងរោងចក្រពុំអនុញ្ញាតិអោយចូលឡើយ ។ តាមតំណាងកម្មករក៏បានចាត់ទុកថា ទង្វើរ របស់និយោជក គឺជាការរំលោភបំពានលើសិទ្ធិសេរីភាពរបស់កម្មករនិយោជិក និងរំលោភទៅលើច្បាប់ស្តីពីការងារច្បាប់ស្តីពីសហជីព និងអនុសញ្ញាអន្តរជាតិអាយឡូយ៉ាងធ្ងន់ធ្ងរ ។
តាមតំណាងកម្មករបានអោយដឹងទៀតថា ការតវ៉ានេះកម្មករនិយោជិកក៏បានទាមទារនូវលក្ខខណ្ឌការងារចំនួន១៤ចំណុច ដើម្បីស្នើរអោយលោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈជួយអន្តរាគមន៍ដោះស្រាយ ។ នៅព្រឹកនោះគណៈកម្មការដោះស្រាវកូដកម្មបាតុកម្មគ្រប់មុខសញ្ញាក៏បានទទួលយកដំណើរ និងសន្យាជួយជំរុញការដោះស្រាយជួនបងប្អូនកម្មករ កម្មាការីនី ៕
ចែករំលែកព័តមាននេះ