រាជធានីភ្នំពេញ ៖ ជនជាតិចិនម្នាក់ស្រវឹងបើករថយន្តក្នុងល្បឿនលឿនមិនប្រយ័ត្នបុករបាំងថ្មពុះចែកទ្រូងផ្លូវខូចខាតអស់ចំនួន២ផ្ទាំង ធ្វើឲ្យរថយន្តដាច់កង់ទាំងសងខាងរាបដល់ដី បង្កអោយមានការភ្ញាក់ផ្អើលកាលពីវេលាម៉ោង៤ទៀបភ្លឺថ្ងៃទី២៥ ខែធ្នូ ឆ្នាំ២០១៨ តាមបណ្ដោយផ្លូវសហព័ន្ធរុស្ស៊ី ទល់មុខព្រលានយន្តហោះអន្តរជាតិភ្នំពេញ ស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។
រថយន្តខាងលើម៉ាកព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២X-៤០២៧ បើកបរដោយបុរសជនជាតិចិន មិនស្គាល់អត្តសញ្ញាណម្នាក់។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានអោយដឹងថា នៅមុនពេលកើតហេតុ គេឃើញជនជាតិចិនម្នាក់បើករថយន្តមួយគ្រឿងម៉ាកព្រូស ពណ៌ទឹកប្រាក់ បើកបរក្នុងស្ថានភាពស្រវឹងហើយលឿនក្នុងទិសដៅពីកើតទៅលិច លុះដល់ចំណុចកើតហេតុបានរេចង្កូតពេញផ្លូវជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្តាលឲ្យរបាំងថ្មពុះចែកទ្រូងផ្លូវខ្ទាតប្រមាណជិត១០ម៉ែត្រ ចំណែកឯរថយន្តបានរងការខូចខាតដាច់កង់ទាំងសងខាងរាបដល់ដី បែកធុងប្រេង និងផ្ទុះពោងសុវត្ថិភាព តែមិនបង្កឱ្យមានគ្រោះថ្នាក់ដល់អ្នកបើកបរឡើយ ។
ប្រភពព័ត៌មានបានបន្តទៀតថា ក្រោយពេលកើតហេតុ អ្នកបើកបររថយន្តជាជនជាតិចិនខាងលើ ត្រូវបានកំលាំងនគរបាលប៉ុស្តិ៍កាកាបទី២ ឃាត់ខ្លួនភ្លាមៗផងដែរ ដើម្បីប្រគល់អោយជំនាញចរាចរណ៍ នឹងវាស់ជាតិអាកុល តើដល់កំរិតណា។
ចំណែករថយន្តម៉ាកព្រូសខាងលើ ត្រូវបានជំនាញចរាចរណ៍ការិយាល័យផ្លូវគោករាជធានីភ្នំពេញស្ទូចយកទៅរក្សាទុកដើម្បីរង់ចាំការដោះស្រាយនៅថ្ងៃក្រោយ ៕
ចែករំលែកព័តមាននេះ