ខេត្តរតនគិរី ៖ កំលាំងជំនាញការិយាល័យប្រឆាំងគ្រឿងញៀនបានចុះបង្ក្រាបករណីជួញដូរនិង ប្រើប្រាស់ដោយខុសច្បាប់នូវសារធាតុញៀនដោយវិធានការញុះញង់ដើម្បីឃាត់ខ្លួនជនសង្ស័យបានម្នាក់ និងដកហូតម្សៅក្រាមសថ្លាសង្ស័យសារធាតុញៀន១កញ្ចប់។
ការបង្ក្រាបនោះធ្វើឡើងនៅវេលាម៉ោង៤រសៀលថ្ងៃទី២៧ ខែធ្នូ ឆ្នាំ២០១៨ ត្រង់ចំណុចតូបលក់សាច់គោក្នុងផ្សារបានលុងភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី។
ការបង្ក្រាបនេះដោយមានការបញ្ជាផ្ទាល់ពីលោកឧត្ដមសេនីយ៍ត្រី វ៉ាន់ សង្វាត់ ស្នងការរងផែនការងារប្រឆាំងបទល្មើស និងដោយមានការសម្របសម្រួលពីលោក រ៉ាបូ រ៉ាន់ឌី ព្រះរាជអជ្ញារងអមសាលាដំបូងខេត្តរតនគិរីផងដែរ។
ពាក់ព័ន្ធនឹងករណីខាងលើ សមត្ថកិច្ចបានធ្វើការឆែកឆេរផ្ទះរបស់មុខសញ្ញាជនសង្ស័យខាងលើស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី រកឃើញសំបកថង់ច្រកថ្នាំញៀនមួយចំនួន និងជញ្ជីងមួយគ្រឿងផងដែរ។
បន្ទាប់មកសមត្ថកិច្ចក៏បន្តទៅឆែកឆេរផ្ទះជួលរបស់ជនសង្ស័យមួយកន្លែងទៀតស្ថិតក្នុងភូមិជ្រី សង្កាត់ឡាបានសៀក ក្រុងបានលុងខេត្តរតនគិរី រកឃើញថង់សម្រាប់ច្រកថ្នាំញៀនមួយចំនួនធំ និងសម្ភារៈសេពមួយចំនួនទៀតផងដែរ។
ជនសង្ស័យខាងលើដែលត្រូវឃាត់ខ្លួនបានឈ្មោះយូ សុភ័ក្ត្រ ភេទប្រុស អាយុ ៣១ឆ្នាំ ជនជាតិខ្មែរអ៊ិស្លាម។
ក្រោយពេលឃាត់ខ្លួន សមត្ថកិច្ចបានធ្វើតេស្តទឹកនោមជនសង្ស័យ ជាលទ្ធផលរកឃើញថា អវិជ្ជមាន (-) ។
វត្ថុតាងដកហូតរួមមាន ម្សៅក្រាមសថ្លាសង្ស័យសារធាតុញៀនចំនួន១កញ្ចប់ ទូរស័ព្ទ២គ្រឿង ដែកកេះ៧ដើម ម៉ូតូ១គ្រឿង ថង់សម្រាប់ច្រកថ្នាំញៀនមួយចំនួនធំ លុយខ្មែរ៥០០០០រៀល(ជាលុយប្រើសម្រាប់ញុះញង់) និងសម្ភារៈសេពមួយចំនួនទៀត។
ជនសង្ស័យរួមទាំងវត្ថុតាងត្រូវបានសមត្ថកិច្ចនាំទៅកាន់ការិយាល័យជំនាញដើម្បីកសាងសំណុំរឿងបញ្ជូនទៅអយ្យកាអមសាលាដំបូងខេត្តចាត់ការតាមផ្លូវច្បាប់ ៕
ចែករំលែកព័តមាននេះ