ខេត្តព្រះសីហនុ ៖ ភ្ញៀវទេសចរជាតិ និងអន្តរជាតិយ៉ាងច្រើនកុះកររាប់ម៉ឺននាក់ បានសំរុកមកកម្សាន្តនៅខេត្តព្រះសីហនុ នាថ្ងៃទី៣១ ធ្នូ ដែលជាថ្ងៃបុណ្យឆ្លងឆ្នាំសាកល២០១៨ឈានចូលឆ្នាំ២០១៩ ។ ចំនួនអ្នកទៅកម្សាន្តរាប់ម៉ឺននាក់នេះត្រូវបានកត់សម្គាល់ថា…
ខេត្តព្រះសីហនុ ៖ ភ្ញៀវទេសចរជាតិ និងអន្តរជាតិយ៉ាងច្រើនកុះកររាប់ម៉ឺននាក់ បានសំរុកមកកម្សាន្តនៅខេត្តព្រះសីហនុ នាថ្ងៃទី៣១ ធ្នូ ដែលជាថ្ងៃបុណ្យឆ្លងឆ្នាំសាកល២០១៨ឈានចូលឆ្នាំ២០១៩ ។ ចំនួនអ្នកទៅកម្សាន្តរាប់ម៉ឺននាក់នេះត្រូវបានកត់សម្គាល់ថា ខេត្តព្រះសីហនុបានចាប់ផ្តើមបើកទំព័រសករាជថ្មី ក្នុងការទទួលភ្ញៀវទេសចរ បន្ទាប់ពីខេត្តមួយនេះជួបបញ្ហាប្រឈមមួយចំនួននាកន្លងមកនេះដោយសារមិនមានអ្នកទៅកម្សាន្ត ។
លោក តាំង សុចិត្តគ្រឹះស្នា ប្រធានមន្ទីទេសចរណ៍ខេត្តព្រះសីហនុ បានថ្លែងថា សម្រាប់រយៈពេល៣ថ្ងៃកន្លងមកនេះ បើទោះបីជាថ្ងៃទី២៩និងថ្ងៃទី៣០ ធ្នូ ពុំសូវមានភ្ញៀវយ៉ាងណាក្តី ប៉ុន្តែនៅថ្ងៃទី៣១ ធ្នូ ភ្ញៀវទេសចរច្រើនម៉ឺននាក់បានសំរុកមកកម្សាន្តនៅតាមរមណីយដ្ឋាននានាយ៉ាងច្រើនកុះករ ជាពិសេសនៅតាមតំបន់ឆ្នេរនិងកោះនានា ជាក់ស្តែងនៅចំណុចឆ្នេរអូរឈើទាល ឆ្នេរអារីស្តុន ឆ្នេរឯករាជ្យ ឆ្នេរអូរត្រេះ រហូតដល់ឆ្នេរព្រែកត្រែង ។ លោកថ្លែងថា នៅយប់ថ្ងៃទី៣១ ធ្នូ ភ្ញៀវទេសចរបានមកប្រមូលផ្តុំគ្នាច្រើនកុះករនឹកស្មានមិនដល់ ស្ទើរតែរកកន្លែងអង្គុយពុំបាន ។
លោកបន្តថា សម្រាប់ភ្ញៀវទេសចរដែលបានចូលរួមក្នុងព្រឹត្តការណ៍ឆ្លងឆ្នាំសាកល២០១៨-២០១៩នេះ បើយោងតាមស្ថិតិបឋមមានចំនួនប្រហាក់ប្រហែលឆ្នាំ២០១៧ គឺក្នុងចន្លោះ២២ម៉ឺនទៅ២៣ម៉ឺននាក់កើនឡើងចន្លោះ២% បើទោះបីជាភ្ញៀវជាតិថយចុះចន្លោះ១៧% ប៉ុន្តែភ្ញៀវអន្តរជាតិកើនឡើងចន្លោះ១៦% ។ តាមរយៈតួលេខបឋមនេះផងដែរ យើងអាចចាត់ទុកថា មានភាពល្អប្រសើរច្រើនបើប្រៀបធៀបទៅនឹងពិធីបុណ្យនានាមួយរយៈចុងក្រោយនេះ ព្រោះបច្ចុប្បន្នទាំងបញ្ហាសន្តិសុខ អនាម័យ បរិស្ថានហេដ្ឋារចនាសម្ព័ន្ធ ផ្លូវថ្នល់ បញ្ហាផ្ទះសំណាក់ សណ្ឋាគារ និងតម្លៃម្ហូបអាហារ ត្រូវបានរៀបចំមានលក្ខណៈល្អប្រសើរជាបណ្តើរៗហើយ ពុំមានបញ្ហាដូចកាលពីរដូវវស្សានោះទេ ហើយទាំងរដ្ឋបាលខេត្ត ក៏ដូចជាស្ថាប័នពាក់ព័ន្ធទាំងអស់ក្នុងខេត្តកំពុងបន្តការខិតខំកែលម្អបន្ថែមទៀតនូវចំណុចអវិជ្ជមាន ក៏ដូចជាបញ្ហាប្រឈមកន្លងមក ។
ដូចនេះសម្រាប់ពិធីបុណ្យនានា ជាពិសេសពិធីបុណ្យចូលឆ្នាំថ្មីប្រពៃណីចិន វៀតណាម នាពេលខាងមុខនេះ បញ្ហាប្រឈមកន្លងមក នឹងអាចដោះស្រាយបាន ហើយខេត្តព្រះសីហនុនឹងបង្ហាញស្នាមញញឹម ភាពស្រស់បំព្រង ពោពេញទៅដោយសម្រស់ធម្មជាតិ លាយឡំទៅដោយភាពស៊ីវិល័យ រំលេចដោយអគារខ្ពស់ៗ សក្តិសមជាតារារះនាទិសនិរតីឡើងវិញ ។
ដោយឡែក បញ្ហាសន្តិសុខ សុវត្ថិភាពរយៈពេល៣ថ្ងៃ ទី២៩ដល់ទី៣១ ធ្នូនេះ ពុំមានបញ្ហាអ្វីនោះទេ គឺសមត្ថកិច្ចចម្រុះដែលដឹកនាំដោយលោកឧត្តមសេនីយ៍ទោ ជួន ណារិន្ធ ស្នងការនគរបាលខេត្ត លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្ត និងលោកវរសេនីយ៍ឯក ឌឹម សំបូរ ប្រធានអង្គភាពបង្ការនិងបង្ក្រាបបទល្មើសលើផ្ទៃសមុទ្រ បានរៀបចំផែនការគ្រប់គ្រងបានយ៉ាងល្អប្រសើរទាំងនៅលើគោក និងនៅលើទឹក ។
លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្ត បានឱ្យដឹងនៅថ្ងៃទី១ មករា ឆ្នាំ២០១៩ថា ក្នុងពិធីបុណ្យឆ្លងឆ្នាំសកលរយៈពេល៣ថ្ងៃ គឺចាប់ពីថ្ងៃទី២៩ ដល់ថ្ងៃទី៣១ ធ្នូ ឆ្នាំ២០១៨ ខេត្តព្រះសីហនុទទួលបានភ្ញៀវទេសចរជាតិ អន្តរជាតិចំនួន ២២៥.០០០នាក់ មានការកើនឡើងចំនួន១,៣៥ភាគរយ ធៀបនឹងឆ្នាំ២០១៧ ក្នុងនោះភ្ញៀវទេសចរជាតិមានចំនូន ៩៤.៦៥៤នាក់ ថយចុះ ១៩,៣៣ភាគរយ និងភ្ញៀវទេសចរអន្តរជាតិមានចំនួន ២០.៨៤៦នាក់ កើនឡើង ១៥,១៨ភាគរយ ។
លោកប្រធានមន្ទីរទេសចរណ៍បានឱ្យដឹងបន្តថា ភ្ញៀវទេសចរបរទេសចូលតាមនាវាច្រកកំពង់ផែសមុទ្រមានចំនួន១.៨០៣នាក់ ស្រី៩៣៧នាក់ នាវិក ៧៥៩នាក់ ស្រី១៤៤នាក់ ។ ភ្ញៀវទេសចរចូលតាមព្រលានយន្តហោះអន្តរជាតិបីថ្ងៃ មាន៤៨ជើង មានភ្ញៀវចំនួន ៥.៧៦០នាក់ កើនឡើង ១៦៧,៩០ភាគរយ ធៀបនឹងឆ្នាំ២០១៧ ។ ក្នុងនោះភ្ញៀវជាតិមានចំនួន ២៥០នាក់ ថយចុះ ២៤,៤៧ភាគរយ អន្តរជាតិចំនួន៥.៥១០នាក់ កើន២០២.៩១ភាគរយ ។ ភ្ញៀវទេសចរទៅលេងកម្សាន្តតាមកោះនានាក្នុងខេត្តព្រះសីហនុ មានចំនួន៥.៧៨៦នាក់ ស្រី ២.៥៨៧នាក់ ក្នុងនោះភ្ញៀវជាតិមានចំនួន ២.០៩៨នាក់ ស្រី ៩៩៣នាក់ និងភ្ញៀវអន្តរជាតិចំនួន ៣.៦៨៨នាក់ ស្រី ១.៥០៤នាក់ ។
លោកប្រធានមន្ទីរទេសចរណ៍បានឱ្យដឹងបន្តថា ភ្ញៀវទេសចរទៅលេងកម្សាន្តតាមតំបន់រមណីយដ្ឋាននានា មានដូចជារមណីយដ្ឋានក្បាលឆាយ ក្រុងព្រះសីហនុ មានភ្ញៀវសរុបចំនួន១.៥៥៩នាក់ ថយចុះ៥៤,២១ភាគរយ ភ្ញៀវជាតិ ១.៥៣២នាក់ អន្តរជាតិ២៧នាក់ រមណីយដ្ឋានថ្មរ៉ូង ស្រុកកំពង់សិលា មានភ្ញៀវ ៧៨៦នាក់ ថយចុះ ៥២ភាគរយ ភ្ញៀវទេសចរជាតិមានចំនួន ៧៥៩នាក់ និងអន្តរជាតិមានចំនួន ២៧នាក់ ។ រមណីយដ្ឋានពិកនិក ស្រុកកំពង់សិលា មានភ្ញៀវចំនួន ១.៣០៣នាក់ កើនឡើង ២ភាគរយ ក្នុងនោះភ្ញៀវទេសចរជាតិចំនួន ១០២១នាក់ និងអន្តរជាតិចំនួន ៣៨២នាក់ ។
លោក តាំង សុចិត្តគ្រឹស្នា បានឱ្យដឹងថា មន្ទីរទេសចរណ៍ បានសហការជាមួយរដ្ឋបាលខេត្ត បង្កើតស្តង់ស្នាក់នៅសម្រាប់ភ្ញៀវទេសចរចំនួន ៣០០ស្តង់ នៅទីតាំងចុងឆ្នេរអូរឈើ (អារីស្តុន) ស្តិតក្នុងសង្កាត់លេខ៤ ក្រុងខេត្តព្រះសីហនុ នៅថ្ងៃទី១ មានភ្ញៀវចូលស្នាក់នៅប្រមាណជា៣០% ថ្ងៃទី២ មាន៥០% និងថ្ងៃបញ្ចប់នៃបុណ្យឆ្លងឆ្នាំសកល ភ្ញៀវមកសម្រាកពេញ ព្រមទាំងរៀបចំបង្គន់អនាម័យ បន្ទប់ផ្លាស់សម្លៀកបំពាក់ បន្ទប់ងូតទឹក និងដាក់តាំងភ្លើង ការពាសន្តិសុខសុវត្ថិភាពជូនបងប្អូនប្រជាពលរដ្ឋប្រកបដោយផាសុកភាព ។
ក្រៅពីនោះ រដ្ឋបាលខេត្តក៏មានរៀបចំកម្មវិធីប្រគុំតន្ត្រី ការដាក់តាំងពិព័រណ៍ផលិតផល ម្ហូបអាហារ នៅឆ្នេរឯករាជ្យស្ថិតក្នុងសង្កាត់លេខ៣ និងមានបាញ់កាំជ្រួច និងបង្ហោះប៉េងប៉ោង ដើម្បីអបអរសាទរបុណ្យឆ្លងឆ្នាំសាកល២០១៨-២០១៩ បង្កើនកម្មវិធីសម្បាយៗសម្រាប់ភ្ញៀវទេសចរ មកលេងកម្សាន្តបុណ្យឆ្លងឆ្នាំសាកល ។ រដ្ឋបាលខេត្ត រួមជាមួយអាជីវករ ស្វែងរកវិធានការដោះស្រាយបញ្ហាតម្លៃសេវាម្ហូបអាហារបានសមរម្យក៏ដូចជាការពង្រឹងគុណភាពសេវាកម្ម ការពង្រឹងសណ្តាប់ធ្នាប់បរិស្ថាន អនាម័យ នៅតាមរមណីយដ្ឋាននានាបានល្អប្រសើរ ក្នុងការទាក់ទាញឱ្យភ្ញៀវទេសចរមកសម្រាកកម្សាន្តនៅខេត្តព្រះសីហនុ កាន់តែច្រើននាពេលខាងមុខ ៕
ចែករំលែកព័តមាននេះ