រាជធានីភ្នំពេញ ៖ សំណង់អគារនៅក្នុងរាជធានីភ្នំពេញបានរីកសាយភាយគួរឲ្យតក់សម្គាល់ ដោយវិនិយោគិនក្នុងនិងក្រៅស្រុក បានបណ្ដាក់ទុនជាហូរហែទៅលើគម្រោងវិនិយោគអគារខ្ពស់ៗ និងសំណង់លំនៅឋាន ដើម្បីបំពេញទៅតាមតម្រូវការ ។ ជាការកត់សម្គាល់ ត្រើយខាងកើតទន្លេមេគង្គ គឺនៅតំបន់ជ្រោយចង្វាភាគខាងកើតក៏ត្រូវបានកំពុងអភិវឌ្ឍន៍ជាបន្តបន្ទាប់ផងដែរ ។
បើតាមអ្នកជំនាញអចលនទ្រព្យកម្ពុជា បានបង្ហាញថា នៅរាជធានីភ្នំពេញ ភាគខាងណាក៏មានសក្ដានុពលដែរ គ្រាន់តែសក្ដានុពលខុសៗគ្នាប៉ុណ្ណោះ ។ បើសម្លឹងមើលភាគខាងកើតនៃរាជធានីភ្នំពេញនាពេលបច្ចុប្បន្ននេះ ត្រូវបានគេសង្កេតឃើញថា មានក្រុមហ៊ុនមួយចំនួនបាននិងកំពុងសាងសង់បុរីលំនៅឋាន និងអគារខ្ពស់ៗ សម្រាប់ផ្គត់ផ្គង់ជាបន្ដបន្ទាប់ ។
អ្នកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា បានលើកឡើងថា វិស័យសំណង់នៅតែមានសក្ដានុពល សម្រាប់វិនិយោគិនបណ្ដាក់ទុនវិនិយោគ ក្នុងនោះភ្នំពេញ នៅតែមានភាពទូលំទូលាយសម្រាប់សាងសង់សំណង់អគារ បើទោះបីជាខេត្តពីរផ្សេងទៀត គឺខេត្តសៀមរាប និងខេត្តព្រះសីហនុ កំពុងមានសន្ទុះយ៉ាងណាក៏ដោយ ។
លោកឧកញ៉ាបន្ដថា ៖« អ្នកវិនិយោគនៅតែអាចមកបណ្ដាក់ទុនវិនិយោគសំណង់នៅកម្ពុជា ហើយយើងជឿជាក់ថា ឆ្នាំខាងមុខៗនេះវិស័យសំណង់នៅតែដើរតួនាទីសំខាន់ក្នុងការជំរុញ កំណើនសេដ្ឋកិច្ចកម្ពុជា»។ ទន្ទឹមនឹងនេះ ក្នុងនាមជាអ្នកសាងសង់មួយរូប លោកនឹងព្យាយាមទាក់ទាញ និងស្វាគមន៍បណ្ដាវិនិយោគិនមកពីគ្រប់ទិសទី ដែលមានបំណងមកវិនិយោគនៅក្នុងប្រទេស ដើម្បីលើកកម្ពស់ប្រទេសកម្ពុជាកាន់តែមានការអភិវឌ្ឍបន្ថែមទៀត ។
យ៉ាងណាក៏ដោយ សេដ្ឋវិទូជាន់ខ្ពស់នៃធនាគារពិភពលោក ប្រចាំប្រទេសកម្ពុជា លោកលី សូដេត បានបញ្ជាក់កន្លងមកថា ក្នុងវិស័យសំណង់ និងអចលនទ្រព្យ ត្រូវបង្កើនការប្រុងប្រយ័ត្នខ្ពស់ ដោយសារតែវដ្ដនៃវិបត្តិវិស័យនេះកាន់តែខិតជិតមកដល់ ។ លោកថា ៖« អ្នកពាក់ព័ន្ធទាំងអស់ត្រូវតែបង្កើនការប្រុងប្រយ័ត្ន និងធ្វើយ៉ាងណាកុំឲ្យវិស័យនេះ ធ្លាក់ចុះលឿនពេក ដែលអាចប៉ះពាល់ដល់កំណើនសេដ្ឋកិច្ចកម្ពុជាទាំងមូល » ។
លោកបន្តថា ក្នុងរយៈពេលជាង១០ឆ្នាំមកហើយ ចាប់តាំងពីវិស័យអចលនទ្រព្យបានធ្លាក់ចុះ ក៏ដូចជា វិបត្តិសេដ្ឋកិច្ចមក វិស័យអចលនទ្រព្យកម្ពុជា មិនដែលជួបបញ្ហានោះទេ គឺមានសន្ទុះជាបន្តបន្ទាប់ ក៏ប៉ុន្តែនៅលើពិភពលោកនេះ មិនមានប្រទេសណាមួយ ដែលមានកំណើនរហូតនោះទេ ពោលគឺវាតែងតែមានឡើងមានចុះ គ្រាន់តែសន្ទុះនៃការឡើងចុះ មិនខ្ពស់ទាបជាងគ្នាខ្លាំង ។ កម្ពុជាក៏ដូចគ្នា ត្រូវប្រយ័ត្នត្រង់ចំណុចនេះ គឺត្រូវការពារកុំឲ្យសន្ទុះធ្លាក់ចុះខ្លាំងពេក ដើម្បីរក្សាកំណើនសេដ្ឋកិច្ចឲ្យនៅស្ថិតស្ថេរបានយូរអង្វែង ៕
ចែករំលែកព័តមាននេះ