ខេត្តមណ្ឌលគិរី ៖ គិតត្រឹមវេលាម៉ោង១រសៀលថ្ងៃទី៣១ ខែធ្នូ ឆ្នាំ២០១៨ អាកាសធាតុ នៅក្រុងសែនមនោរម្យ មានសីតុណ្ហភាពធ្លាក់ចុះត្រជាក់១៩អង្សាសេ ទៅ២១អង្សាសេ តាមតំបន់ជាក់ស្តែង ដោយឡែកនៅចំនុចភ្នំអណ្តូងស្នេហ៍ជាប់ព្រំដែនកម្ពុជាវៀតណាម ក្នុងឃុំដាក់ដាំ ស្រុកអូររាំង សីតុណ្ហាភាពចុះត្រឹម១៧ទៅ១៨អង្សាសេប៉ុណ្ណោះ ។
ភ្ញៀវទេសចរណ៍ជាតិ និងអន្តរជាតិរាប់ពាន់នាក់ត្រូវបានគេមើលឃើញថា កំពុងសម្រុក ធ្វើដំណើរ ឆ្ពោះទៅកាន់ខេត្តមណ្ឌលគិរី ដើម្បីជួបជុំប្រារព្ធពិធីឆ្លងឆ្នាំសកលជាមួយក្រុមគ្រួសារសាច់ ញាតិនឹងមិត្តភក្តិ ខណៈអាកាសធាតុអំណោយផលល្អ ដែលអាចឲ្យពួកគេទទួលបាននូវភាពសប្បាយរីករាយ ។
ភ្ញៀវទេសចរដែលបានទៅដល់ទឹកដីមណ្ឌលគិរីបានឲ្យដឹងថា «ពេលយើងមកដល់ទីនេះ គឺមានអារម្មណ៍ថា ខុសពីតំបន់ធ្លាប់រស់នៅឆ្ងាយណាស់…នៅទីនេះពេញទៅដោយភ្នំតូចធំរាប់មិនអស់ មើលដាច់ កន្ទុយភ្នែក…មិនត្រឹមតែប៉ុណ្ណោះមានព្រៃឈើខៀវស្រងាត់ ធ្វើឲ្យមានអារម្មណ៍ស្រស់ថ្លាណាស់…» ។
ភ្ញៀវទេសចរបន្តថា«អ្វីដែលធ្វើឲ្យយើងបំភ្លេចមិនបាននោះ គឺអាកាសធាតុដ៏ត្រជាក់ ធ្វើឲ្យដំណើរកម្សាន្តកាន់ តែសប្បាយ ព្រោះបានសាកនូវខ្យល់ជំនោរដ៏ប្លែកដែលខេត្តដទៃមិនមានដូច…ហើយនៅយប់ឆ្លងឆ្នាំយើងបានបង្កាត់ភ្លក់ភ្លើង ដើម្បីកម្តៅខ្លួន ត្រៀមរាប់ថយក្រោយឆ្លងចូលឆ្នាំ២០១៩ជាមួយក្រុមគ្រួសារយ៉ាងរីករាយ» ។
អាជ្ញាធរខេត្តមណ្ឌលគិរីបានផ្តាំផ្ញើដល់អ្នកទេសចរណ៍ដែលកំពុងលេងកម្សាន្តនៅក្នុងខេត្ត ត្រូវយកចិត្តទុកដាក់ថែរក្សាសុខភាព ជាពិសេសគ្រួសារដែរមានកូនតូចៗ ត្រូវរកខោអាវក្រាស់ៗពាក់ឲ្យពួកគេ ជៀសវាងកើតជំងឺផ្តាសាយឬជំងឺផ្សេងៗ ៕
ចែករំលែកព័តមាននេះ