ខេត្តកំពង់ឆ្នាំង ៖ សួនច្បារថ្មីដែលមិនធ្លាប់មានពីមុនមកនៅចំណុចកែងច្រមុះជ្រូកជាប់នឹងរបង មជ្ឈមណ្ឌលហ្វឹកហ្វឺនស៊ីម៉ាក់ ស្ថិតនៅក្នុងភូមិមុងបារាំង សង្កាត់ប្អេរ ក្រុងកំពង់ឆ្នាំង មកដល់ពេលនេះបានកសាងប្រមាណជាង៤០ភាគរយហើយ ។
យ៉ាងនេះក្តីមកដល់ពេលនេះអាជ្ញាធរខេត្តកំពង់ឆ្នាំងនៅមិនទាន់សម្រេចចិត្តនឹងដាក់រូបសំណាកអ្វីឲ្យពិតប្រាកដនៅឡើយនោះទេ ។
សូមរំលឹកថា ដើម្បីអភិវឌ្ឍក្រុងកំពង់ឆ្នាំងអោយកាន់តែមានសោភ័ណ្ឌភាពថែមទៀត និងដើម្បីត្រៀម ធ្វើជាម្ចាស់ផ្ទះក្នុងពិធីបុណ្យទន្លេផងនោះរដ្ឋបាលសាលាខេត្តកំពង់ឆ្នាំងបានរៀបចំកសាងសួនច្បារថ្មីបន្ថែមមួយកន្លែងទៀត នៅចំណុចកែងជាប់របងស៊ីម៉ាក់ដែលមានទំហំផ្ទៃដីសរុបចំនួន២៤២១៤,៧៣ ម៉ែត្រការេ គឺស្មើនឹងជិត២ហិកតាកន្លះ ។ ការកសាងសួនច្បារថ្មីនេះ គឺជាគម្រោងកែលម្អរបស់សាលាខេត្តកំពង់ឆ្នាំង ក្រោមជំនួយឧបត្ថម្ភរបស់រាជរដ្ឋាភិបាល ដែលកសាងដោយអគ្គនាយកដ្ឋានភស្តភា ហិរញ្ញវត្ថុ ក្រសួមហាផ្ទៃ ។
សួនច្បារថ្មីនេះមានរាងត្រីកោណមានថ្នល់កៅស៊ូព័ទ្ធជុំវិញ ។ ជាប់ថ្នល់កៅស៊ូពីខាងក្នុងមានថ្នល់ចាក់បេតុងដែលជាកន្លែងសម្រាប់ចតរថយន្ត និងបន្ទាប់មកទៀត គឺថ្មម៉ាបសម្រាប់ឲ្យប្រជាពលរដ្ឋដើរហាត់ប្រាណ និងដើរកម្សាន្តផងដែរ ។
មកដល់ពេលនេះការកសាងផ្នែកខាងក្នុងសួនបានដាំដើមឈើ និងដាំដើមផ្កា និងចាប់ផ្តើមដាំស្មៅជាបណ្តើរហើយ ។ ចំណែកនៅចំណុចកណ្ដាលនៃសួនក៏បានកសាងបុស្បុកយ៉ាងធំក៏ជិតរួចរាល់ដែរ ។ ប៉ុន្តែការដាក់រូបសំណាកអ្វីអោយពិតប្រាកដនៅមិនទាន់សម្រេចនៅឡើយទេ ។ នេះបើតាមប្រសាសន៍ របស់ឯកឧត្តម ឈួរ ចន្ទ័ឌឿន អភិបាលខេត្តកំពង់ឆ្នាំងដែលបានបញ្ជាក់ប្រាប់ភ្នាក់ងារយើងកាល ពីរសៀលថ្ងៃទី០១ ខែមករា ឆ្នាំ២០១៩នេះ ។
តាមគម្រោងនឹងកសាងប៉ុស្តិ៍សន្តិសុខ១កន្លែងសម្រាប់ការយាមកាមការពារសន្តិសុខផ្សេងៗ និងការពារសត្វពាហនៈចូលក្នុងសួនផងដែរ ។ ជាមួយគ្នានេះនឹងកសាងបន្ទប់ទឹក និងបង្គន់អនាម័យផងដែរ ។ ការកសាងសួនច្បារថ្មីនេះមិនមានផលប៉ះពាល់ដល់ប្រជាពលរដ្ឋនោះទេ គឺមានតែធ្វើអោយ ប្រជាពលរដ្ឋដែលរស់នៅជិតនោះមានសេចក្តីរីករាយសប្បាយចិត្តទៅវិញទេ ព្រោះពេលនេះដីនៅទីនោះបានឡើងថ្លៃ ហើយនិងមានខ្លះកំពុងឆ្លៀតឱកាសដីបានថ្លៃ បានចាក់ដីពុះឡូលក់ទៀតផង ។
សូមបញ្ជាក់ដែរថា ក្រៅពីធ្វើសួន និងធ្វើផ្លូវជុំវិញសួនច្បារខាងលើអាជ្ញាធរខេត្តកំពង់ឆ្នាំងក៏បានធ្វើផ្លូវកៅស៊ូចូលពីចំណុចខាងត្បូងសួនមួយកន្លែងព័ទ្ធឡើងមកខាងកើតសួនផងដែរសម្រាប់អោយប្រជាពលរដ្ឋធ្វើដំណើរចេញចូលនឹងទៅកម្សាន្តសួនច្បារថ្មីនេះបានស្រួល ៕
ចែករំលែកព័តមាននេះ