អេ រដ្ឋា ក្លាយជាកីឡាករទី1ដែលត្រូវបានសង្គ្រោះដោយមហាជន
- ភ្នំពេញ
រាជធានីភ្នំពេញ ៖ ក្នុងចំណោមកីឡាករដែលមានឈ្មោះបោះសំឡេង គេចាត់ទុកថា មានតែកីឡាករ ដួង ផា ដែលប្រកាសប្រើឈ្មោះក្នុងវិស័យកីឡាដំបូង ថា ម៉ន…
រាជធានីភ្នំពេញ ៖ ក្នុងចំណោមកីឡាករដែលមានឈ្មោះបោះសំឡេង គេចាត់ទុកថា មានតែកីឡាករ ដួង ផា ដែលប្រកាសប្រើឈ្មោះក្នុងវិស័យកីឡាដំបូង ថា ម៉ន…
រាជធានីភ្នំពេញ ៖ ក្នុងចំណោមកីឡាករដែលមានឈ្មោះបោះសំឡេង គេចាត់ទុកថា មានតែកីឡាករ ដួង ផា ដែលប្រកាសប្រើឈ្មោះក្នុងវិស័យកីឡាដំបូង ថា ម៉ន រដ្ឋា និង ចុងក្រោយ អេ រដ្ឋា ក្រោយសម្រេចចិត្តដូរក្លិបទៅក្លិបអេ ភូថង ប៉ុណ្ណោះ ដែលមានសំណាងត្រូវបានកម្លាំងមហាជនស្រុះដៃគ្នាជួយយ៉ាងពេញទំហឹង បន្ទាប់ពីកីឡាកររូបនេះត្រូវរថយន្ត មួយគ្រឿងបុកនិងកិនរបួសធ្ងន់ កាលពីវេលាម៉ោងជាង៧យប់ ថ្ងៃទី២៥ ធ្នូ នៅលើផ្លូវជាតិលេខ១ ម្ដុំច្បារអំពៅ ។
លោកនៅតែត្រូវបានអះអាងថា ស្ថិតក្នុងសភាពធ្ងន់ធ្ងរ បើទោះជាមានការយកចិត្តទុកដាក់ពីសំណាក់ថ្នាក់ដឹកនាំ និងសប្បុរសជន ដោយប្រឈមនឹងកង្វះឈាមស្ទើររាល់ថ្ងៃ ខណៈដែលថវិកាសម្រាប់ឈានដល់ការវះកាត់នៅតែមិនទាន់គ្រប់ ។ អ្វីដែលគេចាប់អារម្មណ៍នោះ គឺរថយន្តបង្កហេតុ បើទោះជាគេដឹងថាមានផ្លាកលេខភ្នំពេញ2AU- 5876 ក៏នៅតែមិនទាន់ចាប់អ្នកបើកបរបានយកមកផ្ដន្ទាទោសនៅឡើយ។
យោងតាមការបង្ហោះរបស់ម្ចាស់ហ្វេសប៊ុកជាច្រើន និងម្ចាស់ផេកព័ត៌មានបានបង្ហាញយ៉ាងច្បាស់ថា កីឡាករ អេ រដ្ឋា ត្រូវបានសប្បុរសជនដោយរាប់តាំងពីថ្នាក់លើផង ស្រាក់ដៃគ្នាជួយផ្ដល់ជាជំនួយ និងជួយជាឈាមយ៉ាងច្រើន ដែលកម្លាំងនៃការជួយនេះ ត្រូវបានគេមើលឃើញថា លោកជាកីឡាករទី១ ដែលក្រោយមានរបួសធ្ងន់ធ្ងរ ក៏អាចទាក់ទាញមហាជនឱ្យមានសមានចិត្តយកចិត្តទុកដាក់។ លោក អេ ភូថង បានថ្លែងបញ្ជាក់ថា លោកមានអារម្មណ៍សប្បាយចិត្តជាអនេក ដែលកូនសិស្សរបស់លោកទទួលបានការជ្រោមជ្រែងជាថវិកាពីសំណាក់មហាជន និងការយកចិត្តទុកដាក់ពីក្រុមគ្រូពេទ្យ ដោយលោកបានហៅសភាពរបួសធ្ងន់របស់កូនសិស្សថាមានលទ្ធភាពបន្តការព្យាបាលនៅក្នុងពេលនេះ គឺបានពីកម្លាំងបុណ្យដែលផ្ដល់ឱ្យដោយកម្លាំងសប្បុរសធម៌ទាំងស្រុង។
លោកអះអាងយ៉ាងខ្លីថា បើគ្មានជំនួយទាំងនេះទេ ប្រហែលជា អេ រដ្ឋា បានស្លាប់បាត់បង់ជីវិតបាត់ទៅហើយ ដោយសារតែគេគឺជាកូនកំព្រា ហើយលោកជាគ្រូ និងជាឪពុកទី២ មិនមានលទ្ធភាពអ្វីដែលអាចរកលុយមកសង្គ្រោះបន្ទាន់បានទេ ។ យ៉ាងណាមិញ លោកនៅតែសម្ដែងអារម្មណ៍រន្ធត់ចិត្ត ក្នុងពេលដឹងថាកូនសិស្សរបស់លោកនៅតែមិនទាន់ចេញផុតពីការសង្គ្រោះបន្ទាន់ ខណៈដែលម្ចាស់រថយន្តឡិចស៊ីស
៥៧០ ពណ៌ស ពាក់ស្លាកលេខ 2AU-5876 ដែលបុកនិងកិនឱ្យបែកប្លោកនោម ពោះវៀន និងដាច់សរសៃឈាមត្រង់ក្រលៀនឈានទៅខូចទាំងក្រលៀនផង មិនទាន់ចេញមុខដោះស្រាយ ក្រោយការរត់គេច ។
ក្នុងថ្ងៃកើតហេតុ លោកមិនស្ថិតនៅទីនោះទេ តែអ្នកឃើញហេតុការណ៍សុទ្ធតែស្គាល់ម៉ាក និងស្លាកលេខរថយន្តបង្កហេតុ ដែលលោកយល់ថាមន្ត្រីសមត្ថកិច្ចគួរតែតាមចាប់អ្នកបើករថយន្តមួយនោះឱ្យមកទទួលខុសត្រូវ ។ លោកនៅតែសម្ដែងអារម្មណ៍អស់សង្ឃឹមក្នុងពេលកូនសិស្សនៅតែស្ថិតលើគ្រែពេទ្យ ដោយលោកប្រកាសថា បើម្ចាស់រថយន្តចេញមុខទទួលខុសត្រូវទើបកូនសិស្សលោករំពឹងបានវះកាត់ពោះវៀន និងក្រលៀន ដែលរងការខូចធ្ងន់ ។
លោកថា ខ្លួនមិនសូវមានសិស្សល្អៗនៅក្នុងពិភពប្រដាល់នោះទេ ដោយទើបតែបានបង្វឹក អេ រដ្ឋា គ្រាន់បានស្នងកីឡាក្នុងក្លិប តែជាអកុសលបែរជាកូនសិស្សមានគ្រោះថ្នាក់មួយនេះ ដោយលោកមិនដឹងថាតើក្រោយពេលចេញពីពេទ្យ អេ រដ្ឋា នឹងអាចបន្តប្រដាល់ដើម្បីមុខមាត់ក្លិបទៀតបានឬមិនបាន បើសភាពជំងឺរបស់គេធ្ងន់ធ្ងរដល់ម្លឹង។ មកដល់ថ្ងៃទី៣១ ធ្នូ នេះ អេ រដ្ឋា នៅតែស្ថិតក្នុងសភាពគួរឱ្យបារម្ភ ជាពិសេសកន្លែងមុខរបួសដែលបង្កឱ្យដាច់ពោះវៀន ដាច់សរសៃឈាមត្រង់ក្រលៀន និងបែកប្លោកនោមនោះ។
មកទល់ពេលនេះមិនត្រឹមតែសាមញ្ញជននោះទេដែលចេញមុខជួយអេ រដ្ឋា សូម្បីតែតារាសិល្បៈ និងកាកបាទក្រហមកម្ពុជាក្រោមការដឹកនាំរបស់សម្តេចកិត្តិព្រឹទ្ធបណ្ឌិតក៏ចេញមុខជួយដែរ តែគេមិនទាន់ឃើញថា កម្លាំងឈឺឆ្អាលទាំងនោះជួយជំរុញឱ្យក្រុមសមត្ថកិច្ចតាមចាប់ម្ចាស់រថយន្តបង្កឱ្យចេញមុខមកទទួលខុសត្រូវបាននៅឡើយទេ ដែលករណីនេះ មិនគួររកមិនឃើញ ។
លោក ធីម ស៊ាងហៃ ជាកីឡាកររួមក្លិប និងជាមិត្តជិតស្និទ្ធរបស់កីឡាករ អេ ភូថង បានសរសេរបង្ហោះថា កីឡាករ អេ រដ្ឋា នៅតែប្រឈមខ្វះឈាម ហើយត្រូវសង្គ្រោះយ៉ាងយកចិត្តទុកដាក់ ដោយលោកបង្ហាញអារម្មណ៍សប្បាយចិត្តយ៉ាងខ្លាំង ដែលកីឡាករកម្សត់រូបនេះត្រូវបានមហាជនចេញមុខជ្រោមជ្រែង។
ហេតុផលដែលនាំឱ្យដំណឹងរបស់អេ រដ្ឋា ត្រូវបានមហាជនសស្រាក់សស្រាំចុះជួយ គឺបន្ទាប់ពីលោក ធីម ស៊ាងហៃ បង្ហោះថា«សូមបងប្អូនទាំងអស់គ្នាដែលមានឈាមសុំជួយគាត់ផង នៅវេលាយប់មិញនេះកីឡាករ អេ រដ្ឋា គាត់បានជួបគ្រោះថ្នាក់ចរាចរណ៍ធ្វើឱ្យបែកប្លោកនោម ដោយសារតែមានឡានមួយគ្រឿងបានបុកគាត់ពីក្រោយហើយបានកិនពីលើទៀតផង។ ពេលនេះជនបង្កបានរត់គេចខ្លួនបាត់ហើយ។ នៅស្រុកយើងកំពុងតែខ្វះធនធានកីឡាករដែលល្អផង ឥឡូវគាត់ត្រូវជួបគ្រោះថ្នាក់ទៀត។
សង្ឃឹមថា បងប្អូនទាំងអស់គ្នានឹងយល់ពីការលំបាករបស់កីឡាករប្រដាល់ស្រុកយើង សូមជួយ share ទាំងគ្នាផងដើម្បីឱ្យបងប្អូននៅក្រៅស្រុក និងក្នុងស្រុកបានដឹងផង ។ គាត់មានឈ្មោះប្រកួតនៅខេត្តកោះកុងនាថ្ងៃទី១៧ ខែមករា ឆ្នាំ២០១៩ ខាងមុខនេះទៀត ឥឡូវត្រូវជួបគ្រោះថ្នាក់អញ្ចឹងប្រហែលមិនអាចប្រកួតបានទេមើលទៅ ។
សូមបងប្អូនទាំងអស់គ្នាដែលមានឈាមសូមជួយគាត់ផង គាត់កំពុងតែខ្វះខាតពេលនេះ ។ មនុស្សធ្លាប់តែហូបបាយជាមួយគ្នា គេងជុំគ្នា រាប់អានគ្នាដូចបងប្អូន ទើបតែជួបនិយាយគ្នាប៉ុន្មានថ្ងៃមុន តែឥឡូវត្រូវជួបគ្រោះថ្នាក់ធ្ងន់ទៀត តើអ្នកណាមិនអាណិតទៅ សូមបងប្អូនទាំងអស់គ្នាជួយ Share ទាំងអស់គ្នាផង ។
បើបងប្អូនណាចង់ជួយជាថវិកាដល់គាត់ អាចឆាត ឬក៏ខលមកខ្ញុំបានព្រោះអីគាត់ខ្វះខាតថវិកាខ្លាំងណាស់ គាត់កំព្រាឪពុកម្ដាយ ហើយខ្លួនទៅជាបែបហ្នឹងទៀត »។ បន្ថែមពីលើការបង្ហោះធ្វើឱ្យផ្អើលនេះ លោក និងកីឡាការិនី អេ យ៉ានុត ក៏តែងបង្ហោះពីសកម្មភាពក្នុងពេលសម្រាកពេទ្យរបស់កីឡាករ អេ រដ្ឋា ជាហូរហែទើបធ្វើឱ្យដំណឹងមួយនេះផ្អើល និងកក្រើកដល់ម្លឹង៕
ចែករំលែកព័តមាននេះ