រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអះអាង នឹងគ្មានការស្នើសុំដកបម្រាមដល់អតីតមន្ត្រីនយោបាយ គណបក្សសង្គ្រោះជាតិដែលកំពុងជាប់បម្រាម នោះទេ បើសាម៉ីខ្លួនមិនបានស្នើសុំ ។
ការប្រកាសរបស់ប្រមុខដឹកនាំក្រសួងមហាផ្ទៃនេះ ខណៈដែលសេចក្តីស្នើវិសោធនច្បាប់មាត្រា៤៥ ថ្មី (ស្ទួន) ត្រូវបានឆ្លងផុតដៃព្រឹទ្ធសភា កាលពេលថ្មីកន្លងមកនេះពោល គឺនៅតែរង់ចាំការឡាយព្រះហត្ថលេខា ពីព្រះមហាក្សត្រដាក់ឲ្យអនុវត្តតែប៉ុណ្ណោះ ។ ផ្តល់កិច្ចសម្ភាសន៍ជាមួយអ្នកសារព័ត៌មានកាលពីរសៀល ថ្ងៃទី២៧ ធ្នូ ក្រោយបិទសិក្ខាសាលាជាតិស្ដីអំពីការរៀបចំផែនការសកម្មភាព និងថវិកា ឆ្នាំ២០១៩ នៃគណៈ កម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិ (គ.ជ.អ.ប) សម្តេច ក្រឡាហោម ស ខេង បានបញ្ជាក់ថា សម្តេច មិនទាន់ដឹងថា មន្ត្រីអតីតគណបក្សសង្គ្រោះជាតិប៉ុន្មាន ស្នើសុំទេ ។
ប៉ុន្តែក្នុងសេចក្តីស្នើច្បាប់បានបញ្ជាក់ថា បើមន្ត្រីណាចង់រួចបម្រាមត្រូវតែដាក់ពាក្យស្នើសុំ ។ សម្តេចបញ្ជាក់ថា «ជាធម្មតាទេ! កាលណាគាត់មិនសុំយើងទៅលើកលែង ឬលុបអត់មានន័យ អីញ្ចឹងហើយ រឿងនេះអាស្រ័យលើសាម៉ីខ្លួនម្នាក់ៗ» ។
សូមជម្រាប តុលាការកំពូលបានសម្រេចដាក់បម្រាមដល់អតីតមន្ត្រីគណបក្សសង្គ្រោះជាតិ ចំនួន ១១៨រូបមិនឲ្យធ្វើនយោបាយរយៈពេល៥ឆ្នាំ ។ ការជាប់បម្រាមនេះ ដើម្បីកុំឲ្យរំលោភលើកអំណាចតុលាការ កំពូលនោះសមាជិករដ្ឋសភាគណបក្សប្រជាជនកម្ពុជាប្រមាណជាង៨០រូប បានស្នើសុំធ្វើវិសោធនកម្មមាត្រា៤៥ ថ្មី (ស្ទួន) នៃច្បាប់ស្តីពីគណបក្សនយោបាយ ដើម្បីផ្តល់ឱកាស ឬសិទ្ធិដល់អតីតមន្ត្រីគណបក្សសង្គ្រោះជាតិទាំងនោះឲ្យអាចធ្វើនយោបាយឡើងវិញដោយតម្រូវធ្វើ សំណើរទៅរដ្ឋមន្ត្រីក្រសួងមហាផ្ទៃ ហើយរដ្ឋមន្ត្រីក្រសួងមហាផ្ទៃស្នើទៅនាយករដ្ឋមន្ត្រីបន្ទាប់មក នាយករដ្ឋមន្ត្រីស្នើ ថ្វាយព្រះមហាក្សត្រដើម្បីដកបម្រាម ។
យ៉ាងណាក្តីបើតាមមន្ត្រីជាន់ខ្ពស់អតីតគណបក្សសង្គ្រោះជាតិលោក គង់ គាំ ធ្លាប់បានឲ្យ ដឹងថា ប្រហែលជាមានមន្ត្រីនយោបាយរបស់អតីតគណបក្សសង្គ្រោះជាតិប្រមាណជាង១០នាក់គ្រោងដាក់ស្នើសុំដកបម្រាមនយោបាយ ដើម្បីមានសិទ្ធិធ្វើនយោបាយវិញ ។ លោកថា ក្នុងនោះមានរូបលោក (គង់ គាំ) និងកូន គឺលោក គង់ បូរ៉ា នឹងធ្វើសំណើរទៅរដ្ឋមន្ត្រីក្រសួងមហាផ្ទៃ ឬសម្តេចតេជោ ហ៊ុនសែន ដើម្បីសុំដកបម្រាម នយោបាយ ហើយមានសិទ្ធិធ្វើនយោបាយឡើងវិញ ។ បើតាមលោក គង់ គាំ ក៏បានទម្លាយ ឲ្យដឹងថាអ្នក ដែលស្នើសុំនោះភាគច្រើន អ្នកគាំទ្រ នយោបាយលោក កឹម សុខា អតីតប្រធានគណបក្សសង្គ្រោះជាតិ ។
សេចក្តីស្នើវិសោធនកម្មមាត្រា៤៥ថ្មី (ស្ទួន)ត្រូវបានអ្នកតំណាងរាស្ត្រចំនួន៨៧រូបបានស្នើសុំធ្វើវិសោធ នកម្មទៅជាសេចក្តីស្នើច្បាប់មាត្រា៤៥ថ្មី(ស្ទូនមួយ)ដែលមានខ្លឹមសារយ៉ាងដូច្នេះថា បុគ្គលដែលត្រូវ តុលាការសម្រេចហាមឃាត់ការធ្វើសកម្មភាពនយោបាយមិនអាចបង្កើតគណបក្សនយោបាយ ឬចូលរួមក្នុង គណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំង គណ បក្សណាមួយបានឡើយ ។
បុគ្គលដែលបានតុលាការសម្រេចហាមឃាត់ការធ្វើសកម្មភាពនយោបាយនេះនឹងអាចទទួលបាន វិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិ សម្បទាឡើងវិញ ដោយព្រះមហាក្សត្រតាមដំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រី ក្រសួងមហាផ្ទៃ ។
ការធ្វើវិសោធន កម្ម ច្បាប់នេះធ្វើមិនស្ថិតក្រោមគំនាបពីបរទេសនោះទេ ។ គឺការធ្វើវិសោធនកម្មច្បាប់គណបក្សនយោបាយនេះ ដើម្បីធ្វើការបង្រួបបង្រួមជាតិ សណ្តោសប្រណីរបស់គណបក្សប្រជាជនកម្ពុជាដែលគោរពលទ្ធិប្រជាធិបតេយ្យសេរីពហុបក្ស ៕
ចែករំលែកព័តមាននេះ