រាជធានីភ្នំពេញ ៖ អតីតមន្ត្រីជាន់ខ្ពស់គណបក្សសង្គ្រោះជាតិលោក គង់ គាំ បានទម្លាយសារសម្តេចតេជោផ្ញើជូនពាក់ព័ន្ធនឹងអ្នកនយោបាយជាប់បម្រាម ហើយអាចមានសិទ្ធិធ្វើនយោបាយឡើងវិញ ។
លោកថា អ្នកនៅតាម សម រង្ស៊ី និងត្រូវជាប់ជាប់ទោសដដែល ចំណែកអ្នកផ្សេងមិនដើរតាមគំនិតលោក សម រង្ស៊ី នោះអាចនឹងត្រូវផ្តល់សិទ្ធិធ្វើនយោបាយឡើងវិញ តាមអំណាចនៃច្បាប់ដែលនឹងចូលជាធរមាននៅពេលខាងមុខនេះ ។ ការលើកឡើងរបស់អតីតឧត្តមប្រឹក្សាគណបក្សសង្គ្រោះជាតិនេះ ខណៈដែលសេចក្តីស្នើវិសោធនកម្មមាត្រា៤៥ ថ្មី (ស្ទួន) ត្រូវបានឆ្លងផុតដៃរបស់ព្រឹទ្ធសភា ហើយ(អនុម័ត) នៅព្រឹកថ្ងៃទី២៥ ធ្នូនេះ ។
លោក គង់ គាំ បានលើកឡើងលើបណ្តាញសង្គមយ៉ាងដូច្នេះថា ឆ្នាំ២០១៨ មុនការបោះឆ្នោតជ្រើសរើសតំណាងរាស្ត្រនីតិ កាលទី៦ (២០១៨-២០២៣) មិនមែនតែខ្ញុំគង់ គាំ ម្នាក់ដែលធ្វើលិខិតសុំសម្តេច សាយ ឈុំ ប្រមុខរដ្ឋស្តីទីលោក ឌិត មន្ទីរ ប្រធានតុលាការកំពូល និងស ម្តេចតេជោ ហ៊ុន សែន នាយករដ្ឋមន្ត្រី ដើម្បីសូមជួយផ្តល់យុត្តិធម៌លើកបម្រាមធ្វើនយោបាយ ដល់រូបខ្ញុំ ។
លោកបញ្ជាក់ថា «នៅពិធីមួយក្នុងវត្តឈូកវ៉ាមុនដំណើរទៅកាន់ប្រទេសអូស្ត្រាលីសម្តេចនា យករដ្ឋមន្ត្រីបានទម្លាយសារពីអ្នកនយោបាយជាប់បម្រាមផ្សេងទៀតថា«មុនអញ្ជើញទៅប្រ ទេសអូស្ត្រាលី សូមលោកពូជួយ…» ។ លោកបន្តថា បន្ទាប់ពីវិសោធនកម្មច្បាប់គណបក្សនយោបាយមាត្រា៤៥ថ្មី (ស្ទួនមួយ) បើកឲ្យអ្នកនយោបាយជាប់បម្រាម ១១៨រូប អាចទទួលបាននីតិសម្បទាធ្វើនយោបាយឡើង វិញ ។
តើប៉ុន្មាននាក់មិនសុំ (តាមសម រង្ស៊ី និងក្រុមមានទោសបន្ត) ប៉ុន្មាននាក់រារែកប៉ុន្មាននាក់គោរពច្បាប់ប្រទេស ដើម្បីប្រើប្រាស់សិទ្ធិ ។ សិទ្ធិសម័យបុព្វកាលសិទ្ធិដែលរដ្ឋធម្មនុញ្ញបានចែងត្រូវកំណត់ដោយច្បាប់ ។ លោកបានបញ្ជាក់ថា « ច្បាប់បិទច្រកច្បាប់បើកច្រក ។ ខ្ញុំគង់ គាំ និង គង់ បូរ៉ា មិនធ្វើចំណាប់ខ្មាំងរបស់មេដឹកនាំ និងគណបក្សនយោបាយក្រៅច្បាប់ទេ» ។ ជាមួយគ្នានោះដែរ លោក គង់គាំ ក៏ទម្លាយពីបញ្ហាផ្ទៃក្នុងក៏ដូចជា គោលនយោបាយរបស់អតីតសង្គ្រោះជាតិ ពិសេសគំនិតលោក សម រង្ស៊ី យ៉ាងដូច្នេះថា ទាំងមជ្ឈដ្ឋានជាតិ និងអន្តរជាតិបានដឹងច្បាស់លាស់រួចទៅហើយថា លោកស្រី មួ សុខហួ និងលោក អេង ឆៃអ៊ាង ជាអនុប្រធានពីររូបក្នុងចំណោមបីរូប គឺជាកូនអុក ដែល សម រង្ស៊ី រៀបចំសម្រាប់គាំទ្រខ្លួនពេលត្រូវយកប្រៀបលើកឹម សុខា ។
លោកបន្តថា លោកស្រី មួ សុខហួ និងលោក អេង ឆៃអ៊ាង ក្រោយលោកសម រង្ស៊ី ជួបសមាជិកសភាសហរដ្ឋអាមេរិក ដែលទំនងជាអន្តរជាតិយល់ថា តួនាទីប្រធានស្តីទី CNRP របស់ សម រង្ស៊ី មិនអាចទទួលយកបានឡើយ ទើបបន្ថែមសារជួយភាពឯការ ។ លោកបន្តថាលំហសម្តែងមតិ និងការជួបជុំដែលបម្រើផែនការបំផុសអតីតសមាជិក CNRP (ក្រៅច្បាប់) និងអ្នកគាំទ្រអោយងើបឈរ (ទាំងក្រៅប្រទេស ទាំងក្នុងប្រទេស) ហួសពីក្របខណ្ឌជជែក ឬតវ៉ាធម្មតាឈានទៅបង្កចលាចល និងអសន្តិសុខដែលប្រទេស និងប្រជាពលរដ្ឋកម្ពុជាមិនចង់ឃើញការបាត់បង់សណ្តាប់ធ្នាប់ ស្ថេរភាព និងចេរភាពនៃជីវភាព និងកាអភិវឌ្ឍន៍ដែលមានការចូលរួមពីមជ្ឈដ្ឋានជាតិ និងអន្តរជាតិ អ្នកស្ថាបនានិយម និងបញ្ចៀសឧក្រិដ្ឋកម្ម វិនាសកម្មនិយម ។
សូមជម្រាបជាថា ការលើកឡើងរបស់អតីតមន្ត្រីជាន់ខ្ពស់គណបក្សប្រឆាំងនេះ បន្ទាប់ពីបញ្ហាផ្ទៃក្នុងរបស់បក្សប្រឆាំងកំពុងបែកបាក់ ។ ពោល គឺនៅពេលច្បាប់វិសោធនកម្មច្បាប់គណបក្សនយោបាយចូលជាធរមាន នឹងបើកផ្លូវឲ្យអ្នកនយោបាយប្រឆាំងមានសិទ្ធិធ្វើនយោបាយឡើងវិញតាមកំណត់របស់ច្បាប់ ៕
ចែករំលែកព័តមាននេះ