ខេត្តពោធិ៍សាត់ ៖ បុរសម្នាក់អារដើមឈើផ្ដាច់ ប៉ុន្តែដោយខ្វះការប្រុងប្រយ័ត្នទើបបណ្ដាលឲ្យកំណាត់ដើមឈើនោះរមៀលសង្កត់លើស្លាប់ភ្លាមៗនៅនឹងកន្លែងកើតហេតុ ។ ករណីនេះបានកើតឡើងនៅចំណុចភ្នំក្រឡឹង ស្ថិតក្នុងភូមិសាស្ត្រភូមិដីក្រហម ឃុំអន្លង់រាប ស្រុកវាលវែង កាលពីវេលាម៉ោង១៥និង៤៥នាទីរសៀលថ្ងៃទី២៦ ខែធ្នូ ឆ្នាំ២០១៨ ។
សមត្ថកិច្ចឲ្យដឹងថា ជនរងគ្រោះឈ្មោះ កឹម សយ ភេទប្រុស អាយុ៥៣ឆ្នាំ មានស្រុកកំណើតនៅភូមិរាជានុគោល ឃុំរាជានុគោល ស្រុកស្ទឹងត្រែង ខេត្តស្ទឹងត្រែង ។ ជនរងគ្រោះបានមកស្នាក់នៅបណ្ដោះអាសន្ននៅភូមិដីក្រហម ឃុំអន្លង់រាប ស្រុកវាលវែង មានមុខរបរជាអ្នកស៊ីឈ្នួលអារឈើឲ្យគេ ដើម្បីបានលុយចិញ្ចឹមជីវិតប្រចាំថ្ងៃ ។
សមត្ថកិច្ចឲ្យដឹងថា នៅរសៀលនោះជនរងគ្រោះបានអារដើមឈើទាលមួយដើម ដែលបានកាត់ផ្ដាច់ និងលះមែករួចហើយដេកនៅលើដី ។ ពេលអារដាច់ ស្រាប់តែកំណាត់ដើមឈើទាលនោះរមៀលមកខាងជនរងគ្រោះកិនពីលើជាប់ បណ្ដាលឲ្យស្លាប់ភ្លាមៗនៅនឹងកន្លែងកើតហេតុតែម្ដង ។
សមត្ថកិច្ចចុះទៅពិនិត្យដល់កន្លែងកើតហេតុឃើញថា ជនរងគ្រោះពិតជាស្លាប់ដោយកំណាត់ដើមឈើកិនពីលើប្រាកដមែន ដោយសារតែពេលអារនោះខ្វះការប្រុងប្រយ័ត្ន មិនរកកំណល់កល់ឲ្យធំ និងមិនមើលដីជម្រាល ។ ចំណែកសពបានប្រគល់ឲ្យក្រុមគ្រួសារជនរងគ្រោះយកទៅធ្វើបុណ្យតាមប្រពៃណីផងដែរ ។
គួររំលឹកថា កន្លងមកនេះនៅស្រុកវាលវែង និងស្រុកភ្នំក្រវាញ តែងកើតមានករណីអារដើមឈើក្នុងព្រៃ ភ្លាត់ស្នៀតរលំសង្កត់លើស្លាប់ជាច្រើននាក់មកហើយ ឥឡូវនេះមានករណីអារដើមឈើខ្វះការប្រុងប្រយ័ត្ន បណ្ដាលឲ្យរមៀលកិនលើស្លាប់ម្នាក់ទៀតនៅឃុំអន្លង់រាប ស្រុកវាលវែង ដែលអ្នកខ្លះថា ជាការត្រូវទំនាយព្រៃឈើ ៕
ចែករំលែកព័តមាននេះ