រាជធា នីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហា ផ្ទៃបាន សម្តែងមិនចាប់អារម្មណ៍ចំពោះពាក្យបណ្តឹងរបស់លោក សម រង្ស៊ី ដែលប្តឹងទៅសហភាពអឺរ៉ុប (EU) ឲ្យដាក់ទណ្ឌកម្មកាន់តែខ្លាំងឡើងមកលើរាជរដ្ឋាភិបាលកម្ពុជានោះទេ។
ការប្រកាសរបស់សម្តេច ស ខេង នេះបន្ទាប់ពីលោក សម រង្ស៊ី អតីតគណបក្សសង្គ្រោះជាតិដែលកំពុងរស់នៅក្រៅប្រទេសបានអះអាងថា លោកបានដាក់ពាក្យបណ្តឹងទៅសហភាពអ៊ឺរ៉ុបម្តងទៀត ដើម្បីស្នើឲ្យ ពន្លឿនដាក់ទណ្ឌកម្មមកលើរាជរដ្ឋាភិបាលកម្ពុជា ។
យ៉ាងណាក្តីនៅក្នុងឱកាសចូលរួមបិទសិក្ខាសាលាជាតិស្ដីអំពីការរៀបចំផែនការសកម្ម ភាព និងថវិកា ឆ្នាំ២០១៩ នៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) កាលពីរសៀលថ្ងៃទី២៧ ខែធ្នូ ឆ្នាំ២០១៨ សម្ដេច ស ខេង បានថ្លែងថា «ខ្ញុំមិនចង់ឆ្លើយតបអ្វីទេនោះជារឿងរបស់គាត់ (សម រង្ស៊ី) គាត់អត់គិតពីផលប្រយោជន៍ជាតិទេ គាត់ធ្វើតាមអំពើចិត្តរបស់គាត់ អាហ្នឹងរឿងរបស់គាត់ទេ ។
ព្រោះលោក សម រង្ស៊ី មិនដែលធ្វើអ្វីដើម្បីផលប្រយោជន៍ជាតិទេ គឺគិតតែពីការរកវិធីសាស្ត្រមកបំផ្លាញក ម្ពុជាប៉ុណ្ណោះ» ។ សម្តេចបន្តថា បច្ចុប្បន្ននេះទាំងរាជរដ្ឋាភិបាល និងគ្រប់ភាគីពាក់ព័ន្ធបាន និងកំពុងគិត គូរកវិធានការណ៍ ដើម្បីឲ្យជាតិមានសុខសន្តិភាព ការអភិវឌ្ឍតែប៉ុណ្ណោះបម្រើពលរដ្ឋអំពីសេវាសាធារណៈ និងខិតខំពង្រឹងលទ្ធិប្រជាធិបតេយ្យ ។ រដ្ឋមន្ត្រីក្រសួងមហាផ្ទៃបានបញ្ជាក់បន្ថែមថា សម្តេចមិន ចាប់អារម្មណ៍លើលោក សម រង្ស៊ី ទេ ។
សូមបញ្ជាក់ថា កាលពីថ្ងៃទី២៦ ធ្នូ លោក សម រង្ស៊ី បានបង្ហាញក្នុងហ្វេសប៊ុកថា«បានដាក់ពាក្យបណ្តឹងទៅ សហភាពអឺរ៉ុប ឲ្យដាក់ទណ្ឌកម្មកាន់តែខ្លាំង និងកាន់តែឆាប់មកលើរបបសម្តេច ហ៊ុន សែន បើអាជ្ញាធរស្រុកខ្មែរនៅតែគំរាមកំហែង មន្ត្រីជាប់ឆ្នោត និងសកម្មជន គណបក្សសង្គ្រោះជាតិ មិនឲ្យបង្ហោះវីដេអូដែលក្នុងនោះមន្ត្រីជាប់ឆ្នោត និងសកម្មជនទាំងនោះគាំទ្រលោក សម រង្ស៊ី ជាប្រធានស្តីទីគណបក្សសង្គ្រោះជាតិ និងគាំទ្រពាក្យស្លោក សម រង្ស៊ី និងកឹម សុខា ជាមនុស្សតែមួយ » ។ សារគំរាមប្តឹងរបស់អតីតមេបក្សប្រឆាំងលោក សម រង្ស៊ីនេះ ដើម្បីឲ្យអន្តរជាតិដាក់សម្ពាធមកកម្ពុជានេះ មិនមែនជាលើកដំបូងនោះទេ គឺមានច្រើនលើកមកហើយ ៕
ចែករំលែកព័តមាននេះ