រាជធានីភ្នំពេញ ៖ រដ្ឋសភាបានកំណត់យកថ្ងៃទី៣ មករា បើសម័យប្រជុំពេញ ដើម្បីពិភាក្សា និងអនុម័តវិសោធនកម្មច្បាប់ចំនួនពីរដែលខ្លឹមសារច្បាប់នេះត្រូវបន្ថែមចំនួនសមាជិកក្រុមប្រឹក្សា រាជធានី ក្រុង ស្រុក…
រាជធានីភ្នំពេញ ៖ រដ្ឋសភាបានកំណត់យកថ្ងៃទី៣ មករា បើសម័យប្រជុំពេញ ដើម្បីពិភាក្សា និងអនុម័តវិសោធនកម្មច្បាប់ចំនួនពីរដែលខ្លឹមសារច្បាប់នេះត្រូវបន្ថែមចំនួនសមាជិកក្រុមប្រឹក្សា រាជធានី ក្រុង ស្រុក ខណ្ឌផងដែរ ។
ច្បាប់ចំនួនពីរដែលត្រូវរដ្ឋសភាបើកសម័យប្រជុំអនុម័ត គឺទី១- សេចក្តីស្នើច្បាប់ស្តីពីវិសោធនកម្មច្បាប់ស្តីពីការគ្រប់គ្រងរាជរដ្ឋបាលរាជធានីខេត្ត ក្រុង ស្រុក ខណ្ឌ និងទី២-សេចក្តីស្នើ ច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានីក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុកក្រុមប្រឹក្សាខណ្ឌ ។
លោកឈាង វុន អ្នកនាំពាក្យរដ្ឋសភា និងជាប្រធានគណៈកម្មការទី៥ រដ្ឋសភាបានឲ្យដឹងក្រោយប្រជុំគណៈកម្មាធិការអចិន្ត្រៃយ៍ររដ្ឋសភាដឹកនាំដោយសម្តេច ហេង សំរិន ប្រធានរដ្ឋសភា នាព្រឹកថ្ងៃទី៣១ ធ្នូយ៉ាងដូច្នេះថា ការធ្វើវិសោធនកម្មច្បាប់ទាំងនេះ ដើម្បីផ្តល់លទ្ធភាព ដល់ថ្នាក់ក្រោមជាតិមានលទ្ធភាពគ្រប់គ្រាន់ក្នុងការធ្វើការងារ និងនៅជិតប្រជាពលរដ្ឋ ។
ទោះបីជាយើងមានច្បាប់រួចហើយក្តីក៏យើងមើលឃើញថា សមាជិកក្រុមប្រឹក្សារាជធានីក្រុមប្រឹក្សា ខេត្ត ស្រុក ខណ្ឌ មានការខ្វះចំនួនដែលអាចបង្កើនចំនួនសមាជិកទាំងនេះងាយស្រួលពួកគាត់នៅជិតប្រជាពលរដ្ឋ ដើម្បីបម្រើប្រជាពលរដ្ឋឲ្យបានដិតដល់ ។ លោក ឈាង វុន បានឲ្យដឹងទៀតថា ការធ្វើវិសោធនកម្មច្បាប់នេះ ដោយសារតែច្បាប់នេះមិនទាន់មានខ្លឹមសារគ្រប់ជ្រុងជ្រោយ ។
ដូច្នេះការធ្វើវិសោធនកម្មច្បាប់នេះ ដើម្បីបន្ថែមខ្លឹមសារបន្ថែម ដើម្បីឲ្យច្បាប់ទាំងនេះខ្លឹមសារគ្រប់ជ្រុងជ្រោយ ។ លោកបន្តថា មិនថាច្បាប់នេះទេ គឺមានច្បាប់មួយចំនួនទៀត និងត្រូវធ្វើវិសោធនកម្មនៅ ដើម្បីឆ្នាំ២០១៩នេះ ។ លោកបញ្ជាក់ថា «យើងជាអ្នកតំណាងរាស្ត្រត្រូវតែមើលថា តើមានអ្វីខ្លះដែលជាតម្រូវការសង្គម និងការវិវឌ្ឍរបស់សង្គម ហើយត្រូវធ្វើការកែសម្រួល វិសោធនកម្មតាមនឹង» ។
សូមជម្រាបថា សម្តេចតេជោ ហ៊ុន សែន នាយករដ្ឋមន្ត្រីធ្លាប់បានឲ្យដឹងថា នៅពេលធ្វើវិ សោធនកម្មច្បាប់ស្តីពីការគ្រប់គ្រងរាជរដ្ឋបាលរាជធានីខេត្តក្រុងស្រុកខណ្ឌ និងទី២- សេចក្តី ស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានីក្រុមប្រឹក្សា ខេត្តក្រុមប្រឹក្សាក្រុង ក្រុមប្រឹក្សា ស្រុក ក្រុមប្រឹក្សាខណ្ឌ នោះសមាជិកក្រុមប្រឹក្សា រាជធានី ខេត្ត ក្រុង ស្រុក ខណ្ឌនឹងត្រូវបន្ថែម ប៉ុន្តែចំនួនបន្ថែមនោះមិនដូចគ្នានោះទេ ៕
ចែករំលែកព័តមាននេះ