រាជធានីភ្នំពេញ ៖ រយៈពេល៣ថ្ងៃក្រោយព្រឹត្តិការណ៍ប្រដាល់ពិភពលោក ឬ Khmer Fight ដែលអ្នករៀបចំបានកំណត់ឈ្មោះថា គុនខ្មែរពិភពលោកបានលេចរូបរាងនៅបរិវេណពហុកីឡដ្ឋានមរតកតេជោ កាន់តែធ្វើឱ្យព្រឹត្តិការណ៍សម្ពោធវិមានអនុស្សាវរីយ៍នយោបាយឈ្នះឈ្នះកក្រើកយ៉ាងខ្លាំង ខណៈដែលកម្មវិធីនេះ…
រាជធានីភ្នំពេញ ៖ រយៈពេល៣ថ្ងៃក្រោយព្រឹត្តិការណ៍ប្រដាល់ពិភពលោក ឬ Khmer Fight ដែលអ្នករៀបចំបានកំណត់ឈ្មោះថា គុនខ្មែរពិភពលោកបានលេចរូបរាងនៅបរិវេណពហុកីឡដ្ឋានមរតកតេជោ កាន់តែធ្វើឱ្យព្រឹត្តិការណ៍សម្ពោធវិមានអនុស្សាវរីយ៍នយោបាយឈ្នះឈ្នះកក្រើកយ៉ាងខ្លាំង ខណៈដែលកម្មវិធីនេះ មានអ្នកទស្សនាយ៉ាងកកកុនណែនតាន់តាប់។
កីឡាករកម្ពុជា កម្រិតA និងកីឡាករបរទេសច្រើនគូ មិនត្រឹមតែប្រកួតគ្នាយកប្រាក់រង្វាន់ដែលមានតម្លៃខ្លួនខ្ពស់ប៉ុណ្ណោះទេ ប៉ុន្តែក៏ទទួលបានមេដាយកិត្តិយសម្នាក់មួយ មិនថាអ្នកចាញ់ ឬអ្នកឈ្នះ ដើម្បីអនុស្សាវរីយ៍។ ព្រឹត្តិការណ៍នេះ ត្រូវបានអ្នករៀបចំកម្មវិធីលោក សេង កដិកា អះអាងថា នេះជាព្រឹត្តិការណ៍លើកដំបូងគេនៅក្នុងប្រទេសកម្ពុជា ធ្វើឡើងដែលប៉ុស្ដិ៍លេខ៥ ទទួលសិទ្ធិរៀបចំដោយកម្មវិធីនេះមានលក្ខណៈដូចគ្នានឹងព្រឹត្តិការណ៍ Thai Fight ដែលថៃ ធ្វើឡើងដើម្បីផ្សព្វផ្សាយក្បាច់គុនរបស់ខ្លួននោះដែរ។
កីឡាករអន្តរជាតិមកពីប្រទេសផ្សេងរហូតដល់១៤ប្រទេស ត្រូវគេឃើញបង្ហាញខ្លួននៅក្នុងកម្មវិធីនេះ ដោយការបង្ហាញខ្លួនមួយគូៗ បើទោះជាមានកីឡាករបរទេសខ្លះប្រកួតមិនល្អ ប៉ុន្តែក៏ធ្វើឱ្យអ្នកទស្សនាចាប់អារម្មណ៍។ ព្រឹត្តិការណ៍នេះ ត្រូវបានធ្វើឡើងរយៈពេល៣ថ្ងៃ ពោលគឺតាំងពីមុនពិធីសម្ពោធវិមានឈ្នះឈ្នះមួយថ្ងៃមកម្ល៉េះ។
កម្មវិធីនេះផ្ដើមឡើងនៅថ្ងៃទី២៨ ធ្នូ និងបញ្ចប់នៅថ្ងៃទី៣០ ធ្នូ ដោយនៅថ្ងៃទី៣១ ធ្នូ ដែលជាថ្ងៃដាច់ឆ្នាំ និងជាថ្ងៃចុងក្រោយក្នុងពិធីសម្ពោធវិមានឈ្នះឈ្នះ ក៏មានការប្រកួតប្រដាល់ដូចគ្នាផងដែរ ប៉ុន្តែនោះជាការបប្រកួតជម្រុះចាញ់ធ្លាក់ដែលប៉ុស្ដិ៍លេខ៥ ធ្លាប់បានធ្វើឡើងនៅព្រែកកំពិស។
អ្នករៀបចំព្រឹត្តិការណ៍ Thai Fight បានអះអាងថា ព្រឹត្តិការណ៍នេះនឹងបន្តបង្ហាញខ្លួនជាលើកទី២ ក្នុងពេលឆាប់ៗ ដោយគ្រោងនឹងរៀបចំនៅតាមបណ្ដាខេត្ត បន្ទាប់មកក៏នឹងរៀបចំនៅក្រៅប្រទេសដូចគ្នានឹងព្រឹត្តិការណ៍ Thai Fight។ កីឡាករជនជាតិវៀតណាម ជនជាតិអ៊ីរ៉ង់ ឥណ្ឌា ឡាវ ថៃ និងទុយនីស៊ីនីជាដើម សរុប១៤ប្រទេសត្រូវគេឃើញចូលប្រកួត ខណៈដែលកម្ពុជាGrade A និងកីឡាករបរទេសត្រូវប្រកួតគ្នាជាលក្ខណៈកីឡាករអាជីព ហើយកីឡាករមួយក្រុមទៀតប្រកួតជាលក្ខណៈពាក់កណ្ដាលអាជីព ដោយមានពាក់ប្រដាប់ការពារលើក្បាល និងលើខ្លួន។
លោក សេង កដិកា បន្តថា កីឡាករដែលទទួលជ័យជម្នះនឹងត្រូវមាននៅក្នុងបញ្ជីគុនខ្មែរពិភពលោក ហើយនៅពេលការប្រកួតមួយនេះរៀបចំជាលើកទី២ នឹងមានឈ្មោះប្រកួតទៀត ប៉ុន្តែបើចាញ់២ដង នឹងអស់សិទ្ធិចូលរួមប្រកួតជាថ្មី។ ការប្រកួតនេះបានបញ្ចប់កាលពីយប់ថ្ងៃទី៣១ ធ្នូ ដោយបន្សល់នូវទិដ្ឋភាពជក់ចិត្តទាំង៣ថ្ងៃតែម្ដង ទម្រាំរកឃើញកីឡាករអ្នកឈ្នះ និងអ្នកចាញ់៕
ចែករំលែកព័តមាននេះ