ខេត្តកណ្តាល ៖ យោងតាមដីកាបង្គាប់ឲ្យចាប់ខ្លួនលេខ១៨៦ដក.ប.ចខ.១៨ចេញដោយលោកចៅក្រមស៊ីបសួរនៃសាលាដំបូងខេត្តកណ្តាល ទី សំណាង ចុះថ្ងៃទី១៩ ខែមិនា ឆ្នាំ២០១៨ប៉ូលិស ស្រុកកៀនស្វាយដឹកនាំដោយលោក វង សែ អធិការរងទទួលផែនទ្រហ្មទណ្ឌនៅវេលាម៉ោង១១ថ្ងៃទី២៤ ខែធ្នូ បានចុះប្រតិបត្តិការស្រាវជ្រាវ និងបង្ក្រាបចាប់ខ្លួនតាមដីកាបង្គាប់ឲ្យចាប់ខ្លួន នៅចំណុចភូមិ រាំងដេក ឃុំគគីរធំ ស្រុកកៀនស្វាយ ខេត្តកណ្ដាល និងមានការសហកម្លាំងប៉ុស្តិ៍នគរបាលរដ្ឋបាលគគីរធំ ។
ជនជាប់ចោទដែលត្រូវចាប់ខ្លួន ឈ្មោះ ពិន ប៊ុនថា ភេទប្រុស អាយុ២១ឆ្នាំ ជនជាតិខ្មែរមានទីលំនៅភូមិរាំងដេក ឃុំគគីរធំស្រុកកៀនស្វាយ ខេត្តកណ្ដាល មុខរបរកម្មករពីបទរំលោភសេពសន្ថវៈតាមបញ្ញាតិមាត្រា០៥ នៃច្បាប់ស្តីពីស្ថានទម្ងន់ទោសនៃបទឧក្រិដ្ឋប្រព្រឹត្តនៅភូមិគគីរធំ ឃុំគគីរធំស្រុកកៀនស្វាយ ខេត្តកណ្តាល កាលពីថ្ងៃទី៣០ ខែវិច្ឆិកា ឆ្នាំ២០១០ ។
សូមបញ្ជាក់ថា ជនត្រូវចោទក្រោយពីចាប់រំលោភបានសម្រេចរួចក៏រត់គេចខ្លួនបាត់ពីស្រុកកំណើតរយៈពេល៥-៦ឆ្នាំ នឹកស្មានថា ខ្លួនរួចផុតពីការចោទប្រកាន់ក៏ត្រឡប់មកស្រុកវិញ «គុកភ្លេចជុងតែជុងមិនភ្លេចគុក» នៅទីបំផុតជនល្មោភកាមរូបនេះធ្លាក់ចូលក្នុងសំណាញ់ច្បាប់ដដែល ។
សូមរំលឹកទៀតថា ជនសង្ស័យឈ្មោះពិន ប៊ុនថា បានបង្កហិង្សាវៃទៅលើមន្ត្រីប៉ូលិសប៉ុស្តិ៍រដ្ឋបាលឃុំគគីរធំ កាលពីថ្ងៃទី០៩ ខែតុលា ឆ្នាំ២០១៨កន្លងទៅថ្មីៗនេះ នៅភូមិរាំងដេក ឃុំគគីរធំ ស្រុកកៀនស្វាយ បណ្តាលឲ្យរងរបួសយ៉ាងធ្ងន់ធ្ងរសន្លប់នៅនឹងកន្លែង ។ ភ្លាមៗនោះប៉ូលិសប៉ុស្តិ៍បានចុះទៅដល់កន្លែងកើតហេតុឈានទៅចាប់ឃាត់ខ្លួនជនដៃដល់រូបនេះបញ្ជូនមកកាន់អធិការដ្ឋាននគរបាលស្រុក ដើម្បីកសាងសំណុំរឿងទៅតុលាការខេត្តកណ្តាលឃុំខ្លួនបានមួយចំអិនកំពឹសក៏ត្រូវបានតុលាការខេត្តកណ្តាលដោះលែងឲ្យនៅក្រៅឃុំបណ្តោះអាសន្ន កាលពីថ្ងៃទី០៧ ខែធ្នូ ឆ្នាំ២០១៨ថ្មីៗនេះ ៕
ចែករំលែកព័តមាននេះ