រាជធានីភ្នំពេញ ៖ គ្រាន់តែបុរសម្នាក់មើលមុខ ក្រុមជនសង្ស័យបានលើកគ្នាទៅតាមរករឿង និងវាយបែកកញ្ចក់ទ្វារចំនួន៤ផ្ទាំង រួចគេចខ្លួនបាត់ កាលពីវេលាម៉ោង៨យប់ ថ្ងៃទី២៧ ខែធ្នូ ឆ្នាំ២០១៨ នៅភូមិត្រពាំងពោធិ សង្កាត់ចោមចៅ៣ ខណ្ឌពោធិសែនជ័យ ស្រាប់តែមកដល់វេលាម៉ោង៨យប់ថ្ងៃទី២៩ ខែធ្នូនេះ ត្រូវជនរងគ្រោះប្រទះឃើញមុខក្រុមជនសង្ស័យខាងលើក៏ប្តឹងប៉ូលិសឱ្យចាប់ឃាត់ខ្លួនជាបន្តបន្ទាប់បានចំនួន៣នាក់ ។
ម្ចាស់ផ្ទះរងគ្រោះឈ្មោះ ឆាយ គឹមហុង ភេទប្រុស មុខរបរលក់ជួសជុលម៉ាស៊ីនត្រជាក់ ស្នាក់នៅផ្ទះលេខQ៥៥ ផ្លូវបេតុង ភូមិត្រពាំងពោធិ សង្កាត់ចោមចៅ៣ ខណ្ឌពោធិ៍សែនជ័យ ។
ចំណែកក្រុមជនសង្ស័យជាអ្នកលេងប្រចាំភូមិមានគ្នា៩នាក់ តែឃាត់ខ្លួនបានចំនួន៣នាក់ប៉ុណ្ណោះ ក្នុងនោះរួមមាន ១-ឈ្មោះ ហេន ឧត្តម ភេទប្រុស អាយុ១៨ឆ្នាំ មុខរបរកម្មករ ស្នាក់នៅភូមិ ត្រពាំងពោធិ៍ សង្កាត់ចោមចៅបី ២- ឈ្មោះ ឈុន វិរៈចេម ភេទប្រុស អាយុ១៧ឆ្នាំ មុខរបរសន្តិសុខ ស្នាក់នៅភូមិព្រៃព្រីងត្បូង២ សង្កាត់ចោមចៅ៣ និង៣-ឈ្មោះ សាន រដ្ឋា ភេទប្រុស អាយុ១៨ឆ្នាំ មុខរបរ មិនពិតប្រាកដ ស្នាក់នៅភូមិ ត្រពាំងពោធិ៍ សង្កាត់ចោមចៅ៣ ។
តាមប្រភពពីជនរងគ្រោះ បានឲ្យដឹងថា កាលពីវេលាម៉ោង៨យប់ ថ្ងៃទី២៧ ខែធ្នូ ឆ្នាំ២០១៨ ដោយសារម៉ូតូសណ្តោងរ៉ឺម៉កកូនចៅរបស់គាត់ អស់សាំង គាត់ក៏បានបណ្តើរទៅផ្ទះ ដោយធ្វើដំណើរកាត់តាមផ្លូវបេតុងក្នុងភូមិ បណ្តាលឱ្យគាត់ហត់ហើយហូរញើសស្រស្រាក់ លុះដល់កន្លែង តាបប៊ីយ៊ែរ គាត់ក៏ចោលភ្នែកមើកគេលេងបុកប៊ីយ៊ែរ ។
ប្រភពដដែលបានបន្តថា ពេលនោះស្រាប់តែក្រុមជនសង្ស័យខាងលើស្រែកថា « អ្ហែងមើលមុខអី » គាត់ក៏តបទាំងងឿងឆ្ងល់ថា «មើលមុខប៉ុណ្ណឹងមិនបាន ចឹងខុសដែរ» ទើបក្រុមជនសង្ស័យខាងលើ បញ្ចេញចរឹកក្រេវក្រោធ ហើយគាត់ក៏បណ្តើររ៉ឺម៉កម៉ូតូ រហូតចូលក្នុងផ្ទះ បិទទ្វារចាក់សោរ រួចជុំគ្នាហូបបាយ ។
ស្រាប់តែមួយសន្ទុះក្រោយមក បែរជាក្រុមជនសង្ស័យខាងលើ មានគ្នាចំនួន៩នាក់ ជិះម៉ូតូ៣គ្រឿង ទៅតាមស្រែកឡូឡា គំរាមវាយ តែគាត់នៅក្នុងផ្ទះមិនរវល់តបតអ្វីឡើយ ធ្វើឲ្យក្រុមជនសង្ស័យតាមវាយខ្លួនមិនបាន ខឹងក៏ទៅវាយទ្វារកញ្ចក់ផ្ទះ បែកអស់ចំនួន៤ផ្ទាំង រួចហើយក្រុមជនសង្ស័យទាំងនោះជិះម៉ូតូគេចចេញទៅបាត់។
ដោយសារស្គាល់មុខ និងស្គាល់ផ្ទះ ជនរងគ្រោះក៏រត់ទៅប្តឹងប៉ូលិស ទើបនៅវេលាម៉ោង៨យប់ ថ្ងៃទី២៩ ខែធ្នូនេះ លេចមុខក្រុមជនសង្ស័យទាំងនោះចូលក្នុងភូមិ ជនរងគ្រោះក៏រាយការណ៍ប្រាប់ប៉ូលិសអោយ ចុះទៅឃាត់ខ្លួនបានម្នាក់ រួចនាំទៅសាកសួរ និងបន្តទៅឃាត់ខ្លួន បក្ខពួកចំនួន២នាក់ទៀត ។
ក្រោយពីឃាត់ខ្លួនក្រុមជនសង្ស័យបង្កអសន្តិសុខក្នុងមូលដ្ឋាន បណ្តាលឱ្យខូចខាតរបស់ទ្រព្យសម្បត្តិអ្នកដទៃបាន៣នាក់ សមត្ថកិច្ចនាំទៅធ្វើការសាកសួរនៅប៉ុស្តិ៍ ដើម្បីអនុវត្តន៍បន្តតាមនីតិវិធី ដែលផ្អែកតាមបណ្តឹងរបស់ជនរងគ្រោះដែលដាក់តម្កល់ស្រាប់ ៕
ចែករំលែកព័តមាននេះ