ខេត្តឧត្តរមានជ័យ ៖ ម៉ូតូមួយគ្រឿងបុកគោយន្តពីក្រោយយ៉ាងពេញទំហឹង បណ្តាលឱ្យមនុស្សម្នាក់ស្លាប់បាត់បង់ជីវិតនៅនឹងកន្លែងកើតហេតុភ្លាមៗ កាលពីម៉ោង២១យប់ ថ្ងៃទី២៨ ខែធ្នូ ឆ្នាំ២០១៨ នៅតាមបណ្តោយផ្លូវជាតិលេខ៥៦បេ ស្ថិតក្នុងភូមិអូរព្រាល សង្កាត់បុស្បូវ ក្រុងសំរោង។
ជនរងគ្រោះខាងលើឈ្មោះ ឌំ បូរ៉ាភេទប្រុស អាយុ២៧ឆ្នាំ មុខរបរជាទាហាននៅកងពលតូចអន្តរាគមន៍លេខ៥ ទីលំនៅបច្ចុប្បន្ននៅភូមិស្រែណូយ ឃុំស្រែណូយ ស្រុកវ៉ារិន ខេត្តសៀមរាប។ ជនរងគ្រោះបានស្លាប់នៅកន្លែងកើតហេតុ ដោយបានបើកបរម៉ូតូម៉ាក HONDA CLUBពណ៌សពា ក់ស្លាកលេខភ្នំពេញ ២AR-៧៨.៩៩ ចំណែកអ្នកបើកបរគោយន្តកន្ត្រៃឈ្មោះ គាប់ ផុងភេទប្រុស អាយុ២៩ឆ្នាំ រស់នៅភូមិត្រពាំងអំពឹល ឃុំគោកមន ស្រុកបន្ទាយអម្ពឹល ។
បើតាមប៉ូលិសផ្នែកចរាចរណ៍បានឱ្យដឹងថា ក្រោយពីកើតហេតុ សមត្ថកិច្ចជំនាញផ្នែកចរាចរណ៍ស្រុកបានចុះទៅដល់កន្លែងកើតហេតុ ពិនិត្យនិងធ្វើការវាស់វែងឃើញថា ម៉ូតូបើកបរក្នុងល្បឿនលឿនជ្រុលទៅបុកគោយន្តកន្ត្រៃពីក្រោយយ៉ាងពេញទំហឹង បណ្តាលឱ្យស្លាប់ ខណៈគោយន្តនោះពុំដាក់ស្លាកសញ្ញាសម្គាល់។
តែទោះជាបែបណាសពជនរងគ្រោះត្រូវបានប្រគល់ទៅឱ្យក្រុមគ្រួសារយកទៅធ្វើបុណ្យទៅតាមប្រពៃណី ចំណែកវត្ថុតាងម៉ូតូ និងគោយន្តត្រូវបានយកទៅរក្សាទុកនៅអធិការដ្ឋានរង់ចាំធ្វើការដោះស្រាយនៅពេលក្រោយ៕
ចែករំលែកព័តមាននេះ