ខេត្តព្រៃវែង ៖ លោក អ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង បានមានប្រសាសន៍ថា បច្ចុប្បន្ននេះគេពិនិត្យឃើញថា នៅលើទីផ្សារជាតិ និងអន្តរជាតិគឺកំពុងពេញនិយមខ្លាំងលើប្រភេទស្រូវសែនក្រអូប ហើយបានអោយតម្លៃខ្ពស់រហូតដល់ ១២០០រៀលក្នុង១គីឡូក្រាម ខណៈពេលដែលតម្លៃស្រូវអ៊ីអ៊ែធម្មតា លក់បានត្រឹមតែ៧០០ ទៅ ៨០០រៀលប៉ុណ្ណោះ ។
លោកបានបញ្ជាក់ថា ដោយយោងលើកត្តាតម្រូវការទីផ្សារ និងដើម្បីលើកស្ទួយកំរិតជីវភាពរបស់បងប្អូនប្រជាកសិករនៅក្នុងខេត្ត លោកបានដាក់ផែនការអោយមន្រី្តជំនាញក្រោមឱវាទ ចុះទៅផ្សព្វផ្សាយ និងជំរុញអោយបងប្អូនប្រជាកសិករ នៅគ្រប់ស្រុកទូទាំងខេត្ត ប្តូរមកធ្វើស្រូវសែនក្រអូបវិញ ព្រោះស្រូវនេះមានកំហាប់សំណើមតិចជាងស្រូវដទៃ និងមានទំងន់ធ្ងន់ជាងស្រូវប្រភេទផ្សេងៗទៀត ដែលអាចលក់ចេញបានប្រាក់កំរៃច្រើន ធ្វើអោយជីវភាពប្រជាកសិករ កាន់តែប្រសើរជាងមុន ជាមួយគ្នានោះ ក៏មានមន្ត្រីជំនាញកសិកម្មនៅថ្នាក់ឃុំនិងស្រុក នៅចាំជួយផ្តល់ប្រឹក្សា និងបច្ចេកទេសដល់បងប្អូនកសិករ នៅពេលជួបបញ្ហាផ្សេងៗផងដែរ ។
បើយោងតាមទិន្នន័យរបស់មន្ទីរកសិកម្មខេត្តព្រៃវែង បានអោយដឹងថា ប្រជាពលរដ្ឋប្រមាណជា៧៨% នៅទូទាំងខេត្ត គឺជាកសិករដែលពឹងផ្អែកលើមុខរបរកសិកម្ម នៅលើផ្ទះដីដាំដុះសរុបជាង៣៣ម៉ឺនហិកតា ក្នុងនោះដំណាំស្រូវរដូវវស្សាមានចំនួន២៥ម៉ឺនហិកតា ស្រូវប្រាំងមានចំនួន៧៥០០០ហិកតា និងដំណាំរួមផ្សំផ្សេងៗចំនួន១២,០០០ហិកតា ៕
ចែករំលែកព័តមាននេះ