ខេត្តព្រៃវែង ៖ ឆ្នាំនេះដំណាំអំពៅទទួលបានទិន្និផលខ្ពស់ ហើយតម្លៃនៅលើទីផ្សារក៏លក់បានថ្លៃគួរសមផងដែរ ធ្វើអោយប្រជាកសិករនៅឃុំជាខ្លាងស្រុកស្វាយអន្ទរ ខេត្តព្រៃវែង ដែលប្រកបមុខរបរដាំអំពៅគ្រប់គ្នាមានទឹកមុខញញឹមញញែមសប្បាយរីករាយ ហើយអ្នកខ្លះកំពុងតែមមារញឹកក្នុងការភ្ជួរដាស់ដីដាំដុះបន្ត ។
លោក ភាន គឿន អាយុ៥៤ឆ្នាំ ជាកសិករដាំអំពៅនៅភូមិជាខ្លាង ឃុំជាខ្លាង ស្រុកស្វាយអន្ទរ បានឲ្យកោះសន្តិភាពដឹងថា ដំណាំអំពៅឆ្នាំនេះទទួលបានទិន្និផលខ្ពស់ ហើយតម្លៃវិញក៏ថ្លៃគួរសម អាចទទួលយកបានដែរមិនតែប៉ុណ្ណោះឈ្មួញក៏មិនសាំញ៉ាំច្រើន ហើយមកទិញដល់កន្លែងដឹកតាមឡានយកទៅលក់នៅភ្នំពេញតែម្តង ។
លោកពូ ភាន គឿន បានបញ្ជាក់ថា ការងារដាំអំពៅនេះគាត់ត្រូវចាប់ផ្តើមបណ្តុះពូជនៅដើមខែតុលា ដោយប្រើរយៈពេលជាង២ខែពេលដែលពូជអំពៅលូតលាស់ល្អអាចដាំបានទើបគាត់អាចចាប់ផ្តើមធ្វើដី ដោយជួលត្រាទ័រវ៉ៃដីទុក១៥ថ្ងែ ទើបចាប់ភ្ជួរធ្វើធ្វើរង និងចាប់ផ្តើមដាំនៅចុងខែឆ្នូនេះតែម្តង ដោយជាធម្មតាក្នុងដី១ហិកតាអាចដាំអំពៅបានពី៦ម៉ឺន ទៅ៦ម៉ឺន៥ពាន់ដើម ដោយប្រើរយៈពេលចន្លោះពី៧ទៅ៨ខែទើបអាចប្រមូលផលអំពៅបាន ។
មុខរបរដាំអំពៅនេះកសិករត្រូវចំណាយដើមទុនចន្លោះពី១០លានទៅ១៥លានរៀល ក្នុង១ហិកតាលើថ្លៃថ្នាំសង្កូវជី និងកម្មករដាំដុះនៅពេលប្រមូលផលមកវិញ បើអំពៅលក់បានថោក ក្នុង១ហិកតាអាចបានប្រាក់ប្រមាណ២៥លានរៀល តែបើអំពៅបានថ្លៃក្នុង១ហិកតាអាចលក់បានប្រាក់ពី២៨ទៅ៣០លានរៀលដែរ បើទូទាត់កាត់ថ្លៃដើមទុនចេញឃើញថា អាចចំណេញពី១០ទៅ១៥លានរៀលដែរ ។
ជាក់ស្តែងឆ្នាំនេះអំពៅ១ដើមលក់បានតម្លៃពី៦០០ទៅ៧០០រៀលថ្លៃជាងឆ្នាំមុន ដែលក្នុង១ដើមបានតែ៤០០ទៅ៥៥០រៀលប៉ុណ្ណោះទើបធ្វើអោយកសិករអ្នកដាំអំពៅមានទឹកចិត្តសប្បាយរីករាយ ហើយនាំគ្នាបន្តដាំកាន់តែច្រើនដោយរំពឹងថា ឆ្នាំក្រោយអំពៅ និងបានថ្លៃដូចឆ្នាំនេះទៀត ។
លោក អ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រៃវែងបានអោយដឹងថា នៅទូទាំងខេត្តព្រៃវែងមានកសិករប្រកបមុខរបរដាំអំពៅសរុបប្រមាណជាង៣០០គ្រួសារ នៅលើផ្ទះដីដាំដុះជាង៥០០ហិកតាក្នុងនោះស្រុកស្វាយអន្ទរមានអ្នកដាំច្រើនជាងគេ ដោយឡែកស្រុកបាភ្នំ និងស្រុកព្រះស្តេចក៏មានអ្នកដាំដែរ ប៉ុន្តែក្នុងទ្រង់ទ្រាយតូចជាលក្ខណៈគ្រួសារ ហើយចំណែកនៅតាមបណ្តាស្រុកមួយចំនួនទៀតក៏កំពុងចាប់ផ្តើមសាកល្បងដាំជាលក្ខណៈគ្រួសារជាខ្លះៗហើយដែរ ៕
ចែករំលែកព័តមាននេះ