រាជធានីភ្នំពេញ ៖ ក្នុងឱកាសចូលឆ្នាំថ្មីឆ្នាំសកល ឆ្នាំ២០១៩ លោកកឹម សុខា អតីតប្រធានគណបក្សសង្គ្រោះជាតិបានអំពាវនាវឲ្យមេដឹកនាំគ្រប់និន្នាការទាំងអស់បញ្ឈប់ធ្វើនយោបាយតាមបែបអគុណធម៌ មិនថាការគំរាមកំហែង ឬមួលបង្កាច់ដោយត្រូវបង្វែរកមធ្យោបាយយ៉ាងណាឲ្យប្រជាពលរដ្ឋខ្មែរមានភាពសុខសាន្ដ ។…
រាជធានីភ្នំពេញ ៖ ក្នុងឱកាសចូលឆ្នាំថ្មីឆ្នាំសកល ឆ្នាំ២០១៩ លោកកឹម សុខា អតីតប្រធានគណបក្សសង្គ្រោះជាតិបានអំពាវនាវឲ្យមេដឹកនាំគ្រប់និន្នាការទាំងអស់បញ្ឈប់ធ្វើនយោបាយតាមបែបអគុណធម៌ មិនថាការគំរាមកំហែង ឬមួលបង្កាច់ដោយត្រូវបង្វែរកមធ្យោបាយយ៉ាងណាឲ្យប្រជាពលរដ្ឋខ្មែរមានភាពសុខសាន្ដ ។
យោងតាមគេហទំព័រហ្វេសប៊ុករបស់លោក កឹម សុខា នៅថ្ងៃទី៣១ ខែធ្នូ ឆ្នាំ២០១៨ បានឲ្យដឹងថា ក្នុងឱកាសឆ្លងឆ្នាំចាស់២០១៨ ឈានចូលឆ្នាំថ្មី២០១៩ លោកបានជូនពរពលរដ្ឋខ្មែរ និងជុំវិញពិភពលោកជួបប្រទះសេចក្តីសុខ និងវឌ្ឍនភាពតាមគោលការណ៍ប្រជាធិបតេយ្យ ដោយចាប់ផ្ដើមពីការផ្សះផ្សាជាតិពិតប្រាកដមិនយកខ្មែរធ្វើជាសត្រូវ ។
លោកបានបន្តថា«សូមឲ្យទំព័រប្រវត្តិសាស្ត្រថ្មីនេះចាប់ផ្តើមពីមេដឹកនាំគ្រប់និន្នាការ ដើម្បីធ្វើជាគម្រូដោយបញ្ឈប់ការធ្វើនយោបាយតាមបែបអគុណធម៌មិនថា តាមរយៈការគម្រាមកំហែង ឬការមួលបង្កាច់ ហើយវិលទៅរកមនុស្សធម៌វិញ ដើម្បីត្រួសត្រាយផ្លូវជូនប្រជាពលរដ្ឋជាពិសេសកូនខ្មែរជំនាន់ក្រោយ ។
លោកកឹម សុខា បញ្ជាក់ថា ឆ្នាំ២០១៩ស្អែកនេះនឹងបើកទំព័រប្រវត្តិសាស្ត្រថ្មីមួយដែលលប់បំបាត់ឲ្យអស់នូវជំងឺពីរយ៉ាងដែលកំពុងរាតត្បាតក្នុងសង្គមខ្មែររួមមានទី១- ការគាបសង្កត់ជិះជាន់គំរាមកំហែង ជាពិសេសដោយអំពើហិង្សា និងទី២- ការស្អប់ឈ្នានីស ជាពិសេសតាមរូបភាពលាបពណ៌ ជេរប្រមាថ និងបង្ខូចកេរ្តិ៍ឈ្មោះ ។
ចំណែកលោក យែម បុញ្ញាឬទ្ធិ អតីតអ្នកនាំពាក្យគណបក្សសង្គ្រោះជាតិបានលើកឡើងថា ការណែនាំបណ្ដុះបណ្ដាលអប់រំរបស់គណបក្សសង្គ្រោះជាតិចំពោះអ្នកដឹកនាំគ្រប់លំដាប់ថ្នាក់ យុវជន ស្ត្រី ស្ដីពីគោលនយោបាយខ្មែរតែមួយផ្សះផ្សាជាតិអហិង្សាមិនជេរប្រមាថមិនយកខ្មែរណាជាសត្រូវ មិនគុំកួនសងសឹកខ្មែរជាទស្សនៈវែងឆ្ងាយ ដោយចង់ឱ្យសង្គមជាតិមានខ្មែររួមសាមគ្គីគ្នា បម្រើការពារកសាងមាតុភូមិកម្ពុជា ។
លោកបន្តថា លើសពីនោះទៅទៀតក្នុងវគ្គបណ្ដុះបណ្ដាលនីមួយៗ តែងតែធ្វើការជំរុញលើកទឹកចិត្តកុំឱ្យគេមានអារម្មណ៍ភ័យខ្លាចក្នុងការនិយាយរិះគន់ស្ថាបនា ឬបញ្ចេញមតិ ដើម្បីឱ្យការងារបានរីកចម្រើនដែលអាចមានពោរពេញទៅដោយគំនិតល្អៗ មានគំនិតច្នៃប្រឌិត ហើយហ៊ានបង្ហាញមកកាន់អ្នកដឹកនាំ ។ ពិតជាត្រូវការពេលវេលា ដើម្បីលើកកម្ពស់នៃការតស៊ូមតិប្រកបដោយសមធម៌ ក្នុងលទ្ធិប្រជាធិបតេយ្យពិតប្រាកដមួយ ៕
ចែករំលែកព័តមាននេះ