លោក Ole Gunnar Solskjaer អះអាងថា ការងារដំបូងរបស់លោកក្នុងឋានៈជាអ្នក ចាត់ការបណ្ដោះអាសន្ននៅក្លិប Man Utd គឺត្រូវធ្វើឲ្យកីឡាករសប្បាយចិត្តឡើងវិញ ។
អ្នកចាត់ការសញ្ជាតិន័រវែសរូបនេះបានមកធ្វើជាអ្នកចាត់ការឱ្យក្លិប Man Utd ក្នុងកិច្ចសន្យាខ្ចីពីក្លិប Molde រយ:ពេល៦ខែដើម្បីជំនួសលោក Jose Mourinho បន្ទាប់ពីក្លិបនេះសម្រេចបណ្តេញចេញកាលពីថ្ងៃអង្គារសប្ដាហ៍មុន ។
លោក Solskjaer បានសារភាពថា លោកត្រូវបញ្ចូលអារម្មណ៍ល្អក្នុងក្រុមជម្រើសរបស់ក្លិបនេះឡើងវិញ ។ លោកបាននិយាយថា «វាជារឿងល្អ ។ ខ្ញុំមានអារម្មណ៍ថា ដូចជាត្រឡប់មកផ្ទះវិញ ។ វាពិតជាអស្ចារ្យណាស់ដែលបានជួបមនុស្សគ្រប់គ្នា ។ ខ្ញុំដឹងថា ក្លិបនេះស្ថិតក្នុងដំណើរការស្វែងរកអ្នកចាត់ការថ្មី» ។
លោក Mourinho បានបញ្ចប់អាណត្តិរបស់ខ្លួននៅពហុកីឡដ្ឋាន Old Trafford បន្ទាប់ពីមានជម្លោះជាមួយកីឡាករល្បីៗដួចជា Paul Pogba, Anthony Martial និង Luke Shaw ជាដើម ។ អំឡុងការចាប់ផ្តើមរដូវកាលដ៏លំបាករបស់ Man Utd លោក Mourinho មានទម្លាប់រិះគន់កីឡាកររបស់លោកជាសាធារណៈ ។
កីឡាករដូចជា Pogba ត្រូវបានដកចេញពីក្រុមជម្រើសក្នុងប៉ុន្មានប្រកួតចុងក្រោយ ស្របពេលមានការលើកឡើងថា លោក Mourinho មិនបាននិយាយរកខ្សែការពារ Luke Shaw មុនពេលចាកចេញពី Man Utd ផងដែរ ។
ក្រុមកីឡាករ Man Utd ហាក់បង្ហាញពីសមានចិត្តល្អជាមួយលោក Solskjaer តាមរយៈការយកឈ្នះក្រុមម្ចាស់ផ្ទះ Cadiff ៥-១ ក្នុងជំនួបក្របខ័ណ្ឌប្រឺមីញេលីគកាលពីរាត្រីថ្ងៃអាទិត្យក្រោមការដឹកនាំរបស់លោកនៅថ្ងៃដំបូង ៕
ចែករំលែកព័តមាននេះ